សហជីព និងកម្មករនៅតាមបណ្ដារោងចក្រកាត់ដេរសម្លៀកបំពាក់ និងផលិតស្បែកជើងមួយចំនួនបានអះអាងថា រោងចក្រដែលពួកគេធ្វើការខ្លះបានព្យួរការងារកម្មករ និងខ្លះទៀតបានបិទទ្វារតែម្តង នៅដើមឆ្នាំ២០២៣នេះ។
សហជីព និងជាកម្មករនៅរោងចក្រ ឌីនហាន ក្នុងសង្កាត់ស្ទឹងមានជ័យ លោក ឡុង សក្កដា បានឱ្យដឹងថា នៅពេលនេះ កម្មករនៅរោងចក្រដែលលោកធ្វើការចំនួន១ ១៧០នាក់ ត្រូវបានព្យួរការងារក្នុងរយៈពេលត្រឹមតែ៣ខែចុងក្រោយនេះ នឹងឈានទៅដល់ការបិទទ្វារទាំងស្រុងនៅដើមខែកុម្ភៈខាងមុខនេះ។
លោក ឡុង សក្កដា បន្តថា សម្លៀកបំពាក់មួយចំនួននៃរោងចក្រនេះផលិតបាន ត្រូវបានដឹកទៅកាន់ប្រទេសវៀតណាមរួចទៅហើយ ហើយលោកសន្និដ្ឋានថា រោងចក្រ ឌីនហាន នេះនឹងត្រូវបើកដំណើរការនៅប្រទេសវៀតណាមវិញ ខណៈដែលកម្មករដែលបាត់បង់ការងារកំពុងស្ថិតក្រោមស្ថានភាពលំបាកជាខ្លាំង។
លោកថា៖ «វាពិបាកដែរ សម្លៀកបំពាក់ខ្លះចេញជាប់ពន្ធជាប់អ៊ីចឹងទៅ គេបញ្ជូនក្រណាត់ទៅវៀតណាម៤ម៉ឺនឯណោះ ក្រណាត់ដែលដេរនៅនេះ។ អ៊ីចឹងអាចថានៅយើងកាត់ពន្ធ នៅគេអត់កាត់ពន្ធទៅ គេបញ្ជូនទៅនោះ»។
លោកថា៖ «វាប៉ះពាល់ធំដល់កម្មករ សេដ្ឋកិច្ចគ្រួសាររបស់គាត់ សេចក្ដីសុខក្នុងគ្រួសារ ពេលខ្លះអត់លុយ អ៊ីចឹងឈ្លោះគ្នា បែកបាក់គ្នាអ៊ីចឹងទៅ។ អនាគតកូន គាត់រៀនសូត្រអី តែគាត់ខ្វះលុយ កូនគាត់ក៏ពិបាក»។
បុរសម្នាក់ដែលកម្មករអះអាងថាជាតំណាងក្រុមហ៊ុន ឌីន ហាន ហើយនៅពេលដែលអ្នកសារព័ត៌មាន វីអូឌី ទាក់ទងទៅ បានឆ្លើយតបយ៉ាងខ្លីថា រោងចក្រលោកពិតជាមានករណីព្យួរការងារបុគ្គលិកពិតមែន ហើយលោកថា ខាងក្រុមហ៊ុនក៏កំពុងដោះស្រាយបញ្ហាផងដែរ។
លោកបញ្ជាក់ថា៖ «ហ្នឹងហើយបង! ចាំមើលខ្ញុំដោះស្រាយជាមួយខាងក្រសួងសិន»។
អនុប្រធានសហជីពនៅរោងចក្រ T&K ក្នុងសង្កាត់ពោធិ៍សែនជ័យ លោក សោម ពិសី បានឱ្យដឹងថា រោងចក្របានសម្រេចព្យួរការងារចំនួនពីរដងចាប់ពីដើមឆ្នាំនេះ ដោយលើកទី១ ចាប់ពីខែមករា ដល់ខែកុម្ភៈ ដែលចំនួនកម្មករត្រូវព្យួរការងារមានចំនួន៦០០នាក់ និងចាប់ពីខែមីនា ដល់ខែមេសា នឹងត្រូវព្យួរចំនួន៣០០នាក់បន្ថែមទៀត។
