សាលារាជធានីភ្នំពេញ អនុញ្ញាតឱ្យក្រុមសហជីពរៀបចំពិធីរម្លឹកខួប ១៩ឆ្នាំ នៃការបាញ់សម្លាប់អតីតប្រធានសហជីព លោក ជា វិជ្ជា ខណៈសំណុំរឿងនេះ សមត្ថកិច្ចមិនទាប់ចាប់ឃាតកពិត និងអ្នកនៅពីក្រោយខ្នងនៃអំពើឃាតកម្មនេះយកមកផ្តន្ទាទោសបាននៅឡើយ។
កាលពីថ្ងៃទី២ ខែមករា ឆ្នាំ២០២៣ សហព័ន្ធសហជីពសេរីកម្មករនៃព្រះរាជាណាចក្រកម្ពុជា បានដាក់លិខិតមួយទៅរដ្ឋបាលរាជធានីភ្នំពេញ ដើម្បីជូនដំណឹងពីការជួបជុំគ្នាដាក់កម្រងផ្កាគោរពវិញ្ញាណក្ខន្ធអតីតប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា វិជ្ជា នៅថ្ងៃទី២២ ខែមករា ឆ្នាំ២០២៣នេះ។
លិខិតនេះបានលើកឡើងថា លោក ជា វិជ្ជា ត្រូវបានឃាតកបាញ់សម្លាប់យ៉ាងសាហាវព្រៃផ្សៃបំផុត កាលពីថ្ងៃទី២២ ខែមករា ឆ្នាំ២០០៤ នៅមុខតូបលក់កាសែត ក្បែរវត្តលង្កា រាជធានីភ្នំពេញ។
លិខិតដដែលបញ្ជាក់ថា សម្រាប់ឆ្នាំ២០២៣នេះ ថ្នាក់ដឹកនាំ សមាជិកសហជីព និងក្រុមគ្រួសារ សាច់ញាតិប្រមាណ១៥០នាក់នឹងជួបជុំគ្នាដាក់កម្រងផ្កាគោរពវិញ្ញាណក្ខន្ធលោក ជា វិជ្ជា នៅកន្លែងតម្កល់រូបសំណាក ក្បែរវត្តលង្កា ជិតវិមានឯករាជ្យ និងជិតភូមិគ្រឹះលោកនាយករដ្ឋមន្ត្រី ហ៊ុន សែន ផងដែរ។
ក្នុងលិខិតចុះថ្ងៃទី១៣ ខែមករា រដ្ឋបាលរាជធានីភ្នំពេញ បានអនុញ្ញាតឱ្យក្រុមសហជីពជួបជុំគ្នាដាក់កម្រងផ្កា និងគោរពវិញ្ញាណក្ខន្ធអតីតប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា វិជ្ជា ប៉ុន្តែត្រូវគោរព និងអនុវត្តតាមកិច្ចប្រជុំជាមួយរដ្ឋបាលរាជធានីភ្នំពេញនាពេលកន្លងមក ហើយសហជីពត្រូវសហការជាមួយអាជ្ញាធរ ដើម្បីធានានូវសន្តិសុខសុវត្ថិភាព សណ្តាប់ធ្នាប់ និងរបៀបរៀបរយសាធារណៈផងដែរ។
ប្រធានសហព័ន្ធសហជីពសេរីកម្មករនៃព្រះរាជាណាចក្រកម្ពុជា អ្នកស្រី ទូច សើ មានប្រសាសន៍ថា ឃាតកម្មសម្លាប់លោក ជា វិជ្ជា គឺរដ្ឋាភិបាលហាក់ពុំមានឆន្ទៈក្នុងការស៊ើបអង្កេត និងស្រាវជ្រាវរកឃាតកពិតមកផ្តទ្ទាទោសតាមច្បាប់នោះទេ។ អ្នកស្រីថា ករណីឃាតកម្មផ្សេងៗ គឺសមត្ថកិច្ចស្រាវជ្រាវរកឃើញឃាតកលឿន ប៉ុន្តែសម្រាប់ឃាតកម្មបាញ់សម្លាប់លោក ជា វិជ្ជា កណ្តាលថ្ងៃត្រង់ កាលពី១៩ឆ្នាំមុន គឺសមត្ថកិច្ចរកមិនឃើញតម្រុយណាមួយឡើយ។
ប្រធានសហព័ន្ធសហជីពរូបនេះ បន្តថា ក្នុងឱកាសជួបជុំគ្នាដាក់កម្រងផ្កាគោរពវិញ្ញាណក្ខន្ធលោក ជា វិជ្ជា នៅថ្ងៃ២២ ខែមករា ក្រុមសហជីពបន្តអំពាវនាវ និងទទូចដល់រដ្ឋាភិបាលឱ្យស៊ើបអង្កេតករណីនេះ ដើម្បីបង្ហាញការពិត និងផ្តល់យុត្តិធម៌ដល់គ្រួសារជនរងគ្រោះទៀត។
