កម្មករ–កម្មការិនីជិត១ ០០០នាក់បានបាត់បង់ការងារ ក្រោយរោងចក្រមួយស្ថិតនៅភូមិទួលសង្កែ សង្កាត់ទួលសង្កែ រាជធានីភ្នំពេញ បានបិទទ្វារអាជីវកម្ម ក្រោមហេតុផលគ្មានអ្នកបញ្ជាទិញ។
អគ្គហេរញ្ញិកសហព័ន្ធសហជីពសេរីកម្មករនៃព្រះរាជាណាចក្រកម្ពុជា អ្នកស្រី សំ ស្រីមុំ បានឱ្យដឹងនៅថ្ងៃអង្គារនេះថា កម្មករ–កម្មការិនីចំនួន៨៨៥នាក់ បម្រើការងារនៅរោងចក្រ លីម ឡាញ អ៊ិនធើណេសិនណល (ខេមបូឌា) ហ្គាមេន « Lim Line International (Cambodia) Garment Co.,Ltd.» បានបាត់បង់ការងារ ក្រោយរោងចក្រនេះបានបិទទ្វារអាជីវកម្ម។
អ្នកស្រីបញ្ជាក់ថា ថៅកែរោងចក្រ លីម ឡាញ បានបិទទ្វារអាជីវកម្មហើយនៅពេលនេះ និងបានទូទាត់អត្ថប្រយោជន៍ផ្សេងៗឱ្យកម្មករទៅតាមផ្លូវច្បាប់ផងដែរ។ សហជីពរូបនេះបានបង្ហាញពីការព្រួយបារម្ភចំពោះការបាត់បង់ការងាររបស់កម្មករ ដោយថា នឹងធ្វើឱ្យប៉ះពាល់ដល់ប្រាក់ចំណូល និងជីវភាពគ្រួសាររបស់ពួកគេ ខណៈកម្មករភាគច្រើនបានប្រើប្រាស់កម្ចីធនាគារ។
អ្នកស្រីបន្ថែមថា៖ «ប្រសិនបើកម្មករត្រូវបានព្យួរការងារ ហើយប្រាក់ចំណូលរបស់ពួកគាត់អត់មានទៀតនោះ ហើយការចំណាយរបស់ពួកគាត់ច្រើន ខ្ញុំគិតថា វានឹងប៉ះពាល់ច្រើនដល់ដល់សេដ្ឋកិច្ចគ្រួសាររបស់ពួកគាត់។ កម្មករគាត់ចំណាយច្រើន ដូចជា ការចាយវាយប្រចាំថ្ងៃ ការជួលផ្ទះ ជាពិសេសពួកគាត់ជំពាក់លុយធនាគារ»។
អ្នកស្រី សំ ស្រីមុំ ឱ្យដឹងថា គិតត្រឹមថ្ងៃទី២៤ ខែមករានេះ រោងចក្រដែលមានកម្មករជាសមាជិករបស់សហជីពអ្នកស្រីបម្រើការងារ បានបិទទ្វារតែ១ប៉ុណ្ណោះ ខណៈរោងចក្រចំនួន១០ទៀតព្យួរការងារ ដែលមានកម្មករប្រមាណ២ម៉ឺននាក់។ អ្នកស្រីថា កម្មករដែលព្យួរការងារទាំងនោះទទួលបានប្រាក់ឧបត្ថម្ភពីរោងចក្រចន្លោះពី ៣០ដុល្លារ ទៅ៤៥ដុល្លារ។
កម្មករបម្រើការងារនៅរោងចក្រ ឌីនហាន ស្ថិតនៅខណ្ឌមានជ័យ រាជធានីភ្នំពេញ លោក ឡុង សក្កដា បានឱ្យដឹងដែរថា កាលពីចុងខែធ្នូ ឆ្នាំ២០២២ ថៅកែរោងចក្រនេះបានបញ្ចប់កិច្ចសន្យាការងារកម្មករចំនួន២ ៦០០នាក់ ខណៈកម្មករ ១ ១៧០នាក់ត្រូវបានព្យួរការងាររយៈពេលត្រឹមតែ៣ខែ ហើយឈានដល់ការបិទទ្វាររោងចក្រទាំងស្រុងនៅដើមខែកុម្ភៈ ឆ្នាំ២០២៣នេះ។
