ប្រធានាធិបតីស៊ែប៊ី លោក Aleksander Vucic បានឱ្យដឹងថា ប្រទេសរុស្ស៊ីគួរតែបញ្ឈប់កិច្ចខិតខំប្រឹងប្រែងនានារបស់ខ្លួន ក្នុងការជ្រើសរើសជនជាតិស៊ែប៊ី ដើម្បីចូលរួមប្រយុទ្ធជាមួយក្រុមហ៊ុនយោធាឯកជន Wagner Group នៅក្នុងប្រទេសអ៊ុយក្រែន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៧ ខែមករា ឆ្នាំ២០២៣។
ការស្នើដោយប្រធានាធិបតីរូបនេះត្រូវបានធ្វើឡើង ខណៈរូបលោកបានរិះគន់គេហទំព័រ និងក្រុមប្រព័ន្ធផ្សព្វផ្សាយសង្គមមួយចំនួនរបស់រុស្ស៊ី ចំពោះការផ្សព្វផ្សាយជាភាសាស៊ែប៊ី ដោយក្នុងនោះ អង្គភាពយោធាឯកជន Wagner បានបន្តអូសទាញអ្នកស្ម័គ្រចិត្តឱ្យចូលរួមក្នុងក្រុមរបស់ពួកគេ។
ថ្លែងឱ្យដឹងតាមរយៈការចេញផ្សាយមួយដោយទូរទស្សន៍ក្នុងស្រុក លោកប្រធានាធិបតី Aleksander Vucic បានលើកឡើងថា៖ «ហេតុអ្វីបានជាអ្នកដែលមកពីក្រុម Wagner បន្តអូសទាញពលរដ្ឋពីប្រទេសស៊ែប៊ី [ចូលរួមជាមួយសង្គ្រាមនៅអ៊ុយក្រែន]? ខណៈអ្នកដឹងហើយថា សកម្មភាពនេះផ្ទុយនឹងបទប្បញ្ញត្តិរបស់យើង។»
ជាមួយគ្នានេះ លោក Aleksander Vucic ក៏បានបដិសេធការចោទប្រកាន់នានាដែលថា ក្រុម Wagner មានវត្តមាននៅក្នុងប្រទេសស៊ែប៊ី ដើម្បីរៀបចំគម្រោងឈ្លានពានអ៊ុយក្រែនចេញពីប្រទេសរបស់លោកផងដែរ។
គួរបញ្ជាក់ថា ប្រទេសស៊ែប៊ី គឺជាបេក្ខភាពមួយដែលនឹងត្រូវចូលរួមជាមួយសហភាពអឺរ៉ុប ដែលជាដៃគូពាណិជ្ជកម្ម និងវិនិយោគិនដ៏សំខាន់របស់ខ្លួន។ ទោះជាយ៉ាងណា ប្រទេសមួយនេះក៏រក្សាកិច្ចសហប្រតិបត្តិការពាណិជ្ជកម្ម និងយោធាជាមួយរុស្ស៊ីផងដែរ ខណៈខ្លួនគឺពឹងផ្អែកទាំងស្រុងលើការនាំចូលឧស្ម័នពីប្រទេសរុស្ស៊ី។
បើទោះបីជាស៊ែប៊ី បានថ្កោលទោសម្តងហើយម្តងទៀតចំពោះការឈ្លានពានរបស់រុស្ស៊ីលើអ៊ុយក្រែន នៅឯអង្គការសហប្រជាជាតិ និងវេទិកាអន្តរជាតិមួយចំនួនទៀតយ៉ាងណាក្ដី ប៉ុន្តែប្រទេសមួយនេះគិតរហូតមកដល់ពេលបច្ចុប្បន្ន នៅមិនទាន់ឃើញមានដាក់ជាទណ្ឌកម្មណាមួយប្រឆាំងនឹងប្រទេសរុស្ស៊ីនោះទេ៕