វិទ្យាល័យមួយស្ថិតក្នុងស្រុកសំពៅលូន ខេត្តបាត់ដំបង បានរងនូវការរិះគន់យ៉ាងខ្លាំងលើប្រព័ន្ធផ្សព្វផ្សាយសង្គម បន្ទាប់ពីមានការបង្ហោះរូបថតមួយចំនួនដែលបង្ហាញពីសកម្មភាពរបស់គ្រូបង្រៀនពីររូបបានចុះទៅឈូសសក់សិស្សប្រុសក្នុងថ្នាក់រៀន ក្រោមការលើកឡើងថាជាការចុះអនុវត្តវិន័យ។
គេហទំព័រហ្វេសប៊ុកផ្លូវការរបស់វិទ្យាល័យសម្តេចតេជោ ហ៊ុន សែន សំពៅលូន កាលពីថ្ងៃទី២៣ ខែមករា បានចែករំលែករូបភាពគ្រូបង្រៀនដែលបានប្រើប្រាស់ម៉ាស៊ីនកាត់សក់ ដើម្បីឈូសសក់សិស្សប្រុស ចាប់ពីថ្នាក់ទី១០ ដល់ទី១២ ដោយអះអាងថា ជាការចុះអនុវត្តវិន័យរបស់លោកគ្រូ-អ្នកគ្រូ និងក្រុមប្រឹក្សាយុវជន។
តាមរយៈរូបថតមួយ ក្នុងនោះគេសង្កេតឃើញគ្រូបង្រៀនម្នាក់បានលើកបង្ហាញម៉ាស៊ីនកាត់សក់នៅក្នុងថ្នាក់រៀន ខណៈសិស្សប្រុសមួយចំនួនបានសម្លឹងមើលដោយទឹកមុខក្រៀមក្រំ ស្របពេលដែលគ្រូបង្រៀនរូបនោះដើរចូលទៅជិតសិស្សរបស់ពួកគេ។
រូបថតមួយផ្សេងទៀតក៏បានបង្ហាញឱ្យឃើញពីសិស្សម្នាក់ពដែលបានយកដៃបិទមុខរបស់ខ្លួន ស្របពេលខ្លួនកំពុងត្រូវបានគ្រូឈូសសក់។
គិតត្រឹមថ្ងៃអង្គារម្សិលមិញ ការបង្ហោះរូបទាំងនេះទទួលបានការបញ្ចេញមតិយោបល់ពីអ្នកប្រើប្រាស់ជិត ១៥ ០០០ និងការចែករំលែកបន្តជាង ២៥ ០០០ ក្នុងមួយថ្ងៃ ខណៈមតិភាគច្រើនបានរិះគន់សាលាចំពោះសកម្មភាពដែលបានឈូសសក់សិស្សប្រុសទាំងនេះ។
អ្នកប្រើប្រាស់បណ្ដាញសង្គមមួយរូបបានសរសេរជាការបញ្ចេញមតិយោបល់ថា៖ «វាគឺជាសក់របស់ពួកគេ ដែលវាមិនប៉ះពាល់ដល់ការសិក្សារបស់ពួកគេនោះទេ។ ដូចដែលបានឃើញនៅក្នុងរូបភាព ពួកគេមិនបានលាបពណ៌អ្វីនោះទេ ហើយសក់ក៏មិនវែងខ្លាំងផងដែរ។ តើហេតុអ្វីបានជាពួកគេធ្វើដាក់សិស្សយ៉ាងដូច្នេះ? ខ្ញុំគិតថា នេះជាសកម្មភាពមិនសមស្របមួយ ដោយសាលាមិនគួរមានមោទកភាពចំពោះរឿងនេះ ហើយយកមកបង្ហោះយ៉ាងដូច្នេះទេ»។
ទាក់ទិននឹងករណីនេះ អ្នកនយោបាយ សាស្ត្រាចារ្យ និងមន្ត្រីរដ្ឋាភិបាលមួយចំនួនក៏បានលើកឡើងជាមតិយោបល់ផ្សេងៗគ្នាផងដែរ ដោយក្នុងនោះ អ្នកគាំទ្រគណបក្សសង្គ្រោះជាតិដែលតុលាការរំលាយ លោក យឹម ស៊ីណន បានលើកឡើងថា៖ «បើមើលទៅសក់ក្បាលលោកគ្រូដូចជាស្ទាវជាងសិស្សផង តើគួរដាក់ពិន័យបែបណាវិញ?»
ជាមួយគ្នានេះ នាយកប្រតិបត្ដិ នៃវិទ្យាស្ថានប្រជាធិបតេយ្យកម្ពុជា លោក ប៉ា ចាន់រឿន ក៏បានចាត់ទុកសកម្មភាពឈូសសក់សិស្សប្រុសទាំងនោះថា ជាការដាក់ពិន័យប្រកបដោយភាពអវិជ្ជមានមួយ ខណៈរូបលោកបន្ថែមថា៖ «ក្នុងប្រព័ន្ធអប់រំសម័យទំនើប គឺគេលែងអនុវត្តសកម្មភាពបែបនេះទៀតហើយ ព្រោះវាជាអំពើអសីលធម៌មួយ»។
ចំណែកឯអភិបាលរងខេត្តព្រះសីហនុ លោក ឡុង ឌីម៉ង បានបង្ហោះនៅលើគណនីហ្វេសប៊ុករបស់លោក ដោយសរសេរថា៖ «បើមានទង្វើបែបនេះនៅក្នុងខេត្តព្រះសីហនុ សូមជួយប្រាប់ឱ្យខ្ញុំដឹងផង!»