កម្មកររូបនេះបន្តថា ករណីថៅកែបញ្ចប់កិច្ចសន្យាការងារ និងព្យួរការងារក្នុងចំនួនច្រើននេះ គឺក្រោមហេតុផលគ្មានអ្នកបញ្ជាទិញ ហើយវានឹងធ្វើឱ្យប៉ះពាល់ដល់ការចំណាយ និងជីវភាពគ្រួសាររបស់កម្មករ។
លោកថា៖ «វាប៉ះពាល់ធំណាស់ដល់កម្មករ ជាពិសេសសេដ្ឋកិច្ចគ្រួសាររបស់គាត់ សេចក្ដីសុខក្នុងគ្រួសារ ពេលខ្លះអត់លុយ អ៊ីចឹងឈ្លោះគ្នា បែកបាក់គ្នាអ៊ីចឹងទៅ។ កូនចៅគាត់រៀនសូត្រ តែគាត់ខ្វះលុយហើយ កូនគាត់ក៏ពិបាកដែរ»។
កាលពីថ្ងៃទី២០ ខែមករា ឆ្នាំ២០២៣ កម្មករ–កម្មការិនីជិត២ ០០០នាក់ បម្រើការងារនៅរោងចក្រ អ៊ឹម និងវ៉េ កាត់ដេរអន្តរជាតិ អិលធីឌី ( M&V International Manufacturing Ltd,.) ស្ថិតនៅសង្កាត់កំពង់ឆ្នាំង ក្រុងកំពង់ឆ្នាំង ត្រូវបានថៅកែព្យួរកិច្ចសន្យាការងាររយៈពេលជិត២ខែ ដោយគិតចាប់ពីថ្ងៃទី២០ ខែមករា ដល់ថ្ងៃទី១០ ខែមីនា ឆ្នាំ២០២៣។
បើតាមមន្ទីរការងារ និងបណ្តុះបណ្តាលវិជ្ជាជីវៈ ខេត្តកំពង់ឆ្នាំង គឺកម្មករទាំងនោះត្រូវទទួលបានប្រាក់ឧបត្ថម្ភ ៤៥ដុល្លារអំឡុងព្យួរការងារក្នុង១ខែៗ។
ប្រធានសហភាពការងារកម្ពុជា លោក អាត់ ធន់ បានឱ្យដឹងថា តាមរបាយការណ៍ពីសមាជិករបស់សហជីពមួយនេះ គឺមានរោងចក្រចំនួន១០បានបិទទ្វារ និងរោងចក្រចំនួន២០ បានព្យួរការងារកម្មករ ខណៈប្រមាណ៦០រោងចក្រផ្សេងទៀតបានកាត់បន្ថយបុគ្គលិក។
មេសហជីពរូបនេះលើកឡើងថា ទីផ្សារស្បែកជើង និងទីផ្សារវាយនភណ្ឌសម្លៀកបំពាក់ មិនទាន់បង្ហាញសញ្ញាវិជ្ជមាននៃការងើបឡើងវិញពីការបញ្ជាទិញពីទីផ្សារអន្តរជាតិនៅឡើយទេ។ លោកថា តាមការវាយតម្លៃ គឺការបញ្ជាទិញផលិតផលកាត់ដេររបស់កម្ពុជាពីទីផ្សារអន្តរជាតិ នៅឆមាសទី១ ឆ្នាំ២០២៣ នឹងមានស្ថានភាពដូចឆមាសទី២ ក្នុងឆ្នាំ២០២២ដែរ។
