បណ្ដាញសហគមន៍ព្រៃឡង់ខេត្តព្រះវិហារ បានរកឃើញបទល្មើសកាប់បំផ្លាញព្រៃឈើចំនួនជិត១០០ករណីបន្ថែមទៀត ខណៈពួកគេថាបទល្មើសទាំងនេះបន្តកើតឡើងដោយសារការអនុវត្តច្បាប់នៅធូររលុង និងភាពអសកម្មរបស់មន្ត្រី។
បើតាមរបាយការណ៍បណ្ដាញសហគមន៍ព្រៃឡង់ដែលចេញផ្សាយនៅថ្ងៃទី១៦ ខែមករា ឆ្នាំ ២០២៣ បានរកឃើញបទល្មើសព្រៃឈើក្នុងតំបន់អភិរក្សមួយនេះនៅភូមិសាស្រ្តឃុំធ្មា និងឃុំរៀបរយ ស្រុកជ័យសែន ដែលមានចំនួន ៧៣ករណី ដោយក្នុងនោះរកឃើញគល់ឈើដែលក្រុមជនល្មើសលួចកាត់ចំនួន ៥៥ករណី។ គល់ឈើទាំងនោះមានមុខកាត់ពីកន្លះម៉ែត្រទៅមួយម៉ែត្រ និងរកឃើញឈើអារច្រៀកមិនទាន់ដឹកចេញចំនួន ៩ម៉ែត្រគូប ព្រមទាំងឈើក្ដារមួយចំនួនទៀតដែលជាប្រភេទឈើ គគីរ ត្រាច តៀក ផ្ចឹក ឈើទាល និងឈ្លីក ជាដើម។
ប្រភពដដែលបន្តថា ក្រុមជនល្មើសដែលលួចចូលទៅអារ និងដឹកឈើ ចំនួន៨នាក់ ដោយដោយប្រើគោយន្តដឹកឈើចំនួន២គ្រឿង រកឃើញប្រេងម៉ាស៊ូត និងសាំងចំនួន៣កាដុងធំ ហើយពួកគេក៏បានរកឃើញសម្ភារដែលបម្រើដល់ការកាប់ឈើជាច្រើនទៀត។
ប្រធានបណ្តាញសហគមន៍ព្រៃឡង់ខេត្តព្រះវិហារ លោក ស្រី ថី បានឱ្យដឹងថា ក្រោយពីបានចុះល្បាតរួចមក បណ្ដាញសហគមន៍ព្រៃឡង់បានជូនដំណឹងទៅកាន់មន្រ្តីបរិស្ថាននៅទីតាំងដែលបានរកឃើញបទល្មើសទាំងនោះ។
លោកបន្ថែមថា មូលហេតុដែលបទល្មើសនៅតែកើតមាននេះ ដោយសារតែមន្រ្តីបរិស្ថាន និងអាជ្ញាធរពាក់ព័ន្ធមិនសកម្ម និងមិនបានអនុវត្តច្បាប់តឹងរ៉ឹងទៅលើជនល្មើស។
លោកបន្តថា៖ «វាមិនស្ងៀមស្ងាត់ទេ ការកាប់បំផ្លាញព្រៃឈើនៅតែកើតមានហ្នឹងឯង ហើយមន្រ្តីគាត់ដើរជាមួយអាជ្ញាធរពីប៉ុន្មានថ្ងៃមុន ក្បែរៗភូមិហ្នឹងឯង ហើយដើរម៉េចនឹងឃើញ? គាត់ដើរបង្គ្រប់តែកិច្ចទេ មិនមែនទៅរកបទល្មើសទេ ថាគាត់បានដើរល្បាតហើយ»។
ប្រធានមន្ទីរបរិស្ថានខេត្តព្រះវិហារ លោក សុង ច័ន្ទសុជាតិ បានបដិសេធជុំវិញការរកឃើញបទល្មើសពីសំណាក់បណ្ដាញសហគមន៍ព្រៃឡង់នេះ។ លោកបន្តថា ការរកឃើញនេះជារឿងមិនពិត ដោយសារតែការចុះល្បាតរបស់សហគមន៍មិនបានសហការជាមួយមន្រ្តីបរិស្ថាននៅតំបន់នោះទេ។
លោកបន្តថា៖ «គាត់ចុះទៅជាមួយពួកណា? អត់មានពួកខ្ញុំចុះជាមួយណាអី? ខ្ញុំអត់បានទទួលទេបង! ឆ្លើយតបម៉េច? ពួកខ្ញុំចុះធ្វើការរាល់ថ្ងៃ ពេលគាត់ចុះលើកក្រោយ ឱ្យគាត់ចុះសហការជាមួយខ្ញុំទៅ។ ពួកខ្ញុំទទួលធ្វើការជាមួយ ឱ្យគាត់ចុះបញ្ជីត្រឹមត្រូវទៅ។ បើគាត់អត់ធ្វើការជាមួយខ្ញុំផង ឱ្យខ្ញុំទទួលជាផ្លូវការម៉េច»។
ប្រធានមន្ទីរបរិស្ថានរូបនេះ អះអាងថា មិនមានអំពើពុករលួយរវាងជនល្មើស និងមន្រ្តីបរិស្ថាននៅទីនោះទេ។
លោកថា៖ «ពុករលួយនរណាមួយ? ពុករលួយ? បងឯងរកឈ្មោះឱ្យមក! ហើយពួកគាត់ដឹងអត់? ឱ្យឈ្មោះមក! ពួកយើងធ្វើការមានក្រមសីលធម៌តើ!»
