តំណាងសហជីពចំនួន ៣នាក់ ស្នើទៅតុលាការឱ្យជួយរកយុត្តិធម៌ ដោយអះអាងថា ថៅកែក្រុមហ៊ុនបានរំលោភសិទ្ធិកម្មករ និងព្យួរការងារពួកគេទាំងអយុត្តិធម៌ ហើយបែរជាប្ដឹងទាមទារសំណងជិត ៤ម៉ឺនដុល្លារ។
ការស្នើនេះធ្វើឡើងបន្ទាប់ប្រធានសហជីពស្មារតីកម្មករ លោក កឹម សុភេន និងលេខាធិការ លោក គឹម វណ្ណដេត ព្រមទាំងអនុប្រធានសហជីពសា្មរតីកម្មករ អ្នកនាង ម៉ិច ស៊ាងហៃ បានចូលបំភ្លឺនៅសាលាដំបូងរាជធានីភ្នំពេញ នាព្រឹកថ្ងៃទី១២ ខែមករា ឆ្នាំ២០២៣ តាមដីកាកោះរបស់តុលាការ ក្រោយពីក្រុមហ៊ុន សិនតៃ ហ្គាមេន បានប្ដឹងពួកគេ ករណីកម្មករតវ៉ាកាលពីដើមខែធ្នូ ឆ្នាំ២០២២។
ប្រធានសហជីពស្មារតីកម្មករ លោក កឹម សុភេន ប្រាប់វីអូឌីថា នៅពេលចូលទៅបំភ្លឺនៅសាលាដំបូងនោះ ចៅក្រមបានព្យាយាមសម្របសម្រួលវិវាទការងាររវាងភាគីទាំងសងខាង ប៉ុន្តែមេធាវីដើមបណ្ដឹងរបស់ក្រុមហ៊ុន មិនព្រមសម្របសម្រួលបញ្ចប់រឿងនោះទេ។
លោកបន្តថា មេធាវីក្រុមហ៊ុនបានបន្តទាមទារឱ្យពួកគាត់សងសំណងខូចខាត បើទោះបីជាកន្លងមក ក្រុមហ៊ុននេះបានរំលោភសិទ្ធិការងារ និងព្យួរការងារពួកគាត់ទាំងអយុត្តិធម៌ក្ដី។
លោកចាត់ទុកការមិនព្រមសម្របសម្រួល និងបន្តប្ដឹងទាមទារសំណងពីពួកគាត់នេះថា ជាការបំបិទសិទ្ធិសេរីភាពទៅលើកម្មករ ខណៈការតវ៉ារបស់កម្មករកាលពីដើមខែធ្នូ ឆ្នាំ២០២២ ធ្វើឡើងគោរពទៅតាមច្បាប់ស្តីពីការងារ។
លោកថា៖ «ប៉ះពាល់ បើគ្រាន់តែយើងជួយការងារ ដោះស្រាយជូនបងប្អូនកម្មករ យើងការពារសិទ្ធិសេរីភាពជូនកម្មករ បែរជារងបណ្ដឹងរបស់ក្រុមហ៊ុន ក្រុមហ៊ុនប្ដឹង ក្រុមហ៊ុនប្ដឹងសហជីព រំលងភាគីក្រសួងទៀត»។
វីអូឌី មិនទាន់អាចសុំការបញ្ជាក់បន្ថែមពីចៅក្រមសាលាដំបូងរាជធានីភ្នំពេញ លោក លឹម សុគន្ធារ៉ា និងមេធាវីតំណាងក្រុមហ៊ុន សិនតៃ ហ្គាមេន លោក តាំង ម៉េង បានទេ នៅថ្ងៃនេះ។
ប៉ុន្តែកាលពីថ្ងៃទី២៨ ខែធ្នូ ឆ្នាំ២០២២ លោក តាំង ម៉េង បានប្រាប់វីអូឌីថា ក្រុមហ៊ុនប្ដឹងទៅតុលាការ ដោយសារតំណាងសហជីពទាំង៣នាក់បានកៀរគរកម្មករតវ៉ា ដែលធ្វើឱ្យប៉ះពាល់ដល់ខ្សែចង្វាក់ផលិកម្មរបស់ក្រុមហ៊ុន។