លោក អាត់ ធន់ បន្តថា ស្ថានភាពបែបនេះនឹងជំរុញឱ្យរោងចក្រភាគច្រើននៅកម្ពុជានឹងបន្តកាត់បន្ថយការងារថែមម៉ោង និងព្យួរការងារដល់កម្មករមួយចំនួនបន្ថែមទៀត ហើយវានឹងធ្វើឱ្យប៉ះពាល់ជីវភាពរបស់កម្មករទាំងនោះផងដែរ។
មួយទៀតនោះ លោកថា បញ្ហាគ្មានការបញ្ជាទិញនេះក៏អាចជាប់ពាក់ព័ន្ធនឹងការផ្តាច់ប្រព័ន្ធអនុគ្រោះពន្ធ GSP របស់សហរដ្ឋអាមេរិក និងការបាត់បង់ ២០ភាគរយ នៃប្រព័ន្ធអនុគ្រោះពន្ធ EBA របស់សហភាពអឺរ៉ុប រួមទាំងបញ្ហាការរាតត្បាតជំងឺកូវីដ-១៩ បូកផ្សំនឹងសង្រ្គាមរវាងប្រទេសរុស្ស៊ី និងអ៊ុយក្រែនផងដែរ។
លោកបន្ថែមថា៖ «ហើយរឿងទី២ នៅស្រុកខ្មែរយើង គឺយើងមានបញ្ហា GSP អាមេរិកហ្នឹង វាអត់ទាន់ចុះកិច្ចព្រមព្រៀងថ្មីទេ តាំងពីឆ្នាំ២០២០មក។ អ៊ីចឹងវាមិនដឹងថាប្រាកដប៉ុនណា ដែលថាអាមេរិកនឹងឱ្យ GSP ដើម្បីផ្តល់ការនាំចូលដោយអត់យកពន្ធហ្នឹង។ ហើយមួយទៀត ពាក់ព័ន្ធ EBA របស់អឺរ៉ុប ២០ភាគរយ បានផ្តាច់ហើយ ហើយ៨០ភាគរយទៀត គឺគេមិនទាន់ប្រាកដប្រជាទេ ដោយកំពុងតាមដានស្ថានភាពនយោបាយនៅស្រុកខ្មែរហ្នឹងឯង។ ពាក់ព័ន្ធនយោបាយជិតបោះឆ្នោតអញ្ចេះ គឺក្រុមហ៊ុនគេមិនងាយនឹងកម្មង់ច្រើនទេ ដោយគេបារម្ភកើតមានហានិភ័យផ្សេងៗ»។
វីអូឌី មិនអាចសុំឆ្លើយតបពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានទេ ពាក់ព័ន្ធករណីនេះ។
បើតាមរបាយការណ៍របស់ក្រសួងឧស្សាហកម្ម បច្ចេកវិទ្យា វិទ្យាសាស្រ្ត និងនវានុវត្តន៍ គឺមានរោងចក្រសហគ្រាសថ្មីចំនួន ១៨៦រោងចក្រ បានចុះបញ្ជីក្នុងឆ្នាំ២០២២ ធ្វើឱ្យចំនួនរោងចក្រសហគ្រាសសរុបនៅក្នុងប្រទេសកម្ពុជាកើនដល់១ ៩៨២រោងចក្រ។
របាយការណ៍ដដែលបន្តថា រោងចក្រសហគ្រាសដែលកំពុងបើកដំណើរការទាំង១ ៩៨២រោងចក្រ មានទុនវិនិយោគសរុប ១៦ ៦៩០លានដុល្លារ។ ចំណែករោងចក្របិទទ្វារនៅឆ្នាំ២០២២ មានចំនួន៨៣រោងចក្រ ទាបជាងចំនួនរោងចក្របិទទ្វារ ក្នុង២០២១ ដែលមានរហូតដល់១៤៣រោងចក្រ។
របាយការណ៍ឱ្យដឹងទៀតថា ទុនវិនិយោគសរុបនៃរោងចក្រសហគ្រាសមានចំនួន១៦ ៦៩០លានដុល្លារ បានកើនឡើងពី ១៣ ៨១១លានដុល្លារក្នុងឆ្នាំ២០២១៕