រដ្ឋមន្ត្រីក្រសួងមហាផ្ទៃ បញ្ជាទៅអាជ្ញាធរខេត្តសៀមរាប ត្រូវធ្វើការស្រាវជ្រាវ បង្ក្រាប និងចាត់វិធានការច្បាប់ ព្រមទាំងបញ្ជូនជនល្មើសទៅតុលាការឱ្យទាន់ពេលវេលា បើរកឃើញថាមានជាប់ពាក់ព័ន្ធនឹងការបំផ្លិចបំផ្លាញសម្បត្តិបេតិកភណ្ឌជាតិ។
ក្នុងពិធីសម្ពោធដាក់ឱ្យប្រើប្រាស់ជាផ្លូវការ «អគារអង្គភាពនគរបាលការពារបេតិកភណ្ឌប្រចាំតំបន់អង្គរ» នៅខេត្តសៀមរាប កាលពីថ្ងៃទី១៧ ខែមករា ឆ្នាំ២០២៣ រដ្ឋមន្ត្រីក្រសួងមហាផ្ទៃ លោក ស ខេង បានថ្លែងថា អាជ្ញាធរពាក់ព័ន្ធនៅខេត្តសៀមរាប ត្រូវសហការជាមួយអាជ្ញាធរជាតិអប្សរា រៀបចំកំណត់ទីតាំងឈរជើងការពារជាអាទិភាពជាថ្មី ចល័តយាមល្បាត និងពង្រឹងការឃ្លាំមើល ហើយមិនត្រូវអនុញ្ញាតឱ្យបុគ្គលិកទាំងឡាយដែលពុំមានភារកិច្ច និងគ្មានការអនុញ្ញាតពីអាជ្ញាធរជាតិអប្សរា ចូលទៅតាមចំណុចសំខាន់ៗនៃតំបន់រមណីយដ្ឋានអង្គរ និងតំបន់ផ្សេងទៀត ជាពិសេសនៅពេលយប់ ដែលនាំឱ្យមានភាពស្មុគស្មាញនៃបទល្មើសនានា។ ជាមួយគ្នានេះដែរ លោកក៏បានបញ្ជាទៅអាជ្ញាធរខេត្តសៀមរាប ត្រូវធ្វើការស្រាវជ្រាវរកវត្ថុតាង បង្ក្រាប និងបញ្ជូនជនល្មើសដែលបំផ្លិចបំផ្លាញសម្បត្តិបេតិកភណ្ឌជាតិ ទៅតុលាការ ដើម្បីចាត់វិធានការច្បាប់។
លោក ស ខេង បានថ្លែងថា៖ «អាជ្ញាធរខេត្តសៀមរាប និងអង្គភាពនគរបាលការពារបេតិកភណ្ឌ គប្បីបន្តសហការជិតស្និទ្ធជាមួយអាជ្ញាធរជាតិអប្សរា ក្នុងកិច្ចការថែរក្សាការពារបេតិកភណ្ឌជាតិ ពិសេសកិច្ចការស្រាវជ្រាវ និងអនុវត្តវិធានការបង្ការ ទប់ស្កាត់ និងបង្ក្រាបអំពើខុសច្បាប់ ការបំផ្លិចបំផ្លាញ ការជីកកកាយវត្ថុបុរាណ ការកាប់បំផ្លាញព្រៃឈើ ការលួចប្លន់ ការទិញលក់ ការដឹកជញ្ជូន ដោយបញ្ជូនជនល្មើស និងវត្ថុតាង ទៅតុលាការចាត់វិធានការតាមច្បាប់»។
រដ្ឋមន្ត្រីក្រសួងមហាផ្ទៃ ក៏បានណែនាំទៅអង្គភាពនគរបាលការពារបេតិកភណ្ឌ បង្កើនការអប់រំ និងពង្រឹងសីលធម៌ វិន័យកងកម្លាំង និងមនសិការវិជ្ជាជីវៈ ស្រឡាញ់បេតិកភណ្ឌ វប្បធម៌ជាតិ សំដៅបង្ការនិងកាត់បន្ថយការចូលរួមប្រព្រឹត្តអំពើអនាធិបតេយ្យនានានៅក្នុងតំបន់រមណីយដ្ឋានអង្គរ ដូចជា ការបោះទីតាំងស្នាក់នៅ ទីកន្លែងធ្វើអាជីវកម្ម និងសកម្មភាពទាំងឡាយណាដែលបម្រើផលប្រយោជន៍ផ្ទាល់ខ្លួន និងមិនបានសុំការអនុវត្តស្របច្បាប់ពីអាជ្ញាធរជាតិអប្សរា។
