ដោយមានភាពចាំបាច់ រដ្ឋាភិបាលបានកាត់តំបន់មួយចំនួនពីខេត្តចំនួន៣ ដើម្បីពង្រីករដ្ឋបាលថ្នាក់ក្រោមជាតិបន្ថែមទៀត ក្នុងន័យដើម្បីជួយសម្រាលបន្ទុករបស់អាជ្ញាធរមូលដ្ឋាន ក្នុងពេលដែលគណបក្សភ្លើងទៀន បានប្រើប្រាស់សិទ្ធិតាមយន្តការតាមបែបប្រជាធិបតេយ្យ នៅថ្នាក់ក្រោមជាតិ ដោយបើកផ្លូវឱ្យមន្ត្រីនៅថ្នាក់មូលដ្ឋានរបស់ខ្លួនសម្រេចចិត្តជំនួសទីស្នាក់ការធំ ក្នុងពេលបោះឆ្នោតជ្រើសរើសសមាជិកក្រុមប្រឹក្សាស្រុក និងក្រុមប្រឹក្សាខណ្ឌ កាលពីពេលថ្មីៗនេះ។
លិខិតដែលចេញដោយគណៈកម្មាធិការជាតិរៀបចំការបោះឆ្នោត (គ.ជ.ប.) នៅថ្ងៃទី២៤ ខែមករានេះ បង្ហាញថា គណបក្សភ្លើងទៀន ដែលមានការិយាល័យកណ្តាលនៅរាជធានីភ្នំពេញ បានជូនដំណឹងមកស្ថាប័ន គ.ជ.ប. រួចហើយ អំពីលិខិតផ្ទេរសិទ្ធិឱ្យបក្សភ្លើងទៀននៅតាមស្រុកទាំង៣ ដែលទើបបង្កើតថ្មី ជាអ្នកធ្វើសេចក្តីសម្រេចចិត្តជំនួសការិយាល័យកណ្តាលគណបក្ស សម្រាប់ដំណើរការបោះឆ្នោតកន្លងទៅនេះ។
មិនតែប៉ុណ្ណោះ តាមរយៈសេចក្តីជូនដំណឹងរបស់ខ្លួន គ.ជ.ប. អំពាវនាវឱ្យគណៈកម្មការរៀបចំការបោះឆ្នោតខេត្តដែលពាក់ព័ន្ធ ត្រូវអនុវត្ត និងផ្សព្វផ្សាយឱ្យបានទូលំទូលាយដល់ក្រុមប្រឹក្សាឃុំសង្កាត់ ដើម្បីអនុវត្តការងារនេះឱ្យមានប្រសិទ្ធភាព។
ការចេញសេចក្តីសម្រេចរបស់ស្ថាប័ន គ.ជ.ប. នៅពេលនេះ ធ្វើឡើងក្រោយពីគណបក្សភ្លើងទៀន កាលពីថ្ងៃទី១៧ ខែមករា ឆ្នាំ២០២៣ កន្លងទៅ បានដាក់លិខិតទៅ (គ.ជ.ប.) ស្តីពីការជូនដំណឹងអំពីការផ្ទេរសិទ្ធិរបស់ប្រធានគណបក្សនយោបាយ ជូនតំណាង ដើម្បីចុះហត្ថលេខាលើពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត។
រដ្ឋាភិបាលបានចេញអនុក្រឹត្យចំនួន៤ ដាច់ដោយឡែកពីគ្នាក្នុងថ្ងៃតែមួយ កាលពីថ្ងៃទី២៣ ខែធ្នូ ឆ្នាំ២០២៣ ដោយបានបង្កើតក្រុងចំនួន៣ និងស្រុកចំនួន២បន្ថែមទៀត លើស្រុក និងក្រុង ដែលមានស្រាប់ក្នុងពេលបច្ចុប្បន្ន។
ក្រុងថ្មីដែលទើបបានបង្កើតឡើងនេះ គឺមានក្រុងអរិយក្សត្រ ដោយកាត់យកឃុំចំនួន៦ ពីស្រុកខ្សាច់កណ្តាល និងពីស្រុកល្វាឯម ចំនួន៥ឃុំ។ ចំណែកក្រុងថ្មីមួយទៀត គឺក្រុងសំពៅពូន ដែលស្ថិតនៅក្នុងភូមិសាស្រ្តខេត្តកណ្តាលដែរ គឺកាត់យកឃុំចំនួន៥ ចេញពីស្រុកកោះធំ។ ទន្ទឹមនឹងនេះ សម្រាប់ក្រុងឧដុង្គម៉ែជ័យ គឺយកចេញពីស្រុកឧដុង្គ ចំនួន៥ឃុំ នៃខេត្តកំពង់ស្ពឺ និងបានបំបែកស្រុកមួយថ្មីទៀត គឺស្រុកសាមគ្គីមុនីជ័យ ដែលបានកាត់យកឃុំចំនួន១០ ចេញពីស្រុកឧដុង្គ នៃខេត្តកំពង់ស្ពឺដែរ។