លោក សោម ពិសី ថាក្នុងរយៈពេលនៃការព្យួរការងារនេះ កម្មករម្នាក់ត្រូវទទួលបានប្រាក់ខែត្រឹមតែ២៧ដុល្លារក្នុងមួយខែ ជាហេតុធ្វើឱ្យស្ថានភាពសេដ្ឋកិច្ចគ្រួសារកាន់តែលំបាក។
លោកថា៖ «លំបាកៗគ្រប់យ៉ាង និយាយរួមទៅ ២៧រៀល [ដុល្លារ] ហ្នឹង យើងជាកម្មករ អត់មានអីត្រូវគ្រាន់ទេ ព្រោះសូម្បីតែផ្ទះជួល៥០រៀល [ដុល្លារ] បាត់ហើយ ហើយ២៧រៀល [ដុល្លារ]យកមកធ្វើអី? ប៉ុន្តែបើអ៊ីចឹងត្រូវធ្វើម៉េចបង! និយាយទៅលំបាកច្រើន ប្រាក់ខែយើងមួយរយជាង ចាយមិនគ្រាន់! ទម្រាំព្យួរការងារទៀត កាន់តែលំបាក»។
វីអូឌី មិនអាចសុំការឆ្លើយតបពីអ្នកនាំពាក្យក្រសួងការងារ លោក ហេង សួរ បានទេ នៅថ្ងៃសុក្រនេះ។
ប្រធានសហភាពការងារកម្ពុជា លោក អាត់ ធន់ ថាសហជីពដែលធ្វើការជាមួយលោកនៅក្នុងរោងចក្រប្រមាណ១០០ បានឱ្យដឹងថា មានរោងចក្រចំនួន១០បានបិទទ្វារ រោងចក្រចំនួន២០ បានព្យួរការងារកម្មករ និងប្រមាណ៦០រោងចក្រផ្សេងទៀតបានកាត់បន្ថយបុគ្គលិក។
លោកថា៖ «ស្គាល់សហជីពជិតមួយរយក្រុមហ៊ុន ដែលជាសមាជិករបស់ផ្នែកពួកយើង ប្រហែលជា១០ទៅ២០ភាគរយហើយ។ ហើយជិត១០ភាគរយដែលបានបិទ។ ក្រុមហ៊ុនដែលអត់មានការងារធ្វើ មាន៦០ទៅ៧០ភាគរយ»។
លោកថា មានហេតុផលមួយចំនួនដែលធ្វើឱ្យរោងចក្រកាត់ដេរសម្លៀកបំពាក់ និងផលិតស្បែកជើង ព្យួរការងារកម្មករ កាត់បន្ថយបុគ្គលិក ឬឈានដល់ការបិទរោងចក្រ ក្នុងនោះក៏រួមមានទាំងការមិនប្រគល់ឡើងវិញនូវប្រព័ន្ធអនុគ្រោះពន្ធ GSP របស់សហរដ្ឋអាមេរិក ដែលបានផ្អាកតាំងពីឆ្នាំ២០២០ និងការបាត់បង់ ២០% នៃប្រព័ន្ធអនុគ្រោះពន្ធ EBA របស់សហភាពអឺរ៉ុប។
ទោះជាយ៉ាងណា ប្រធានសហជីពរូបនេះថា ការកាត់បន្ថយកម្មករនៅតាមរោងចក្រនេះក៏ជាប់ពាក់ព័ន្ធទៅនឹងការរាតត្បាតជំងឺកូវីដ-១៩ និងសង្រ្គាមរវាងប្រទេសរុស្ស៊ី និងអ៊ុយក្រែនផងដែរ៕