សាលាដំបូងរាជធានីភ្នំពេញ បានផ្ដន្ទាទោសអ្នកវិភាគនយោបាយ លោក គឹម សុខ ឱ្យជាប់ពន្ធនាគារ ១៨ខែ និងសងជំងឺចិត្តជាង ១ម៉ឺនដុល្លារ ទៅរដ្ឋាភិបាលដែលដឹកនាំដោយគណបក្សប្រជាជនកម្ពុជាជាដើមបណ្តឹង ក្រោមបទចោទប្រកាន់ «ញុះញង់ និងបរិហារកេរ្តិ៍» ពាក់ព័ន្ធការធ្វើអត្ថាធិប្បាយរឿងសម្លាប់លោកបណ្ឌិត កែម ឡី។
ការសម្រេចនៅថ្ងៃពុធនេះ បន្ទាប់ពីចៅក្រមសាលាដំបូងរាជធានីភ្នំពេញ លោក សេង សុជាតិ បានបើកសវនាការលើសំណុំរឿងនេះកាលពីថ្ងៃទី៥ ខែធ្នូ ឆ្នាំ២០២២ ដែលមានលោក គី តិច មេធាវីតំណាងដោយអាណត្តិឱ្យលោកនាយករដ្ឋមន្ត្រី ហ៊ុន សែន ប្តឹងទៅលោក គឹម សុខ។ ក្នុងពាក្យបណ្ដឹងនោះ មេធាវីដើមបណ្តឹង ដោយប្តឹងទៅតុលាការឱ្យផ្តន្ទាទោសលោក គឹម សុខ និងទារសំណងជំងឺចិត្តចំនួន ១០០លានរៀល ឬ ស្មើប្រមាណ២៥ ០០០ដុល្លារ។
ចៅក្រមសាលាដំបូងរាជធានីភ្នំពេញ លោក សេង សុជាតិ នៅថ្ងៃពុធទី១៨ ខែមករា បានប្រកាសសាលក្រមកំបាំងមុខដោយផ្ដន្ទាទោសអ្នកវិភាគនយោបាយ លោក គឹម សុខ ដាក់ពន្ធនាគារ ១៨ខែ និងពិន័យប្រាក់ចំនួន៨ លានរៀលចូលថវិការដ្ឋ ពីបទ «ញុះញង់បង្កឱ្យមានភាពវឹកវរធ្ងន់ធ្ងរសន្តិសុខសង្គម និងបរិហារកេរ្តិ៍»។
លោក សេង សុជាតិ ក៏បានបង្គាប់ឱ្យសងជំងឺចិត្ត ៥០លានរៀលឬ ស្មើប្រមាណ១២ ៥០០ដុល្លារសហរដ្ឋអាមេរិក ទៅប្រមុខរដ្ឋាភិបាល និងបានចេញដីកាបង្គាប់ឱ្យសមត្ថកិច្ចចាប់និងឃុំខ្លួនលោក គឹម សុខ ផងដែរ។
សំណុំរឿង «ញុះញង់បង្កឱ្យមានភាពវឹកវរធ្ងន់ធ្ងរសន្តិសុខសង្គម និងបរិហារកេរ្តិ៍» ប្រព្រឹត្តនៅរាជធានីភ្នំពេញ កាលពីថ្ងៃទី១៣ ខែកុម្ភៈ ឆ្នាំ២០១៧ ទាក់ទិននឹងការផ្ដល់បទសម្ភាជាមួយវិទ្យុអាស៊ីសេរី រឿងឃាតកម្មលោកបណ្ឌិត កែម ឡី និងលោក ជា វិជ្ជា ជាដើម។
ចំពោះលោក គឹម សុខ មកដល់ពេលនេះ ធ្លាប់ត្រូវបានតុលាការផ្តន្ទាទោសដាក់ពន្ធនាគាររយៈពេល ១៨ខែ រួចមកហើយ ក្រោមបទចោទ «បរិហារកេរ្តិ៍ និងញុះញង់» នេះដែរ។ នៅក្នុងបទសម្ភាសទាំង២លើក ជាមួយវិទ្យុអាស៊ីសេរី កាលពីខែកុម្ភៈ ឆ្នាំ២០១៧ អ្នកវិភាគរូបនេះបានភ្ជាប់គណបក្សប្រជាជនកម្ពុជា និងលោកនាយករដ្ឋមន្រ្តី ហ៊ុន សែន ទៅនឹងអំពើឃាតកម្មលោកបណ្ឌិត កែម ឡី ដែលត្រូវបានឃាតកបាញ់សម្លាប់កាលពីខែកក្កដា ឆ្នាំ២០១៦៕