ក្រោយការព្រមានមិនឱ្យនិយាយពីប្រវត្តិបក្សប្រជាជន យុវជននិងអ្នកឃ្លាំមើលថាប្រវត្តិសាស្ត្រជាឫសគល់នៃការពិតដោយមិនអាចបិទបាំងបានយូរ

លោកនាយករដ្ឋមន្ត្រី ហ៊ុន សែន ដើរក្នុងពិធីអបអរសាទរខួបលើកទី៤៤ នៃថ្ងៃជ័យជម្នះ ៧មករា នៅព្រឹកថ្ងៃទី៧ ខែមករា ឆ្នាំ២០២៣ នាមជ្ឈមណ្ឌលកោះពេជ្រ រាជធានីភ្នំពេញ។ (ហ្វេសប៊ុកលោក ហ៊ុន សែន)

យុវជន និងអ្នកឃ្លាំមើល លើកឡើងថា ទោះជារដ្ឋាភិបាលចាត់វិធានការលើមេដឹកនាំបក្សប្រឆាំង ដោយមិនឱ្យនិយាយប្រវត្តិគណបក្សប្រជាជនកម្ពុជាក្ដី ប៉ុន្តែរឿងប្រវត្តិសាស្ត្រនេះ វាជាឫសគល់នៃការពិត ដោយលាក់បាំងមិនបានយូរឡើយ។

ការលើកឡើងនេះ បន្ទាប់ពីលោក ហ៊ុន សែន បានថ្លែងកាលពីម្សិលមិញថា ទោះបីជាគណបក្សប្រជាជនកម្ពុជាមានប្រវត្តិមកពីណាក៏ដោយ គណបក្សភ្លើងទៀនមិនអាចមកនិយាយធ្វើឱ្យប៉ះពាល់ដល់សេចក្ដីថ្លៃថ្នូរគណបក្សប្រជាជនកម្ពុជាបានឡើយ។ លោកព្រមានជាថ្មី ដោយចាត់វិធានការច្បាប់ បើសិនមិនបញ្ឈប់និយាយពីប្រវត្តិគណបក្សប្រជាជនកម្ពុជា។

លោកថា៖ «ទោះបីគណបក្សប្រជាជនកម្ពុជា មានប្រវត្តិមកពីត្រង់ណាក៏ដោយ អត់ត្រូវមកប៉ះពាល់នូវកិត្តិយស និងសេចក្ដីថ្លែថ្នូរគណបក្សប្រជាជនទេ។ អ្នកឯងហ៊ានសាកមើល៍! ខ្ញុំនឹងធ្វើឱ្យអ្នកឯងមើល៍! ខ្ញុំមិនដែលទៅប៉ះពាល់ដល់បក្សអ្នក​ឯងណា! ហេតុអីបានអ្នក​ឯងមកប៉ះពាល់គណបក្សប្រជាជន? សូម្បីតែប្រវត្តិគណបក្សប្រជាជនកម្ពុជាកើតពីត្រង់អីត្រង់ណា អ្នកឯងមកថ្កោលទោស អ្នកឯងស្គាល់លទ្ធិប្រជាធិបតេយ្យគ្រប់គ្រាន់នៅ?»

សកម្មជនបរិស្ថាន កញ្ញា ភួន កែវរស្មី យល់ថា វិធានការលើថ្នាក់ដឹកនាំគណបក្សភ្លើងទៀនដែលគ្រាន់តែនិយាយរឿងប្រវត្តិគណបក្សកាន់អំណាច វាហាក់បង្ហាញឱ្យឃើញថា គណបក្សប្រជាជនកម្ពុជាកំពុងមានការភ័យខ្លាចរឿងប្រវត្តិសាស្ត្រ។

កញ្ញាសង្កេតឃើញថា វិធានការនេះ វាបានប៉ះពាល់ធ្ងន់ធ្ងរលើសិទ្ធិសេរីភាពបញ្ចេញមតិ ជាពិសេសនឹងធ្វើឱ្យអ្នកដឹងអំពីប្រវត្តិសាស្ត្រ និងរឿងដែលកើតឡើងក្នុងសង្គមបច្ចុប្បន្ន លែងហ៊ាននិយាយ និងបញ្ចេញមតិ។  

កញ្ញាថា៖ «កូនខ្មែរឬយុវជនជំនាន់ហ្នឹង គាត់ក៏កំពុងធ្វើការសិក្សាទៅលើប្រវត្តិសាស្ត្រ​ពីមុន មិនត្រឹមតែ “៧មករា” គាត់ក៏កំពុងអានសៀវភៅប្រវត្តិសាស្ត្រតាំងពីសម័យអង្គរ តាំងពីមុនសម័យអង្គរ ហ្វូណន ឬក៏ចេនឡា​ អីទាំងអស់! គាត់ក៏កំពុងសិក្សាធ្វើការងារលើរឿងហ្នឹង។ ខ្ញុំជឿថា គ្មានអ្នកណាមកកាឡៃការពិតបានទេ។ ប្រហែលជាអ្នកមួយចំនួនអាចសរសេរ​ប្រវត្តិសាស្ត្របំផ្លើសបំភ្លៃ អ្នកខ្លះអាចសរសេរលាងគូថខ្លួនឯង យកមុខយកមាត់សម្រាប់ក្រុមបក្ខពួក ប៉ុន្តែការពិតនៅតែជាការពិតអ៊ីចឹង»។