លោកថា៖ «គេមិនមែនចេះតែទារដូចពួកគាត់ទេ សំខាន់ជាងគេ គាត់ទាមទារទៅតាមការខូចខាតជាក់ស្ដែង អាហ្នឹងពាក់ព័ន្ធនឹងការយឺតយ៉ាវទៅឱ្យអតិថិជនទេ។ យើងគិតតែទៅលើប្រាក់ឈ្នួល ថ្លៃភ្លើង ថៃ្លអគារ។ ខ្ញុំចង់បញ្ជាក់ថា កូដកម្មហ្នឹង ដោយសារនិយោជកគាត់ទ្រាំអត់បាន ដោយសារគាត់[កម្មករ]ធ្លាប់កូដកម្មម្ដងហើយ កាលពីឆ្នាំ២០១៥។ [កម្មករ]គាត់ធ្លាប់កូដកម្មបែបហ្នឹង អត់មានជូនដំណឹង អត់មានធ្វើអីតាមនីតិវិធីច្បាប់ទេ»។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ប្រាប់វីអូឌីតាមប្រព័ន្ធតេឡេក្រាមថា កន្លងមក ក្រសួងបានព្យាយាមឱ្យភាគីទាំងពីរគួរតែសម្របសម្រួលគ្នា ដើម្បីបញ្ចប់វិវាទ ប៉ុន្តែភាគីទាំងពីរមិនព្រម ដោយប្ដឹងទៅតុលាការទៀត។ លោកថា ករណីបានផុតដៃក្រសួងការងារហើយ ដូច្នេះមានតែទុកឱ្យចៅក្រមជាអ្នកសម្រេចនិងពិនិត្យវិនិច្ឆយបន្ត។
លោកថា៖ «ប្រសិនជាមានភាគីណាមួយបន្ទន់ជំហរថាខ្លួនខ្វះខាតខ្លះដែរ ហើយសន្យាមិនបង្កឱ្យមានការខ្វះខាតនោះជាលើកទីពីរ ភាគីដែលគិតថាខ្លួនត្រូវទាំងស្រុង ក៏គួរគិតទៅលើគោលការណ៍ឈ្នះ ខន្តី និងអភ័យទោសដល់ភាគីម្ខាងទៀត ដែលបានបន្ទន់ឥរិយាបថហើយ»។
បើតាមប្រធានសហជីពស្មារតីកម្មករ លោក កឹម សុភេន ដើមចមនៃការផ្ទុះការតវ៉ាកាលពីដើមខែធ្នូនេះ ក្រោយពីថៅកែក្រុមហ៊ុន សិនតៃ បានជូនដំណឹងមកកម្មករដែលត្រូវបានព្យួរការងារចំនួន៩០០នាក់ ក្នុងរយៈពេល២ខែ ដោយផ្ដល់ប្រាក់ ៣០ដុល្លារ ក្នុងមួយខែ សម្រាប់កម្មករម្នាក់ ខណៈកម្មករទាមទារឱ្យក្រុមហ៊ុនផ្តល់ប្រាក់ ៥០ភាគរយ នៃប្រាក់ឈ្នួល។
បន្ថែមពីនេះ កម្មករក៏ទាមទារឱ្យក្រុមហ៊ុនប្ដូរវេនកម្មករដើម្បីធ្វើការ ប៉ុន្តែក្រុមហ៊ុនមិនព្រម ដោយលើកហេតុផលថា ការប្តូរនេះនឹងប៉ះពាល់ដល់ខ្សែចង្វាក់ផលិតកម្មរបស់ក្រុមហ៊ុន ដោយថា កម្មករទាំងនោះមិនមានជំនាញក្នុងការដេរសម្លៀកបំពាក់ដែលនៅសល់។
ប្រធានសហជីពស្មារតីកម្មករ ឱ្យដឹងថា រោងចក្រ សិន តៃ ជារោងចក្រផលិតសម្លៀកបំពាក់ មានទីតាំងស្ថិតភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ ដែលមានថៅកែជាជនជាតិចិន ហើយមានកម្មករជិត២ ០០០នាក់បម្រើការងារ៕