អ្នកស្រីបន្ថែមថា៖ «រឿងព្រួយបារម្ភភ័យខ្លាច យើងចេះតែភ័យខ្លាចហើយ ព្រោះនៅស្រុកខ្មែរយើងមិនដូចនៅស្រុកគេទេ។ អ៊ីចឹងនៅថ្ងៃរម្លឹកខួបរបស់លោក ជា វិជ្ជា ហ្នឹង គឺសហជីពរបស់យើងនៅតែទាមទារឱ្យរដ្ឋាភិបាលស្វែងរកយុត្តិធម៌ឱ្យជនរងគ្រោះដូចរាល់ឆ្នាំអ៊ីចឹង»។
ប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថា លោកនឹងចូលរួមដាក់កម្រងផ្កាគោរពវិញ្ញាណក្ខន្ធលោក ជា វិជ្ជា នៅថ្ងៃ២២ ខែមករានេះ។ លោកថា រូបលោកដែលជាមិត្តភក្តិ និងក្រុមគ្រួសាររបស់លោក ជា វិជ្ជា បានរង់ចាំយុត្តិធម៌អស់រយៈពេលជិត២០ឆ្នាំហើយ។
ប្រធានសហជីពរូបនេះ បន្តថា សមត្ថកិច្ចកម្ពុជាមិនមែនអសមត្ថភាពក្នុងការស្វែងរកឃាតក និងអ្នកពាក់ព័ន្ធនោះទេ ប៉ុន្តែសមត្ថកិច្ច និងរដ្ឋាភិបាលមានចេតនាមិនស្វែងរកឃាតកតែម្តង ដោយសារឃាតកម្មនេះជាប់ពាក់ព័ន្ធជាមួយមន្ត្រីមានឋានៈធំក្នុងជួររដ្ឋាភិបាល។
លោកបន្ថែមថា៖ «សមត្ថកិច្ចរាជធានីភ្នំពេញ ឬក៏រដ្ឋាភិបាល មានចេតនាមិនវែកមុខរកឃាតក និងអ្នកនៅក្រោយខ្នងឃាតក យកទៅផ្តន្ទាទោសតាមផ្លូវច្បាប់នោះទេ ព្រោះករណីឃាតកម្មលើលោក ជា វិជ្ជា នេះជាប់ពាក់ព័ន្ធជាមួយមន្ត្រីមានឋានៈធំ។ នេះបើតាមការអះអាងរបស់នគរបាលព្រហ្មទណ្ឌកម្រិតស្រាល នៅពេលដែលលោក ជា វិជ្ជា ទទួលបានសារគំរាមកំហែង ហើយខ្ញុំក៏បានជូនគាត់ទៅជួបប៉ូលិសព្រហ្មទណ្ឌ ហើយប៉ូលិសព្រហ្មទណ្ឌគាត់ក៏បានឆែកមើលលេខទូរសព្ទ ហើយគាត់បានឆ្លើយតបមកវិញថាគាត់មិនហ៊ានប៉ះនោះទេ ព្រោះ ម្ចាស់ទូរសព្ទមានឋានៈខ្ពស់ណាស់។ អ៊ីចឹងសូមលោករកកន្លែងមានសុវត្ថិភាពទៅ»។
លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវបានឃាតកបាញ់ចំសៀតផ្កា និងដើមទ្រូង ដេកស្លាប់ក្នុងថ្លុកឈាម កាលពីព្រឹកថ្ងៃទី២២ ខែមករា ឆ្នាំ២០០៤ នៅតូបលក់កាសែតមួយ ក្រោយវត្តលង្កា រាជធានីភ្នំពេញ។ ការបាញ់សម្លាប់លោក ជា វិជ្ជា ពេលនោះកើតមានឡើង បន្ទាប់ពីលោកបានទទួលរងការគំរាមសម្លាប់ និងការគំរាមកំហែងជាបន្តបន្ទាប់ពីជនមិនស្គាល់មុខ ចំពោះសកម្មភាពសហជីពរបស់លោកដើម្បីការពារប្រយោជន៍និងសិទ្ធិសេរីភាពកម្មករ។
រយៈពេល១៩ឆ្នាំមកនេះ អាជ្ញាធរនៅមិនទាន់បាននាំខ្លួនឃាតកពិតប្រាកដ និងអ្នកបញ្ជានៅពីក្រោយខ្នងយកមកផ្តន្ទាទោសនោះទេ ក្រៅតែពីជនសង្ស័យពីររូប គឺលោក ប៊ន សំណាង និងលោក សុខ សំអឿន ដែលសង្គមស៊ីវិល និងសហជីពហៅថា ជាឃាតកសិប្បនិមិត្តតែប៉ុណ្ណោះ។
ប៊ន សំណាង និង សុក សំអឿន ត្រូវបានតុលាការកាត់ទោសឱ្យជាប់ពន្ធនាគារម្នាក់ៗចំនួន២០ឆ្នាំ ពីបទ «ឃាតកម្មដោយចេតនា» លើលោក ជា វិជ្ជា តែត្រូវបានតុលាការកំពូលដោះលែង និងរួចផុតពីការចោទប្រកាន់វិញ កាលពីខែកញ្ញា ឆ្នាំ២០១៣ ក្រោយពីពួកគេត្រូវជាប់ពន្ធនាគារសរុបជាង៥ឆ្នាំ ដោយតុលាការកំពូលសំអាងថា អ្នកទាំងពីរគ្មានកំហុស៕