មេធាវីដែលការពារក្ដីឱ្យអនុប្រធានបក្សភ្លើងទៀន លោក ថាច់ សេដ្ឋា បញ្ជាក់ថា សេចក្តីថ្លែងការណ៍ដែលផ្សព្វផ្សាយថា «ការចាប់ខ្លួនលោក ថាច់ សេដ្ឋា គឺជារឿងត្រឹមត្រូវតាមនីតិវិធីច្បាប់នៅកម្ពុជា មិនពាក់ព័ន្ធរឿងនយោបាយ» នោះ គឺជាលិខិតក្លែងក្លាយ ដែលត្រូវគេបង្កើតដើម្បីបង្កការភ្ញាក់ផ្អើល និងចលាចលផ្ទៃក្នុងគណបក្សភ្លើងទៀន។
កាលពីយប់ថ្ងៃទី១៧ ខែមករា មានការចែកចាយព័ត៌មានបន្តគ្នាថា ក្រសួងព័ត៌មានបានផ្សាយនៅលើបណ្ដាញសង្គមហ្វេសប៊ុក ពាក់ព័ន្ធសេចក្តីថ្លែងការណ៍ករណីចាប់ខ្លួនអនុប្រធានបក្សភ្លើងទៀន ដោយក្នុងនោះ ក្រសួងបានសរសេរខ្លឹមសារ និងមានភ្ជាប់នឹងរូបថតសេចក្តីថ្លែងការណ៍នោះថា «គណបក្សភ្លើងទៀន បានប្រកាសថា ការឃុំខ្លួននិងចាប់ខ្លួនលោក ថាច់ សេដ្ឋា គឺជារឿងត្រឹមត្រូវតាមនីតិវិធីច្បាប់នៅកម្ពុជា មិនពាក់ព័ន្ធរឿងនយោបាយនោះទេ»។
សេចក្តីថ្លែងការណ៍ដែលក្រសួងបានផ្សព្វផ្សាយនោះ មានខ្លឹមសារថា៖ «គណបក្សភ្លើងទៀន យល់ឃើញថា ការចាប់និងឃុំខ្លួនលោក ថាច់ សេដ្ឋា គឺជារឿងត្រឹមត្រូវតាមនីតិវិធីច្បាប់នៅកម្ពុជា ដោយមិនពាក់ព័ន្ធនឹងរឿងនយោបាយនោះទេ និងចាត់ទុកថាការលើកឡើងរបស់ក្រុមអ្នកនយោបាយឆ្លៀតឱកាសនិយមមួយចំនួនតូច ជាការបំបាក់ស្មារតីប្រជាពលរដ្ឋខ្មែរ និងមានចេតនាកេងចំណេញនយោបាយបម្រើដល់ប្រយោជន៍បរទេស»។
អ្នកប្រើប្រាស់បណ្តាញសង្គមមួយចំនួនបានថត ឬ screenshot ចែកចាយបន្ត ដោយលើកឡើងថា ក្រសួងព័ត៌មានបានផ្សព្វផ្សាយសេចក្តីថ្លែងការណ៍ក្លែងក្លាយ ឬ fake news និងបានរិះគន់ថា ក្រសួងព័ត៌មានជាស្ថាប័នផ្លូវការរបស់រដ្ឋ មិនគួរណាផ្សាយបំភ្លៃការពិត បង្កការភ័ន្តច្រឡំទៅកាន់មហាជនបែបនេះឡើយ ពោលគឺត្រូវតែផ្សព្វផ្សាយព័ត៌មានពិតដោយវីជ្ជាជីវៈ។
យ៉ាងណា ក្រោយមក ក្រសួងព័ត៌មានបានលុបនូវការបង្ហោះសេចក្តីថ្លែងការណ៍នោះវិញ។
លោក សំ សុគង់ ដែលជាមេធាវីការពារសិទ្ធិឱ្យលោក ថាច់ សេដ្ឋា ប្រាប់វីអូឌីនៅថ្ងៃទី១៨ ខែមករានេះថា លោកបានជួបជាមួយថ្នាក់ដឹកនាំបក្សភ្លើងទៀនរួចហើយ ខណៈបក្សលើកឡើងថា សេចក្តីថ្លែងការណ៍នោះជាលិខិតក្លែងក្លាយ ដែលគេមានចេតនាបង្កើតរឿង ដើម្បីបង្កចលាចលផ្ទៃក្នុងគណបក្ស។