តាមរយៈអនុក្រឹត្យដដែលនេះ នៅមានស្រុកថ្មីមួយទៀតដែលទើបបានបង្កើតដែរ គឺស្រុកអូរគ្រៀងសែនជ័យ ដែលបានកាត់យកឃុំចំនួន៥ ចេញពីស្រុកសំបូរ នៃខេត្តក្រចេះ។
អនុប្រធានគណបក្សភ្លើងទៀន ប្រចាំខេត្តក្រចេះ លោក អឿ គឹមហ៊ាង ឱ្យដឹងថា សម្រាប់ស្រុកដែលទើបបង្កើតថ្មីនេះមាន ១៥អាសនៈ ជាលទ្ធផលដែលទើបបានបោះឆ្នោតបញ្ចប់ក្នុងពេលកន្លងទៅនេះ ហើយគណបក្សក្រៅរដ្ឋាភិបាលមួយនេះដណ្តើមបាន១អាសនៈ។ លោកបន្តថា ថ្វីបើពេលនេះ គណបក្សប្រជាជនកម្ពុជា ជាអ្នកគ្រប់គ្រងលើសលុប ក្នុងរដ្ឋបាលថ្មីនេះក្តី តែការចូលរួមសកម្មភាពនយោបាយក្នុងកម្រិតស្តួចស្តើងនេះ ក៏ជាផ្នែកមួយក្នុងការកសាងស្មារតីនៅថ្នាក់មូលដ្ឋានរបស់បក្សជំទាស់នេះដែរ។
លោកបន្តថា៖ «បើនិយាយអំពីសំឡេងអនុម័តទៅលើការគាំទ្រនឹងផែនការអ្វី យើងមិនអាចធ្វើបានទេ ដោយសារគេត្រូវការ “៥០ភាគរយបូក១” អ៊ីចឹងត្រូវការ៨សំឡេងយ៉ាងតិច ហើយយើងបានតែ១សំឡេង។ តែចំណុចអ្វីដែលសំខាន់នោះ ត្រូវពង្រឹងកម្លាំងមូលដ្ឋានរបស់យើង ហើយនៅទីនោះ យើងមានថ្នាក់ដឹកនាំស្រុក និងមានឃុំអីអ៊ីចឹងទៅ វាក៏ជាការពង្រឹងកម្លាំងបន្ថែមមួយសម្រាប់ចលនាគណបក្សភ្លើងទៀន»។
សម្រាប់នាយកប្រតិបត្តិអង្គការនិចហ្វិក លោក សំ គន្ធាមី ចាត់ទុកថា ការផ្ទេរសិទ្ធិឱ្យតំណាងគណបក្សនយោបាយនៅមូលដ្ឋាន ធ្វើសេចក្តីសម្រេចចិត្តនេះ មិនខុសទាស់នឹងនីតិវិធីទេ តែផ្ទុយទៅវិញ នេះជាផ្នែកមួយនៃការជំរុញឱ្យមានដំណើរការតាមបែបប្រជាធិបតេយ្យនៅថ្នាក់ក្រោមជាតិ។
លោកបន្តថា៖ «រឿងនេះ បើមានលិខិតផ្ទេរសិទ្ធិផ្លូវការ អត់មានបញ្ហាអីទេ។ បើមានដូច្នេះ ថ្នាក់ខេត្តថ្នាក់អីហ្នឹង គេអាចចុះហត្ថលេខាបានហើយ ឱ្យតែមាន[លិខិត]ជាផ្លូវការពីភ្នំពេញទៅ»។
នៅក្នុងចំណោមគណបក្សនយោបាយដែលបានចុះបញ្ជីនៅក្នុងក្រសួងមហាផ្ទៃ គេសង្កេតឃើញ គណបក្សជំទាស់ តែងជំរុញឱ្យមានដំណើរការតាមបែបប្រជាធិបតេយ្យនៅថ្នាក់ក្រោមជាតិ តាមរយៈការផ្ទេរលិខិត និងចុះហត្ថលេខាលើលិខិតស្នាមផ្សេងៗបម្រើឱ្យការបោះឆ្នោតនេះ ញឹកញាប់ជាងគេ។
នៅក្នុងសន្និសីទសារព័ត៌មានកាលពីខែមីនា ឆ្នាំ២០២០ កន្លងទៅ លោក ខៀវ សុភ័គ អ្នកនាំពាក្យក្រសួងមហាផ្ទៃ បានលើកឡើងថា នៅចំពោះមុខនេះ កម្ពុជាបានបង្កើនខេត្តឡើងដល់២៥ខេត្ត និងក្រុងចំនួន២៧ក្រុង នៅទូទាំងប្រទេស៕
