រដ្ឋាភិបាលវៀតណាម បានឱ្យដឹងនៅថ្ងៃអង្គារម្សិលមិញថា លោកប្រធានាធិបតី ង្វៀន សួនហ៊្វុក (Nguyen Xuan Phuc) បានលាលែងចេញពីតំណែង បន្ទាប់ពីគណបក្សកុម្មុយនីស្តវៀតណាម (Communist Party) ដែលកំពុងកាន់អំណាច បានស្តីបន្ទោសរូបលោកទាក់ទងនឹងការបំពាន និងការប្រព្រឹត្តខុសដោយមន្ត្រីនៅក្រោមការគ្រប់គ្រងរបស់លោក។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៧ ខែមករា ឆ្នាំ២០២៣។
ការប្រកាសចុះចេញពីតំណែងដោយប្រធានាធិបតីវៀតណាមនេះ ក៏កើតឡើងស្របពេលដែលវៀតណាមកំពុងតែបង្កើនការបង្ក្រាបអំពើពុករលួយនៅក្នុងប្រទេសផងដែរ។
លោក ង្វៀន សួនហ៊្វុក ដែលធ្លាប់ជាអតីតនាយករដ្ឋមន្ត្រីវៀតណាមផងដែរនោះ បានកាន់តំណែងជាប្រធានាធិបតីវៀតណាម គិតចាប់តាំងពីឆ្នាំ២០២១ ខណៈលោកក៏ជាមន្ត្រីជាន់ខ្ពស់បំផុត ដែលត្រូវបានកំណត់គោលដៅក្នុងការបង្ក្រាបអំពើពុករលួយដ៏ខ្លាំងក្លារបស់គណបក្ស។
យោងតាមការឱ្យដឹងពីរដ្ឋាភិបាល លោក ង្វៀន សួនហ៊្វុក ដែលបច្ចុប្បន្នមានវ័យ៦៨ឆ្នាំ មានការទទួលខុសត្រូវចំពោះបទល្មើសដែលប្រព្រឹត្តដោយមន្ត្រីជាច្រើន រួមទាំងឧបនាយករដ្ឋមន្ត្រី ២រូប និងរដ្ឋមន្ត្រី ៣រូបផ្សេងទៀតផងដែរ។
ថ្លែងឱ្យដឹងនៅក្នុងសេចក្តីថ្លែងការណ៍ ប្រភពដដែលបន្ថែមថា៖ «ដោយមានការយល់ដឹងយ៉ាងពេញលេញអំពីទំនួលខុសត្រូវរបស់ខ្លួននៅចំពោះមុខគណបក្ស និងប្រជាជន លោក [Nguyen Xuan Phuc] បានដាក់ពាក្យសុំលាលែងដើម្បីបញ្ចប់មុខតំណែងបច្ចុប្បន្ន ហើយចូលនិវត្តន៍»។
ទាក់ទិននឹងករណីនេះ ការិយាល័យរបស់លោក ង្វៀន សួនហ៊្វុក មិនអាចទាក់ទងបានភ្លាមៗដើម្បីសុំការអត្ថាធិប្បាយបានទេ ខណៈតំណែងប្រធានាធិបតីថ្មីក៏មិនទាន់ត្រូវបានបញ្ជាក់ផងដែរ។
ស្ថិតក្នុងយុទ្ធនាការបង្ក្រាបអំពើពុករលួយដ៏ខ្លាំងក្លានៅក្នុងប្រទេស រដ្ឋសភាវៀតណាម កាលពីពេលថ្មីៗនេះ ក៏បានបោះឆ្នោតដកឧបនាយករដ្ឋមន្ត្រី ២រូប ដែលរួមមានលោក Pham Binh Minh និង Vu Duc Dam ចេញពីមុខតំណែងរបស់ពួកគេផងដែរ៕