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានលើកឡើងថា ក្រសួងបច្ចុប្បន្នកំពុងតែស៊ើបអង្កេតលើករណីនេះហើយ ប៉ុន្តែលោកមិនបានពន្យល់ថាតើការស៊ើបអង្កេតនេះនឹងមានលក្ខណៈបែបណានោះទេ។
សិស្សរៀនថ្នាក់ទី១១ ម្នាក់ដែលសុំមិនបញ្ចេញឈ្មោះ ដើម្បីការពារអត្តសញ្ញាណរបស់ខ្លួន បានឱ្យដឹងថា សាលាមានភាពតឹងរ៉ឹងក្នុងការតម្រូវឱ្យសិស្សប្រុសកាត់សក់ឱ្យបានខ្លី ដោយខ្លួនក៏ត្រូវបានគ្រូឈូសសក់ផងដែរ។
យុវសិស្សខាងលើ បន្តថា ថ្នាក់គ្រប់គ្រងសាលារៀនបានមកឈូសសក់សិស្សចំនួន ២៣នាក់ ក្នុងថ្នាក់របស់ខ្លួន ដោយលើកលែងតែសិស្សចំនួនពីរនាក់ដែលបានកាត់សក់របស់ខ្លួនខ្លីជាមុន។
លោកថា៖ «ខ្ញុំមានការខកចិត្តជាខ្លាំងដែលពួកគេ [ខាងសាលា] បានចូលមកឈូសសក់របស់ខ្ញុំ ទាំងដែលសក់ខ្ញុំមិនវែងនោះទេ។ ខ្ញុំស្រឡាញ់សក់របស់ខ្ញុំ ប៉ុន្តែបច្ចុប្បន្ន វាមើលទៅអាក្រក់មើលខ្លាំងណាស់។ ពួកគេឈូសចាប់ពីក្រោមដល់លើក្បាលរបស់ខ្ញុំ»។
យុវជនរូបនេះបន្ថែមថា៖ «មិត្តភក្តិរបស់ខ្ញុំពីរបីនាក់ក៏បានយំ នៅពេលដែលគ្រូបានឈូសសក់របស់ពួកគេផងដែរ។ បច្ចុប្បន្ននេះ វាពិបាកក្នុងការចេញទៅជួបអ្នកដទៃនៅខាងក្រៅណាស់។ ហើយក្នុងនោះ មានសិស្សស្រីមួយចំនួនក៏បានសើចចំអកនៅពេលដែលពួកគេឃើញសក់ក្បាលយើងផងដែរ។ អ្នកភូមិសួរខ្ញុំបែបលេងសើចថា តើខ្ញុំទើបតែចេញពីមណ្ឌលកែប្រែ ឬយ៉ាងណា? វាពិបាកនឹងទទួលយកខ្លាំងណាស់»។
សិស្សអាយុ១៨ឆ្នាំម្នាក់ទៀតដែលមកពីថ្នាក់រៀនដូចគ្នានេះ បានលើកឡើងថា ខ្លួនក៏មានការតូចចិត្តផងដែរ ដោយថ្លែងថា៖ «មនុស្សគ្រប់គ្នា គឺសម្លឹងមកកាន់រូបខ្ញុំ មិនថាខ្ញុំទៅណាមកណាក៏ដោយ។ វាពិតជាពិបាកក្នុងការប្រឈមនឹងស្ថានភាពនេះខ្លាំងណាស់»។
បើទោះបីជាមានការរិះគន់ និងការមិនពេញចិត្តយ៉ាងណាក្ដី វិទ្យាល័យមួយនេះហាក់នៅតែបង្ហាញជំហរគាំទ្រលើការសម្រេចចិត្តរបស់ខ្លួន។
តាមរយៈរបាយការណ៍មួយស្ដីពីការអនុវត្តវិន័យ នាយកវិទ្យាល័យ លោក ប៊ុត ប៊ុនណា បានលើកឡើងថា គណៈគ្រប់គ្រងបានចុះពង្រឹងវិន័យ តាមរយៈការត្រួតពិនិត្យទៅលើសម្លៀកបំពាក់ រួមនឹងសក់ក្បាលផងដែរ។
ទាក់ទិនករណីនេះ លោកបន្តថា៖ «ក្នុងពេលអនុវត្តការពង្រឹងវិន័យនេះ ឃើញថាកូនៗសិស្សានុសិស្សមួយចំនួនមានសក់មិនទាន់សមរម្យនៅឡើយ ទើបលោកគ្រូទទួលបន្ទុកខាងវិន័យ កាត់សក់តែម្ដង។ គួររំលឹកផងដែរថា ការអនុវត្តវិន័យនេះ សាលាបានធ្វើមកជាច្រើនឆ្នាំមកហើយ គឺចាប់តាំងពីឆ្នាំ ២០១៧ មកម៉្លេះ»។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី បានឱ្យដឹងថា វិន័យជាក់លាក់ទាំងឡាយអំពីសក់ក្បាល គឺអាស្រ័យលើសាលានីមួយៗ។
អ្នកស្រីថា៖ «ខ្ញុំមិនអាចនិយាយបានថា សកម្មភាពរបស់សាលាក្នុងរឿងដែលបានកើតឡើងនេះ ខុសឬយ៉ាងណានោះទេ ព្រោះសាលានីមួយៗមានវិន័យរបស់ពួកគេរៀងៗខ្លួន»។
អ្នកស្រីបន្ថែមថា៖ «ដរាបណា សិស្សានុសិស្សអនុវត្តតាមវិន័យ ពួកគេនឹងមិនមានបញ្ហាអ្វីនោះទេ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Battambang School Receives Heavy Criticism for Shaving Students’ Hair
