សាលាដំបូងរាជធានីភ្នំពេញ មិនអនុញ្ញាតឱ្យមេដឹកនាំសហជីព កញ្ញា ឈឹម ស៊ីថរ នៅក្រៅឃុំបណ្ដោះអាសន្ន ទោះបីជាក្រុមមេធាវី លើកសំអាងថា ការចាប់និងឃុំខ្លួនកូនក្ដីរបស់ខ្លួនជាថ្មីនេះ ជាការបំពាន និងអនុវត្តលើសនីតិវិធីច្បាប់។
ការសម្រេចនេះធ្វើឡើងបន្ទាប់ពីសាលាដំបូងរាជធានីភ្នំពេញ នៅថ្ងៃនេះ បានបើកសវនាការលើបណ្ដឹងសុំនៅក្រៅឃុំរបស់ក្រុមមេធាវីការពារក្ដីឱ្យកញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ និងបានសម្រេចប្រកាសសាលក្រមភ្លាមៗនៅថ្ងៃដដែលនេះ។
ចៅក្រមជំនុំជម្រះសាលាដំបូងរាជធានីភ្នំពេញ លោកស្រី សឿង ចរិយា បានប្រកាសសាលក្រមភ្លាមៗ ដោយមិនអនុញ្ញាតឱ្យកញ្ញា ឈឹម ស៊ីថរ នៅក្រៅឃុំបណ្ដោះអាសន្ននោះទេ ហើយក៏មិនបានបញ្ជាក់ពីមូលហេតុនៃការសម្រេចនេះដែរ។
ប៉ុន្តែអំឡុងពេលសវនាការ លោកស្រី សឿង ចរិយា ជម្រាបនៅក្នុងអង្គសវនាការថា តុលាការបានបញ្ជូនដីកាដោះលែង និងដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការ ទៅប្រធានពន្ធនាគារ ហើយខាងពន្ធនាគារក៏ទទួលបាន ព្រមទាំងយកឱ្យកញ្ញា ឈឹម ស៊ីថរ និងអ្នកផ្សេងផ្ដិតមេដៃទៀតផង។
លោកស្រីបញ្ជាក់ថា តុលាការបានអនុវត្តត្រឹមត្រូវហើយ មិនមែនផ្ទុយពីនីតិវិធីដូចការលើកឡើងរបស់ក្រុមមេធាវីនោះទេ ខណៈតំណាងអយ្យការ លោក សេង ហៀង នៅតែអះអាងថា កញ្ញា ឈឹម ស៊ីថរ បំពានបម្រាមតុលាការ ហើយការចាប់ខ្លួន និងឃុំខ្លួនជាថ្មីនេះ ជាឆន្ទានុសិទ្ធិរបស់តុលាការ។
ប្រាប់អ្នកសារព័ត៌មានវីអូឌី បន្ទាប់ពីស្ដាប់ការប្រកាសសាលក្រមរួច កញ្ញា ឈឹម ស៊ីថរ ចាត់ទុកការកាត់ក្ដីរបស់តុលាការ ដែលមិនឱ្យកញ្ញាក្រៅឃុំថាជារឿងអយុត្តិធម៌។
កញ្ញាថា៖ «ការកាត់ក្ដីខ្ញុំ [មិនឱ្យនៅក្រៅឃុំ] វាជារឿងអយុត្តិធម៌ ហើយការកាត់ក្ដីនេះ វាជាការបិទបាំងកំហុសខ្លួនឯង»។
កញ្ញា ស៊ីថរ បញ្ជាក់អំឡុងពេលសវនាការថា កញ្ញា និងសហការី ដែលត្រូវបានដោះលែងឱ្យនៅក្រៅឃុំ កាលពីខែមីនា ឆ្នាំ២០២២ មិនបានទទួលដីកាដាក់ឱ្យស្ថិតនៅក្រោមការត្រួតពិនិត្យរបស់តុលាការឡើយ។ កញ្ញាបញ្ជាក់ថា ពួកគាត់ទទួលបាន និងផ្ដិតមេដៃ តែលិខិតដោះលែងឱ្យនៅក្រៅឃុំបណ្ដោះអាសន្នមួយសន្លឹកតែប៉ុណ្ណោះ។
កញ្ញា ស៊ីថរ បន្តថា ចាប់តាំងពីដោះលែង សមត្ថកិច្ចក៏មិនដែលហៅកញ្ញាទៅបង្ហាញខ្លួន និងប្រាប់ពីដីកាដាក់ឱ្យស្ថិតក្រោមការត្រួតពិនិត្យដែរ ហើយការចេញទៅក្រៅប្រទេសនេះ មិនមែនជាលើកទី១ទេ ដោយកញ្ញាបានចេញទៅ ចំនួន៣ដង ក្នុងនោះ ទៅប្រទេសថៃ បាន២ដង និងទី៣ ទៅប្រទេសអូស្ត្រាលី។
កញ្ញាបន្តថា៖ «ខ្ញុំបានផ្ដិតមេដៃតែ[លើ]ដីកាដោះលែងមួយសន្លឹក ហើយបងប្អូនដែលចេញពីពន្ធនាគារជាមួយខ្ញុំផ្សេងទៀត ពួកគាត់ទទួលបានដូចខ្ញុំដែរ។ ខ្ញុំមិនបានទទួលដំណឹង និងដីកាដាក់ឱ្យស្ថិតក្រោមការត្រួតពិនិត្យ ហើយក៏មិនបានផ្ដិតមេដៃ»។