យ៉ាងនេះក្តី មន្ត្រីសម្របសម្រួលគម្រោងនៃសមាគមបណ្តាញយុវជនកម្ពុជា (CYN) លោក អូត ឡាទីន បានលើកឡើងថា ឆ្លងកាត់តាមការចូលរួមចុះល្បាតជាមួយបណ្ដាញសហគមន៍ព្រៃឡង់កន្លងមក បទល្មើសកើតឡើងបណ្ដាលមកពីភាពអសកម្មរបស់មន្រ្តី និងអំពើពុករលួយរបស់អាជ្ញាធរពាក់ព័ន្ធ។
លោកបន្តថា៖ «បញ្ហាដែលកើតឱ្យមានបទល្មើសជាដដែលៗ អត់មានការបញ្ឈប់នេះ គឺភាពកម្សោយរបស់មន្រ្តីនៅក្នុងការធ្វើកិច្ចការងារ ដោយសារគាត់មិនយកតួនាទីដើម្បីធ្វើកិច្ចការងារដើម្បីផលប្រយោជន៍ជាតិនោះទេ ជាពិសេសគាត់មិនយកតួនាទីដើម្បីការពារព្រៃឈើនោះទេ»។
លោក អូត ឡាទីន បន្ថែមថា៖ «បើសិនជាគាត់យកតួនាទីទៅការពារព្រៃឈើ បញ្ហានៅក្នុងតំបន់ព្រៃឡង់ ឬនៅតំបន់ការពារព្រៃឈើ វាលែងមានទៀតហើយ ដោយសារពីព្រោះតែព្រោះគាត់នៅប្រចាំការនៅទីនោះតែម្ដង ហើយពួកគាត់នៅតាមច្រកចេញឈើសំខាន់ៗ»។
បើតាមរបាយការណ៍របស់សាកលវិទ្យាល័យ Copenhagen នៃប្រទេសដាណឺម៉ាក កាលពីឆ្នាំ២០២២ រកឃើញថា ទំហំគម្របព្រៃឈើប្រមាណ ១៤ម៉ឺនហិកតា នៅក្នុងតំបន់ព្រៃការពារចំនួនបី រួមមាន តំបន់ព្រៃឡង់ ព្រៃព្រះរការ និងព្រៃសហគមន៍សង្ឃរក្ខាវ័ន ត្រូវបានបាត់បង់។ ការបាត់បង់នោះ ដោយសារគម្រោងអភិវឌ្ឍន៍របស់រដ្ឋាភិបាលកម្ពុជា ដែលបានផ្ដល់សិទ្ធិដល់ក្រុមហ៊ុនអភិវឌ្ឍន៍នៅជុំវិញតំបន់ព្រៃការពារទាំងនោះនៅក្នុងឆ្នាំ២០២១ ហើយក្រុមហ៊ុនដែលជាប់ពាក់ព័ន្ធនឹងការកាប់បំផ្លាញព្រៃឈើនេះ រួមមាន ក្រុមហ៊ុន Think Biotech ក្រុមហ៊ុនវៀតណាម PNT និងក្រុមហ៊ុន Thy Nga៕