ស្នងការដ្ឋាននគរបាលខេត្តកណ្ដាល បានច្រានចោលចំពោះការផ្សាយ ដែលថា មន្ត្រីនគរបាលចរាចរណ៍ខេត្តកណ្ដាល ទទួលសំណូកពីម្ចាស់រថយន្តឈ្នួលដែលដឹកលើសចំណុះ ជាថ្នូរនឹងការមិនចាត់វិធានការតាមច្បាប់ចរាចរណ៍ និងថាមិនមានការគំរាមកំហែងណាមួយទៅលើអ្នកសារព័ត៌មានពលរដ្ឋ ឱ្យលុបរូបថត និងវីដេអូនោះទេ។
ការលើកឡើងរបស់ស្នងការដ្ឋាននគរបាលខេត្តកណ្ដាល បានធ្វើឡើងក្រោយពីសារព័ត៌មានវីអូឌី បានផ្សព្វផ្សាយព័ត៌មាន ដែលមានចំណងជើងថា «អ្នកសារព័ត៌មានពលរដ្ឋម្នាក់រងការគំរាមចាប់ខ្លួន ក្រោយថតសកម្មភាពប៉ូលិសចរាចរណ៍យកលុយពីឡានឈ្នួលល្មើសច្បាប់» ដែលការផ្សព្វផ្សាយនោះបានធ្វើឡើងតាំងពីអំឡុងខែមេសា ឆ្នា២០២២។
កាលពីថ្ងៃទី១២ ខែមេសា ឆ្នា២០២២ អ្នកសារព័ត៌មានពលរដ្ឋម្នាក់ លោក សួន វុត្ថា បានអះអាងប្រាប់វីអូឌីថា មន្ត្រីនគរបាលស្រុកលើកដែក ខេត្តកណ្ដាល បានគំរាមចាប់ខ្លួនរូបគាត់បញ្ជូនទៅតុលាការ បើសិនជាគាត់មិនលុបរូបភាព និងវីដេអូ ដែលថតពីសកម្មភាពមន្ត្រីនគរបាលទាំងនោះយកលុយពីម្ចាស់រថយន្តឈ្នួល ជាថ្នូរនឹងការអនុញ្ញាតឱ្យដឹកលើសចំណុះ។
តែយ៉ាងណា យោងតាមលិខិតរបស់ស្នងការដ្ឋាននគរបាលខេត្តកណ្តាល ផ្ញើជូនអគ្គនាយកសារព័ត៌មានវីអូឌី នៅថ្ងៃទី១៦ ខែមករា ឆ្នាំ២០២៣ បានលើកឡើងថា តាមរយៈរបាយការណ៍បំភ្លឺរបស់នាយរងការិយាល័យនគរបាលចរាចរណ៍ផ្លូវគោក លោក ខៀវ ប៊ុនធឿន គឺនៅថ្ងៃទី១១ ខែមេសា ឆ្នាំ២០២២ រូបលោកបានដឹកនាំកម្លាំងចំនួន១១នាក់ ចុះរឹតបន្តឹងការអនុវត្តច្បាប់ចរាចរណ៍ផ្លូវគោក លើកំណាត់ផ្លូវជាតិលេខ១ ត្រង់ចំណុចក្បាលជ្រោយ ឃុំកំពង់ភ្នំ ស្រុកលើកដែក ខេត្តកណ្ដាល។
ប្រភពដដែលបន្តថា ក្នុងអំឡុងពេលអនុវត្តនោះ កម្លាំងនគរបាលចរាចរណ៍បានឃាត់រថយន្តមួយគ្រឿងដែលបានផ្ទុកអ្នកដំណើរពេញ ព្រមទាំងមានអ្នកអង្គុយនៅកៅអីខាងមុខផ្នែកខាងស្ដាំ ២នាក់ មិនពាក់ខ្សែក្រវាត់ការពារសុវត្ថិភាព ដោយសមត្ថកិច្ចបានអញ្ជើញអ្នកបើកបរមកធ្វើការអប់រំ។