បន្ថែមពីនេះ លោកបានណែនាំអង្គភាពនគរបាលការពារបេតិកភណ្ឌ បន្តពង្រឹងកិច្ចសហការជាមួយសមត្ថកិច្ច និងអាជ្ញាធរដែនដី ក្នុងកិច្ចការពារសន្តិសុខ និងរបៀបរៀបរយសាធារណៈ ជាពិសេសកិច្ចការពារសុវត្ថិភាព សន្តិសុខភ្ញៀវជាតិ និងអន្តរជាតិដែលមកបំពេញបេសកកម្ម និងទស្សនកិច្ចនៅតំបន់អង្គរ និងតំបន់ផ្សេងទៀត ហើយអាជ្ញាធរខេត្តសៀមរាប អាជ្ញាធរជាតិអប្សរា ព្រមទាំងអង្គភាពនគរបាលការរបេតិកភណ្ឌ ត្រូវខិតខំថែរក្សាបរិស្ថានធម្មជាតិ ដែលជាផ្នែកមួយនៃទេសភាពវប្បធម៌របស់រមណីយដ្ឋានអង្គរ។
អ្នកនាំពាក្យរដ្ឋបាលខេត្តសៀមរាប លោក លី សំរិទ្ធ បានបង្ហាញការគាំទ្រនឹងបទបញ្ជាបន្ថែមរបស់រដ្ឋមន្ត្រីក្រសួងមហាផ្ទៃ ខណៈលោកថា បច្ចុប្បន្ននេះ ពួកគាត់បានសហការគ្នាយ៉ាងល្អ ក្នុងការបង្ការ បង្ក្រាប និងទប់ស្កាត់បទល្មើសជាហូរហែ រួមមាន បទល្មើសគ្រឿងញៀន ល្បែងស៊ីសង ការកាប់ឈើ និងបទល្មើសលួចវត្ថុបុរាណ ជាដើម ដើម្បីការពារសណ្តាប់ធ្នាប់សាធារណៈជូនប្រជាពលរដ្ឋ និងភ្ញៀវទេសចរនៅតំបន់នោះផងដែរ។
លោកមានប្រសាសន៍ថា៖ «កាលពីមិ្សលមិញនេះ សម្តេចក្រឡាហោម បានបញ្ជាក់បន្ថែម ត្រូវយកចិត្តទុកដាក់បន្ថែមទៀត ប៉ុន្តែនៅក្នុងតំបន់អង្គរនេះ វាមានក្រុមសមត្ថកិច្ចនៅទីនេះ ដូចជាមាននគរបាលទេសចរណ៍ មាននគរបាលការពារបេតិកភណ្ឌ និងនគរបាលខេត្ត រួមគ្នា សហការគ្នា ដើម្បីអនុវត្តភារកិច្ចឱ្យបានល្អប្រសើរ ឱ្យមានប្រសិទ្ធភាព»។
លោកបន្ថែមថា៖ «នៅក្នុងភូមិសាស្ត្រសៀមរាបយើងនេះ បទល្មើសមិនមានច្រើនទេ ព្រោះយើងធ្វើការងារសន្តិសុខច្រើនណាស់នៅក្នុងតំបន់ហ្នឹង ព្រោះខេត្តសៀមរាបជាខេត្តទេសចរណ៍មួយសំខាន់ណាស់។ បើសិនជាបទល្មើសចេះតែកើតឡើងញឹកញាប់ យើងមិនអាចធានាឱ្យមានការទាក់ទាញភ្ញៀវទេសចរឱ្យមកកម្សាន្តបានទេ។ អ៊ីចឹងហើយបានរបាយការណ៍ តួលេខប្រចាំឆ្នាំ ប្រចាំខែ ប្រចាំត្រីមាស មិនសូវឆ្លុះបញ្ចាំងឃើញមានបទល្មើសកើតច្រើនទេ»។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា សង្កេតឃើញថា បទល្មើសដែលកើតឡើងកន្លងមក ភាគច្រើនមិនត្រូវបានចាត់វិធានការលើជនល្មើសតាមច្បាប់នោះទេ ដោយសារជនដែលប្រព្រឹត្តជាអ្នកមានលុយមានអំណាច និងមានការប្រកាន់បក្ខពួកនិយម ជាដើម។ ករណីនេះ លោកជំរុញទៅអាជ្ញាធរពាក់ព័ន្ធពង្រឹងការអនុវត្តច្បាប់ឱ្យមានតម្លាភាព ដោយមិនប្រកាន់បក្ខពួក ទើបកាត់បន្ថយបទល្មើសទាំងនេះបាន។
លោកមានប្រសាសន៍ថា៖ «បើសិនជាមានការអនុវត្តច្បាប់ដោយតឹងរ៉ឹង ហើយមានភាពច្បាស់លាស់យ៉ាងនេះ យើងជឿជាក់ថា បទល្មើសទាំងអស់នេះនឹងមានការកាត់បន្ថយ ហើយមិនមានកើតមានឡើងបន្តទៀតបានទេ»៕