ប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ បានលើកឡើងដែរថា រឿងប្រវត្តិសាស្ត្រ វាសំខាន់ ដែលគ្រប់ភាគីត្រូវតែដឹង និងលើកឡើង ដើម្បីបង្ហាញទៅអ្នកដែលចូលធ្វើនយោបាយ ឬប្រជាពលរដ្ឋ​។​ លោកចាត់ទុកការលើកយករឿងប្រវត្តិសាស្ត្រ​មកនិយាយនោះថាជារឿងធម្មតា ប៉ុន្តែបើរឿងនោះមិនពិតទេ គណបក្សនយោបាយរងការចោទប្រកាន់ មានសិទ្ធិបដិសេធ ដើម្បីបង្ហាញពីភាពស្អាតស្អំរបស់ខ្លួន ជាជាងប្រើប្រាស់វិធានការប្ដឹងផ្ដល់ និងចាប់ខ្លួនបែបនេះ។

លោកបន្តថា ប្រសិនមិនឱ្យយុវជនរម្លឹក និងដឹងពីប្រវត្តិសាស្ត្រទេ វានឹងធ្វើឱ្យស្មារតីមនសិការ យុវជនជំនាន់ក្រោយថយចុះ ដោយសារពួកគេមិនដឹងអំពីប្រវត្តិពីមុនមក ដែលអាចធ្វើឱ្យពួកគេដើរជាន់ដានចាស់ ជាពិសេសពីការដឹកនាំប្រទេស។ លើសពីនេះ វាក៏ធ្វើឱ្យយុវជនបែកបាក់សាមគ្គី ដោយការប្រកាន់បក្ខពួកផងដែរ។

លោកថា៖ «កាលណាយុវជនអត់ចាប់អារម្មណ៍រឿងប្រវត្តិសាស្ត្រទៀត វានឹងធ្វើឱ្យបាត់បង់មនសិការជាតិ ជាពិសេសធ្វើឱ្យយុវជនខ្លាចរអា ឱ្យតែនិយាយដល់រឿងប្រវត្តិគណបក្សប្រជាជនកម្ពុជាអីមួយ គឺអត់បានតែម្ដង! គឺភ័យ បារម្ភ គឺព្រួយបារម្ភ! ហើយធ្វើឱ្យយុវជនបាត់បង់មនសិការមួយក្នុងការស្វែងរកស្រាវជ្រាវប្រវត្តិសាស្ត្រក្នុងការជជែកវែកញែក»។

អ្នកប្រឹក្សាយោបល់ផ្នែកអភិវឌ្ឍន៍​ផ្នត់​គំនិត និង​ការ​ស្រាវ​ជ្រាវ លោក សេក សុជាតិ យល់ថា ក្រដាសមិនអាចខ្ចប់ភ្លើងបានឡើយ ហើយការពិតមិនអាចលាក់បាំងបានយូរទេ ដោយសារ បច្ចុប្បន្នប្រជាពលរដ្ឋ និងយុវជនភាគច្រើនបានសិក្សារៀនសូត្រចេះដឹងច្រើន។

លោកថា៖ «មានតែមនុស្សអត់បានសិក្សា​និងរៀនសូត្រ ទើបមិនដឹងអំពីប្រវត្តិសាស្ត្រ។ ​​យើងចាត់ទុកជាការពិត ហើយការពិត មិនអាចកុហកនរណាបានឡើយ។ អ៊ីចឹងយើងមិនចង់ជជែក​​អំពីបញ្ហាការរឹតត្បិតនៅក្នុងការជជែកអំពីប្រវត្តិសាស្ត្រហ្នឹង ព្រោះយើងដឹងហើយថា នៅកម្ពុជាគឺជាប្រទេសដែលបានលើកឡើងថា អ្នកឈ្នះជាអ្នកដែលសរសេរប្រវត្តិសាស្ត្រ បើយើងយោងប្រសាសន៍លោកនាយករដ្ឋមន្ត្រី ហ៊ុន សែន ដែលធ្លាប់បានលើកឡើងហ្នឹង»។

លោកបន្តថា រឿងប្រវត្តិសាស្ត្រជាឫសគល់នៃការពិត ដែលបង្ហាញរឿងអតីតកាល ឆ្លុះបញ្ចាំងពីបច្ចុប្បន្ន និងអនាគត ដូច្នេះបើសិនជាមានការរារាំង និងគំរាមកំហែង ឃាត់ខ្លួន ដោយមិនឱ្យនិយាយការពិតនោះ វាជាការបំបិទសេរីភាពក្នុងការសិក្សា អប់រំ ព្រមទាំងស្រាវជ្រាវផងដែរ។

លោកថា៖ «បើសិនជាមនុស្សមានការអប់រំ សិក្សាស្រាវជ្រាវ មិនអាចនិយាយការពិត ​អ៊ីចឹងការសិក្សាអប់រំរបស់យើង ​ក៏អត់មានតម្លៃដែរ។ អ៊ីចឹងសម្រាប់ខ្ញុំ​ យល់ថា វាគួរតែត្រូវបានបើកទូលាយ។ បើមិនបើកទូលាយទេ វានឹងធ្វើឱ្យផ្លូវចិត្តរបស់អ្នកសិក្សារៀនសូត្រ របស់បញ្ញវន្ត របស់យុវជន គឺនឹងត្រូវសាបសូន្យហើយ។ កាលណាសាបសូន្យ វានឹងទៅជាគ្រោះមួយដ៏ធំសម្រាប់ជាតិ និងប្រជាពលរដ្ឋនៅថ្ងៃអនាគត»៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