ប្រភពដដែលបន្តទៀតថា ស្របពេលនោះ ក៏មានឈ្មោះ សួន វុត្ថា បានយកទូរសព្ទថតសមត្ថកិច្ចលើដងផ្លូវដែលកំពុងអនុវត្តការងារ ដោយពុំបានសុំការអនុញ្ញាត និងមិនដឹងថាថតក្នុងគោលបំណងអ្វីនោះឡើយ ទើបមន្ត្រីនគរបាលចរាចរណ៍ លោក ខៀវ ប៊ុនធឿន បានហៅឈ្មោះ សួន វុត្ថា ទៅជួប ដើម្បីពន្យល់គាត់ស្តីពីការថតរូបនៅគោលដៅត្រួតពិនិត្យ និងស្នើឱ្យលុបរូបថតនិងវីដេអូចេញ ដើម្បីចៀសវាងការផ្សព្វផ្សាយព័ត៌មានមិនពិតណាមួយ។
លិខិតបញ្ជាក់ថា៖ «បន្ទាប់ពីមន្ត្រីនគរបាលចរាចរណ៍ធ្វើការអ់រំទៅលើម្ចាស់រថយន្តឈ្នួលរួចមក លោក សួន វុត្ថា បានយល់ព្រមលុបរូបភាពចេញពីទូរសព្ទរបស់ខ្លួនដោយស្ម័គ្រចិត្ត និងបានធ្វើកិច្ចសន្យាដោយរូបលោកសរសេរផ្ទាល់ដៃថែមទៀតផង។ ចំពោះរថយន្តខាងលើ សមត្ថកិច្ចមិនបានធ្វើការផាកពិន័យនោះទេ គ្រាន់តែធ្វើការអប់រំលើកទី១ ទៅលើអ្នកបើកបរ ឱ្យពាក់ខ្សែក្រវាត់សុវត្ថិភាពទាំងអ្នករួមដំណើរ មិនត្រូវផ្ទុកអ្នកដំណើរលើសចំណុះ ឬទំនិញសំពីងសំពោងនោះឡើយ»។
ទោះជាយ៉ាងណា អ្នកនាំពាក្យក្រសួងព័ត៌មាន លោក ផុស សុវណ្ណ ធ្លាប់មានប្រសាសន៍នៅថ្ងៃទី១២ ខែមេសា ឆ្នាំ២០២២នោះថា មិនថាតែអ្នកសារព័ត៌មាន ឬពលរដ្ឋ សុទ្ធតែអាចថតរូប ឬវីដេអូនៅតាមទីសាធារណៈបាន លើកលែងតែកន្លែងឯកជន ឬចំណុចដែលកើតហេតុអ្វីមួយ ដែលត្រូវបានព័ទ្ធខ្សែដោយសមត្ថកិច្ច ដើម្បីដោះស្រាយបញ្ហាសំខាន់កុំឱ្យបាត់ភស្តុតាង ជាដើម។
យ៉ាងណា លោកថា ករណីមន្ត្រីចរាចរណ៍ឱ្យអ្នកសារព័ត៌មានពលរដ្ឋលុបរូបថត និងវីដេអូ និងគំរាមបញ្ជូនទៅតុលាការនោះ ជាការបំពេញលើសពីតួនាទីភារកិច្ចរបស់ខ្លួន ដោយបំពានតួនាទីអ្នកសារព័ត៌មាន។
លោកថា៖ «ខាងសមត្ថកិច្ចហ្នឹង គាត់ធ្វើលើសពីសិទ្ធិសមត្ថកិច្ចរបស់គាត់ហើយ។ គិតថាហ្នឹងជាសិទ្ធិរបស់យើង មិនអីទេ! អ្នកណាក៏ដោយ ពលរដ្ឋយើងទាំងអស់មានសិទ្ធិតើ! បើនៅលើផ្លូវសាធារណៈ [អាចថតបាន]។ អ៊ីចឹងរឿងហ្នឹងមិនមែនទើបឥឡូវណា! វាមានយូរណាស់ហើយ! អ៊ីចឹងវាមានមន្ត្រីល្អ និងមន្ត្រីមិនល្អ។ អ៊ីចឹងមន្ត្រីល្អដែលគាត់កំពុងគោរពតាមគោលការណ៍ គោរពតាមច្បាប់ ថតអីថតទៅ គាត់អត់មានខ្លាចអីទេ»៕