លោកថា៖ «គណបក្សភ្លើងទៀន ក៏មានការភ្ញាក់ផ្អើលដែរ។ ព័ត៌មានហ្នឹងគឺជាព័ត៌មានអត់ពិត ហើយព័ត៌មានហ្នឹងអាចមានជនណាមួយ គាត់អាចបង្កបង្កើតរឿងហ្នឹងមក ដើម្បីធ្វើឱ្យមានភាពចលាចល ភាពភ្ញាក់ផ្អើលនៅក្នុងផ្ទៃក្នុងគណបក្ស។ តាមពិត ព័ត៌មានហ្នឹងអត់ពិតទេ។
លោក សំ សុគង់ បន្តថា៖ «សំខាន់យើងកំពុងតែយកឯកសារមកសិក្សា ហើយនិងផ្តល់យោបល់ទៅគណបក្ស បើសិនជាគណបក្សគាត់យល់ថាប៉ះពាល់ដល់កិត្តិយស ឬក៏ប៉ះពាល់ដល់កិត្តិសព្ទរបស់គណបក្សធ្ងន់ធ្ងរពេក។ អាហ្នឹងគណបក្សឱ្យប្តឹង អ៊ីចឹងក្រុមមេធាវីនឹងរៀបចំបណ្តឹងទៅតាមនីតិវិធី។ ប៉ុន្តែបើសិនគណបក្សថាគ្រាន់តែធ្វើសេចក្តីថ្លែងការណ៍ អាហ្នឹងទុកឱ្យថ្នាក់ដឹកនាំគណបក្សជាអ្នកសម្រេច»។
វីអូឌី មិនអាចទាក់ទងសុំការអត្ថាធិប្បាយពីប្រតិភូរាជរដ្ឋាភិបាល ទទួលបន្ទុកអគ្គនាយក នៃអគ្គនាយកដ្ឋានព័ត៌មាន និងសោតទស្សន៍ លោក ផុស សុវណ្ណ ហើយនិងអនុរដ្ឋលេខាធិការ និងជាអ្នកនាំពាក្យក្រសួងព័ត៌មាន លោក មាស សុភ័ណ្ឌ បានទេ នៅថ្ងៃទី១៨ ខែមករានេះ។
សាស្ត្រាចារ្យផ្នែកសារព័ត៌មាន លោក ម៉ៃ ទិត្យថារ៉ា យល់ថា មុនការបង្ហោះផ្សព្វផ្សាយព័ត៌មាននីមួយៗ ស្ថាប័នគួរតែមានការផ្ទៀងផ្ទាត់ព័ត៌មានពិតជាមុនសិន ជាពិសេសស្ថាប័នធំៗដែលអ្នកតាមដានព័ត៌មានធ្លាប់ទុកចិត្ត ដើម្បីចៀសវាងការក្លែងបន្លំ បើមិនដូច្នេះទេ ស្ថាប័ននោះនឹងក្លាយជាអ្នកផ្សាយព័ត៌មានក្លែងក្លាយទៅកាន់សាធារណជនជាមិនខាន។
លោកបន្តថា ក្រោយរកឃើញនូវកំហុសឆ្គងក្នុងព័ត៌មាន បើទោះស្ថាប័នបានលុប ឬដកព័ត៌មាននោះវិញក៏ដោយ ក៏គួរតែមានការកែតម្រូវ និងពន្យល់ទៅសាធារណជន ដើម្បីកុំឱ្យមានការភ័ន្តច្រឡំបន្តទៀត ព្រមទាំងបង្ហាញនូវគំរូផងដែរ។
លោកថា៖ «អាពេលបង្ហោះហ្នឹង មិនដឹងថាគាត់បាន clarify and verify [បញ្ជាក់ និងផ្ទៀងផ្ទាត់] ហើយនៅ? បានជាដកបាត់! ហើយនេះជាការបង្កើតចម្ងល់សង្ស័យទៅដល់អ្នកអាន អ្នកមើល តទៅទៀតដែរ។ វាអាចឱ្យមានការ confuse [ភ័ន្តច្រឡំ] […] យើងនៅស្ថាប័នព័ត៌មានមួយ យើងផ្សាយព័ត៌មានដែលមិនពិត បង្កឱ្យមានភាពចលាចល។ ឧទាហរណ៍ ប្រជាពលរដ្ឋដូចខ្ញុំ ខ្ញុំទុកចិត្តទៅលើ Website [គេហទំព័រ] ណាមួយ ខ្ញុំមើលតាមដាន Website ហ្នឹង។ ប៉ុន្តែបើ Website ហ្នឹងគាត់ដាក់ហើយដកៗ ថ្ងៃក្រោយខ្ញុំនឹងអស់សេចក្តីទុកចិត្តទៅលើបណ្តាញព័ត៌មានហ្នឹង។ អ៊ីចឹងវាប៉ះពាល់ទៅដល់អ្នកអាន ហើយនិងព័ត៌មានទៅដល់សង្គម ជាពិសេសរឿងរ៉ាវដែលធំៗ វាអាចបង្កភាពចលាចលបានដែរ»។