មិនត្រឹមតែកញ្ញា ឈឹម ស៊ីថរ ទេដែលបានអះអាងបែបនេះ មេធាវីការពារក្ដីឱ្យកញ្ញាទាំង៣រូប ក៏បានជម្រាបទៅអង្គសវនាការថា សូម្បីពួកគាត់ក៏មិនបានទទួលសេចក្ដីជូនដំណឹង និងដីកាពីតុលាការដែរ។
លើសពីនេះ លោកស្រី សាម សុគន្ធា ដែលជាមេធាវីការពារក្តីឱ្យកញ្ញា ឈឹម ស៊ីថរ បានបញ្ជាក់ថា នៅពេលឃាត់ខ្លួនកូនក្ដីនៅព្រលានយន្តហោះ បន្ទាប់ពីត្រលប់មកពីប្រទេសអូស្ត្រាលី តុលាការក៏មិនបានជូនដំណឹងទៅក្រុមមេធាវីដែរ។
លោកស្រីបន្តថា ការចេញទៅក្រៅប្រទេសនេះមិនមែនជាកំហុសកូនក្ដីរបស់ពួកគាត់ទេ ដូច្នេះការចាប់ឃុំខ្លួនកូនក្ដីជាថ្មី ក្រោមការចោទថាបំពានបម្រាមតុលាការនោះ ជារឿងមិនត្រឹមត្រូវ និងអនុវត្តផ្ទុយពីមាត្រាច្បាប់នៃក្រមនីតិវិធីព្រហ្មទណ្ឌ។
ស្របពេលដែលតុលាការបើកសវនាការនាថ្ងៃនេះ ក្រុមកូដករណាហ្គាវើលដ៍ ក៏បាននាំគ្នាទៅប្រមូលផ្ដុំនៅខាងមុខសាលាដំបូងរាជធានីភ្នំពេញ ដើម្បីលើកទឹកដល់កញ្ញា ឈឹម ស៊ីថរ និងទាមទារឱ្យដោះលែង ហើយទម្លាក់បទចោទប្រកាន់លើកញ្ញា ឈឹម ស៊ីថរ ព្រមទាំងអ្នកផ្សេងៗទៀតផងដែរ។ ក្រៅពីនោះ ក៏មានក្រុមអង្គការសង្គមស៊ីវិលជាតិ និងតំណាងស្ថានទូតអាមេរិក និងអូស្ត្រាលី ជាដើម បានចូលឃ្លាំមើលផងដែរ។
នាយកកិច្ចការទូទៅអង្គការការពារសិទ្ធិមនុស្សលីកាដូ លោក អំ សំអាត បង្ហាញការសោកស្ដាយចំពោះការសម្រេចរបស់តុលាការ បើទោះបីជាមេធាវី និងកញ្ញា ឈឹម ស៊ីថរ មានអំណះអំណាងគ្រប់គ្រាន់ក៏ដោយ។
លោកថា៖ «សរុបមកវិញ បើសិនជាកញ្ញា ឈឹម ស៊ីថរ និងមេធាវីបានទទួលនៃដីកាដាក់ឱ្យស្ថិតនៅក្រោមការត្រួតពិនិត្យរបស់តុលាការ ប្រហែលជាមិនមានការឃុំខ្លួនកញ្ញា ឈឹម ស៊ីថរ ជាថ្មីទេ ព្រោះកញ្ញាមិនអាចចាកចេញទៅក្រៅប្រទេសបានទេ ដោយគោរពលក្ខខណ្ឌតុលាការ»។
កញ្ញា ឈឹម ស៊ីថរ ត្រូវបានចាប់ខ្លួន និងចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋ» បន្ទាប់ពីកញ្ញា និងសមាជិកសហជីពផ្សេងទៀត ចេញទាមទាររកដំណោះស្រាយវិវាទការងារនៅក្រុមហ៊ុនណាហ្គាវើលដ៍។
កញ្ញា និងសមាជិកសហជីពផ្សេងទៀត ត្រូវបានដោះលែងឱ្យនៅក្រៅឃុំកាលពីខែមីនា ឆ្នាំ២០២២ ប៉ុន្តែបើតាមក្រុមមេធាវីការពារក្ដីកញ្ញា ឈឹម ស៊ីថរ និងសមាជិកសហជីពផ្សេងទៀត អះអាងថា ពួកគាត់មិនបានទទួលការជូនដំណឹង និងដីកាដាក់ឱ្យស្ថិតក្រោមការត្រួតពិនិត្យតាមផ្លូវតុលាការឡើយ។
កាលពីថ្ងៃទី២៦ ខែវិច្ឆិកា ឆ្នាំ២០២២ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួននិងបញ្ជូនទៅឃុំខ្លួននៅពន្ធនាគារព្រៃស រាជធានីភ្នំពេញ ក្រោមហេតុផលថា ល្មើសបម្រាម ឬគេចវេះពីការត្រួតពិនិត្យរបស់តុលាការ ក្រោយពេលកញ្ញាបានធ្វើដំណើរត្រលប់មកពីប្រជុំនៅប្រទេសអូស្ត្រាលីវិញ៕