រដ្ឋមន្ត្រីការបរទេសរុស្ស៊ី លោក ស៊ែហ្គេយ៍ ឡាវរ៉ូវ (Sergey Lavrov) បានឱ្យដឹងនៅថ្ងៃពុធម្សិលមិញថា សហរដ្ឋអាមេរិកកំពុងតែព្យាយាមគ្រប់គ្រងឥទ្ធិពលទាំងរុស្ស៊ី និងចិន ដោយមានការជួយជ្រោមជ្រែងពីប្រទេសដទៃទៀត ប៉ុន្តែប្រទេសទាំងពីរបានដឹងពីសកម្មភាពទាំងនេះមុនរួចទៅហើយ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៨ ខែមករា ឆ្នាំ២០២៣។
ថ្លែងប្រាប់សន្និសីទសារព័ត៌មានមួយ រដ្ឋមន្ត្រីការបរទេសរុស្ស៊ី បានលើកឡើងថា លោកខាងលិចបានមើលឃើញប្រទេសទាំងពីរនេះថាជាការគំរាមកំហែងមួយ។
ទោះជាយ៉ាងណា លោកបន្ថែមថា អាមេរិកមិនមានអំណាចគ្រប់គ្រាន់ ដើម្បីបន្ថយឥទ្ធិពលប្រទេសទាំងពីរនេះក្នុងពេលតែមួយបាននោះទេ ដូច្នេះហើយបានជាពួកគេព្យាយាមកៀរគរអឺរ៉ុប ជប៉ុន និងប្រទេសផ្សេងទៀតឱ្យចូលរួមជាមួយខ្លួន។
លោកបានឱ្យដឹងទៀតថា លោកខាងលិច ក៏កំពុងតែព្យាយាមជំរុញឱ្យមានជម្លោះរវាងរុស្ស៊ី និងចិនផងដែរ។
លោកថា៖ «លោកខាងលិចកំពុងតែព្យាយាមបង្កើតឱ្យមានជាភាពមិនចុះសម្រុងក្នុងទំនាក់ទំនងរបស់យើង។ ទោះជាយ៉ាងណា យើងនិងប្រទេសចិនបានមើលឃើញពីសកម្មភាពទាំងនេះអស់ទៅហើយ»។
ការលើកឡើងដោយរដ្ឋមន្ត្រីការបរទេសរុស្ស៊ីរូបនេះ ហាក់គូសបញ្ជាក់អំពីសារៈសំខាន់ជាយុទ្ធសាស្ត្រចំពោះទីក្រុងមូស្គូ នៃទំនាក់ទំនងរបស់ខ្លួនជាមួយប្រទេសចិន ខណៈកងទ័ពរបស់ខ្លួនកំពុងតែប្រយុទ្ធក្នុងប្រទេសអ៊ុយក្រែន ហើយស្របពេលដែលទំនាក់ទំនងសេដ្ឋកិច្ចរបស់ខ្លួនជាមួយលោកខាងលិច ក៏ត្រូវបានបំផ្លាញដោយកញ្ចប់នៃទណ្ឌកម្មជាបន្តបន្ទាប់ផងដែរ។
គិតចាប់តាំងពីរុស្ស៊ីបានឈ្លានពានលើអ៊ុយក្រែន កាលពីខែកុម្ភៈឆ្នាំមុនមក ប្រទេសមួយនេះបានព្យាយាមបង្កើនទំនាក់ទំនងទាំងផ្នែកនយោបាយ សន្តិសុខ និងសេដ្ឋកិច្ចរបស់ខ្លួនជាមួយនឹងប្រទេសចិន ខណៈខ្លួនមើលឃើញថា ប្រធានាធិបតីចិន លោក ស៊ី ជីនពីង គឺជាសម្ពន្ធមិត្តដ៏សំខាន់មួយក្នុងការប្រឆាំងនឹងលោកខាងលិច។
ទោះជាយ៉ាងណា ប្រធានាធិបតីសហរដ្ឋអាមេរិក លោក ចូ បៃឌិន កាលពីពេលកន្លងទៅ ក៏ធ្លាប់បានព្រមានលោកប្រធានាធិបតី ស៊ី ជីនពីង អំពីផលវិបាកដែលចិនអាចនឹងទទួលបានផងដែរ ប្រសិនបើប្រទេសមួយនេះផ្ដល់ការគាំទ្រណាមួយដើម្បីជួយឱ្យរុស្ស៊ីរួចផុតពីផលប៉ះពាល់នៃទណ្ឌកម្មរបស់លោកខាងលិច ឬផ្តល់ជំនួយផ្នែកយោធាជាដើមនោះ៕