កម្លាំងកងរាជអាវុធហត្ថខេត្តឧត្តរមានជ័យ បានឃាត់ខ្លួនមនុស្សម្នាក់សួរនាំពាក់ព័ន្ធរឿងក្លែងឯកសណ្ឋានអាវុធហត្ថ និងឯកសារសាធារណៈ រួមទាំងរឹបអូសបានវត្ថុតាងមួយចំនួន ដើម្បីបន្តតាមនីតិវិធីច្បាប់។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បានឱ្យវីអូឌីដឹងនៅថ្ងៃអាទិត្យថា កាលពីល្ងាចថ្ងៃទី១៨ ខែមករា ឆ្នាំ២០២៣ ក្រុមការងារជំនាញបង្ក្រាបបទល្មើសនៅកងរាជអាវុធហត្ថខេត្តឧត្តរមានជ័យ បានឃាត់ខ្លួនឈ្មោះ សរ លីហ៊ាង ភេទប្រុស អាយុ៣៧ឆ្នាំ មានទីលំនៅ ភូមិល្វាក្រោម ឃុំស្ដៅ ស្រុកកងមាស ខេត្តកំពង់ចាម សួរនាំពាក់ព័ន្ទបទក្លែងឯកសណ្ឋានអាវុធហត្ថ និងក្លែងឯកសារសាធារណៈ រួមទាំងវត្ថុតាងមួយចំនួនទៀត។
លោកមានប្រសាសន៍ថា៖ «ឥឡូវនេះកម្លាំងជំនាញកំពុងធ្វើការងារជាក់ស្តែង។ ចាំយើងអនុវត្តនីតិវីធីចប់សិន ហើយករណីនេះយើងកំពុងស៊ើបអង្កេត។ អ៊ីចឹងយើងមិនអាចឆ្លើយលម្អិតបានទេ ចាំមើលតិចសិន»។
វត្ថុតាងដែលរឹបអូសបានរួមមាន សំបុត្របញ្ជាក់កំណើតចំនួន ១ច្បាប់ ,អាវអាវុធហត្ថត្រេអ៊ីដៃវែង ចំនួន១
,ខោអាវុធហត្ថប្រយុទ្ធ ចំនួន ១ កំប្លេ ,ខោអាវុធហត្ថត្រេអ៊ី ចំនួន ០១ ,អាវយឺត អ.ហ ដៃវែង ចំនួន ២ , ស្បែកជើងកវែង ចំនួន ០១គូរ ព្រមទាំងសម្ភារៈនិងឯកសារមួយចំនួនទៀត។
នៅពេលសួរថា តើកងកម្លាំងរាជអាវុធហត្ថនិងបញ្ជូនជនសង្ស័យទៅតុលាការនៅថ្ងៃណា? លោកបង្វែរសំណួរឱ្យសួរទៅតំណាងអយ្យការខេត្តឧត្តរមានជ័យវិញ។
អ្នកនាំពាក្យសាលាដំបូងខេត្តឧត្តរមានជ័យ លោក ប៉េង ម៉េងគ័ង មានប្រសាសន៍ថា លោកទើបតែទទួលបានព័ត៌មានបឋមថា កម្លាំងកងរាជអាវុធហត្ថខេត្តបានសួរនាំជនសង្ស័យម្នាក់ពាក់ព័ន្ធរឿងក្លែងឯកសណ្ឋានអាវុធហត្ថ ខណៈកន្លងកម្លាំងមិនទាន់បញ្ជូនសំណុំរឿងនេះមកតុលាការ ដើម្បីចាត់វិធានការច្បាប់បន្តនៅឡើយ។
លោកមានប្រសាសាន៍ថា៖ «ជាក់ស្តែងខ្ញុំមិនទាន់ទទួលបានសំណុំរឿងនេះបញ្ជូនមកតុលាការនៅឡើយ ព្រោះកម្លាំងប៉េអឹមជាម្ចាស់ករណី ប្រហែលជាគាត់ស្នើសុំស្រាវជ្រាវបន្ថែមសិន ព្រោះថាថ្ងៃកើតហេតុគាត់បានអញ្ជើញសាម៉ីខ្លួនមកបំភ្លឺហើយ»។
នាយកកិច្ចការទូទៅអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា កងកម្លាំងត្រូវស្រាវជ្រាវឱ្យបានគ្រប់ជ្រុងជ្រោយ និងមានតម្លាភាព មុននឹងចោទប្រកាន់លើជនសង្ស័យដែលក្លែងឯកសណ្ឋានអាវុធហត្ថ និងក្លែងឯកសារសាធារណៈ ដើម្បីជាគំរូល្អ កុំឱ្យមានអំពើល្មើសបែបនេះកើតឡើងបន្តទៀត នាំឱ្យប៉ះពាល់ដល់សណ្តាប់ធ្នាប់សង្គម និងប៉ះពាល់ដល់ស្ថាប័នសាម៉ី។
លោកមានប្រសាសន៍ថា៖ «ការចាត់វីធានការឱ្យមានតម្លាភាព សំខាន់ឯកសណ្ឋានទាក់ទិងនិងការលក់។ អ៊ីចឹងបើកន្លែងណាលក់ឯកសណ្ឋានកងកម្លាំងរាជអាវុធហត្ថខុសច្បាប់ ត្រូវចាត់វិធានការមុនគេ ដើម្បីទប់ស្កាត់ផងដែរក្នុងការអនុវត្ត ហើយផ្សព្វផ្សាយឱ្យប្រជាពលរដ្ឋឱ្យបានយល់»។
ក្នុងមាត្រា៦១២ នៃក្រមព្រហ្មទណ្ឌចែងថា បទប្រើប្រាស់ដោយខុសច្បាប់ នូវសម្លៀកបំពាក់ជាអាទិ៍ សម្រាប់អាជ្ញាធរសាធារណៈ ត្រូវផ្តន្ទាទោសដាក់ពន្ធនាគារពី១ខែ ទៅ១ឆ្នាំ និងពិន័យជាប្រាក់ពី១០ម៉ឺនរៀល ទៅ២លានរៀល ។ ចំណែក មាត្រា៦៣០នៃក្រមព្រហ្មទណ្ឌចែងថា បទប្រើប្រាស់ឯកសារសាធារណៈក្លែង ដែលមានចែងក្នុងមាត្រា ៦២៩ (បទក្លែងបន្លំឯកសារសាធារណៈ) នៃក្រមនេះ ត្រូវផ្តន្ទាទោសដាក់ពន្ធគារពី ២ឆ្នាំ ទៅ៥ឆ្នាំ និងពិន័យជាប្រាក់ពី ៤លានរៀល ទៅ១០លានរៀល៕