នាយករដ្ឋមន្ត្រីនូវែលសេឡង់ លោកស្រី ចាស៊ីនដា អាឌើន (Jacinda Ardern) នៅថ្ងៃព្រហស្បតិ៍នេះ បានធ្វើសេចក្តីប្រកាសដ៏គួរឱ្យភ្ញាក់ផ្អើលមួយ ដោយថា ខ្លួនមិនអាចបន្តដឹកនាំប្រទេសទៀតទេ ហើយនឹងចុះចេញពីតំណែងនៅដើមខែកុម្ភៈខាងមុខនេះ ដោយនឹងមិនឈរឈ្មោះបោះឆ្នោតសាជាថ្មីផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី១៩ ខែមករា ឆ្នាំ២០២៣។
លោកស្រីបន្តថា វាគឺជាការតានតឹងមួយក្នុងរយៈពេល៥ឆ្នាំកន្លងមកនេះ ក្នុងនាមជានាយករដ្ឋមន្ត្រី ហើយវាគឺជារឿងចាំបាច់ដែលលោកស្រីត្រូវតែចុះចេញពីតំណែង ដើម្បីផ្ដល់ឱកាសឱ្យអ្នកដទៃដែលមានសមត្ថភាពជាងនេះ។
ថ្លែងប្រាប់សន្និសីទសារព័ត៌មានមួយ នាយករដ្ឋមន្ត្រីនូវែលសេឡង់វ័យ ៤២ឆ្នាំ រូបនេះ បន្ថែមថា៖ «សម្រាប់រដូវក្តៅនេះ ខ្ញុំសង្ឃឹមថានឹងអាចរកវិធីដើម្បីបន្តដឹកនាំមួយអាណត្តិទៀត ប៉ុន្តែខ្ញុំមិនអាចធ្វើវាបាននោះទេ»។
លោកស្រី ចាស៊ីនដា អាឌើន បន្តថា៖ «ខ្ញុំដឹងថា វានឹងមានការពិភាក្សាជាច្រើនបន្ទាប់ពីការសម្រេចចិត្តនេះ។ អ្នកនយោបាយក៏ជាមនុស្សផងដែរ។ យើងផ្តល់នូវរាល់អ្វីៗទាំងអស់ដែលយើងអាចធ្វើបាន។ ទោះជាយ៉ាងណា សម្រាប់ខ្ញុំ គឺវាដល់ពេលហើយ»។
ទាក់ទងនឹងការប្រកាសចុះចេញពីតំណែងរបស់នាយករដ្ឋមន្ត្រីនេះដែរ គណបក្ស New Zealand Labour Party ដែលកំពុងតែកាន់អំណាច ក៏នឹងធ្វើការបោះឆ្នោតរើសមេដឹកនាំថ្មីរបស់ខ្លួននៅថ្ងៃអាទិត្យខាងមុខនេះ ខណៈការបោះឆ្នោតទូទៅនឹងធ្វើឡើងនៅក្នុងខែតុលាឆ្នាំនេះ។
ជាមួយគ្នានេះ លោកស្រី ចាស៊ីនដា អាឌើន ក៏បានបន្ថែមដោយបង្ហាញជាការជឿជាក់ថា គណបក្សនេះនឹងបន្តឈ្នះការបោះឆ្នោតនាពេលខាងមុខនេះផងដែរ៕
