សមាជិកសភាអឺរ៉ុប បានអនុម័តលើសេចក្ដីសម្រេចមួយនៅថ្ងៃព្រហស្បតិ៍ម្សិលមិញ ដោយអំពាវនាវឱ្យមានការដាក់ទណ្ឌកម្មបន្ថែមទៀត ប្រឆាំងនឹងបុគ្គល និងអង្គភាពទាំងឡាយរបស់អ៊ីរ៉ង់ ដែលមានការជាប់ពាក់ព័ន្ធនឹងការរំលោភសិទ្ធិមនុស្ស ខណៈខ្លួនក៏បានបោះឆ្នោតក្នុងការកំណត់ឆ្មាំបដិវត្តន៍អ៊ីរ៉ង់ជាក្រុមភេរវករមួយផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៩ ខែមករា ឆ្នាំ២០២៣។
ថ្លែងតាមរយៈសេចក្តីថ្លែងការណ៍មួយ សភាអឺរ៉ុបបានលើកឡើងថា៖ «អាជ្ញាធរអ៊ីរ៉ង់ត្រូវតែបញ្ចប់ការបង្ក្រាបលើពលរដ្ឋរបស់ពួកគេ ហើយក្នុងនោះ មេដឹកនាំកំពូលលោក Ali Khamenei និងលោកប្រធានាធិបតី Ebrahim Raisi ក៏គួរតែត្រូវបានដាក់បញ្ចូលទៅក្នុងបញ្ជីទណ្ឌកម្មផងដែរ»។
សេចក្តីសម្រេចដែលត្រូវបានអនុម័តនេះ បន្តថា៖ «ការមិនយកចិត្តទុកដាក់របស់របបអ៊ីរ៉ង់ ចំពោះសេចក្តីថ្លៃថ្នូររបស់មនុស្ស និងសេចក្តីប្រាថ្នាក្នុងការចង់បានប្រជាធិបតេយ្យរបស់ប្រជាពលរដ្ឋខ្លួន ក៏ដូចជាការគាំទ្ររបស់ខ្លួនចំពោះប្រទេសរុស្ស៊ី គឺតម្រូវឱ្យសហភាពអឺរ៉ុបត្រូវផ្លាស់ប្ដូរជំហររបស់ខ្លួនបន្ថែមទៀតចំពោះអ៊ីរ៉ង់»។
គួរបញ្ជាក់ថា សភាអឺរ៉ុប កាលពីថ្ងៃពុធកន្លងទៅ ក៏បានបានអំពាវនាវឱ្យសហភាពអឺរ៉ុបដាក់ឆ្មាំបដិវត្តន៍អ៊ីរ៉ង់ទៅក្នុងបញ្ជីអង្គការភេរវករ ដោយបានលើកឡើងពីករណីគាបសង្កត់បាតុករក្នុងតំបន់ និងការផ្គត់ផ្គង់យន្តហោះគ្មានមនុស្សបើកដល់យោធារុស្ស៊ី សម្រាប់ប្រើប្រាស់ក្នុងប្រទេសអ៊ុយក្រែន។
ទោះជាយ៉ាងណា អ៊ីរ៉ង់បានព្រមានថា សហភាពអឺរ៉ុប គឺនឹងធ្វើឱ្យស្ថានការណ៍កាន់តែធ្ងន់ធ្ងរ ប្រសិនបើខ្លួនចាត់ទុកអង្គភាពឆ្មាំបដិវត្តន៍អ៊ីរ៉ង់ជាក្រុមភេរវករ។
ប្រទេសអ៊ីរ៉ង់ ក្នុងប៉ុន្មានរយៈពេលចុងក្រោយនេះ ត្រូវបានសង្កេតឃើញថាមានការកើតឡើងនូវការតវ៉ាជាបន្តបន្ទាប់ ពោលគឺចាប់តាំងពីមានករណីរបស់ស្ត្រីអ៊ីរ៉ង់មួយរូប ឈ្មោះ Mahsa Amini អាយុ២២ឆ្នាំ ដែលបានស្លាប់កាលពីខែកញ្ញា ឆ្នាំមុន បន្ទាប់ពីត្រូវបានឃុំខ្លួនដោយនគរបាលផ្នែកសីលធម៌របស់ប្រទេស ក្នុងបទចោទប្រកាន់នៃការស្លៀកពាក់មិនសមរម្យ ទៅតាមការចែងរបស់ច្បាប់សាសនាអ៊ីស្លាម។
យោងតាមអង្គការលើកលែងទោសអន្តរជាតិ (Amnesty International) បានលើកឡើងថា អាជ្ញាធរអ៊ីរ៉ង់ក៏ព្យាយាមស្វែងរកការកាត់ទោសប្រហារជីវិតលើមនុស្សមួយចំនួន ក្នុងគោលបំណងដើម្បីបំភិតបំភ័យដល់អ្នកដែលចូលរួមក្នុងការបះបោរក្នុងប្រទេសផងដែរ៕