លោក ថាច់ សេដ្ឋា ជាអ្នកនយោបាយមានដើមកំណើតខ្មែរកម្ពុជាក្រោម ត្រូវបានសមត្ថកិច្ចចាប់ខ្លួននៅម្តុំវត្តសំរោងអណ្តែត ខណ្ឌសែនសុខ រាជធានីភ្នំពេញ កាលពីល្ងាចថ្ងៃទី១៦ ខែមករា ឆ្នាំ២០២៣។ ក្រោយចាប់ខ្លួន អនុប្រធានគណបក្សភ្លើងទៀនរូបនេះ ត្រូវបានគេបញ្ជូនទៅឃុំខ្លួនបណ្ដោះអាសន្នភ្លាមៗនៅពន្ធនាគារព្រៃស ក្រោមការចោទប្រកាន់ ពីបទ «មិនបានបំពេញកាតព្វកិច្ចចំពោះឧបករណ៍អាចជួញដូរបាន» ឬហៅថា ការចេញសែកដោយគ្មានសាច់ប្រាក់ ចំនួន៥សន្លឹក ទៅឱ្យក្រុមហ៊ុន រិន ឆាយ ផនសប ដែលប្រព្រឹត្តតាំងពីឆ្នាំ២០១៩។
ករណីនេះ គណបក្សភ្លើងទៀន បានចេញសេចក្តីថ្លែងការណ៍មួយ ដោយចាត់ទុកការចាប់និងឃុំខ្លួនលោក ថាច់ សេដ្ឋា ថាជារឿងនយោបាយ និងជារូបភាពគំរាមកំហែង ដើម្បីបំបាក់ស្មារតីប្រជាពលរដ្ឋមិនឱ្យចូលរួមសកម្មភាពនយោបាយជាមួយគណបក្សភ្លើងទៀន។
តែយ៉ាងណា ស្ថាប័នអយ្យការនៃសាលាដំបូងរាជធានីភ្នំពេញ បានបញ្ជាក់ជំហរនៃការចាប់ខ្លួនអនុប្រធានគណបក្សភ្លើងទៀននេះ ថាអនុវត្តតាមដីកាបង្គាប់ឱ្យនាំខ្លួនរបស់ចៅក្រមស៊ើបសួរ ខណៈលោក ថាច់ សេដ្ឋា ខកខានមិនបានចូលខ្លួនបំភ្លឺតាមដីកាបង្គាប់ឱ្យចូលខ្លួនចំនួន២លើក តាំងពីចុងខែកុម្ភៈ ឆ្នាំ២០២១ មក។
លោកនាយករដ្ឋមន្ត្រី ហ៊ុន សែន ក្នុងជំនួបជាមួយអ្នកសារព័ត៌មានលើកទី៥ នៅល្ងាចថ្ងៃទី១៤ ខែមករា ឆ្នាំ២០២៣នេះ បានប្រាប់ឱ្យក្រសួង-ស្ថាប័ន និងអ្នកសារព័ត៌មាន រួមគ្នាទប់ស្កាត់ព័ត៌មានក្លែងក្លាយឱ្យកាន់តែសកម្មថែមទៀត ដោយថា ព័ត៌មានមិនពិត និងព័ត៌មានក្លែងក្លាយ អាចបង្កភាពចលាចល អស្ថិរភាពនយោបាយ អសន្ដិសុខសង្គម។
លោកថ្លែងថា៖ «បន្ដចូលរួមប្រយុទ្ធប្រឆាំងព័ត៌មានមិនពិត និងព័ត៌មានក្លែងក្លាយ ទាំងក្នុងក្របខណ្ឌជាតិ និងអន្ដរជាតិ ដែលបច្ចុប្បន្នតំណាងសារព័ត៌មានរបស់យើង ក៏មានក្នុងក្របខណ្ឌស្ថាប័នជាតិអាស៊ាន ដែលតម្រូវឱ្យស្ថាប័នព័ត៌មានរបស់យើងធ្វើការប្រយុទ្ធប្រឆាំងព័ត៌មានមិនពិត និងព័ត៌មានក្លែងក្លាយ ឱ្យកាន់តែសកម្មថែមទៀត ព្រោះព័ត៌មានមិនពិត និងព័ត៌មានក្លែងក្លាយ ជាផ្នែកចិត្ដសាស្ដ្រ ដែលធ្វើឱ្យសង្គមមានភាពចលាចល អស្ថិរភាពនយោបាយ អសន្ដិសុខសង្គម និងកើតមានអរិភាពជាមួយនឹងបរទេស»៕
