អ្នកគាំទ្រគណបក្សភ្លើងទៀនមួយចំនួននៅក្នុងប្រទេសថៃ ត្រូវបានស្នើឱ្យបញ្ចប់សកម្មភាពតវ៉ា និងដាក់ឱ្យស្ថិតនៅក្នុងការឃ្លាំមើលដោយសមត្ថកិច្ចថៃ បន្ទាប់ពីពួកគេបានប្រមូលផ្ដុំគ្នាធ្វើការតវ៉ាក្នុងទ្រង់ទ្រាយតូចមួយប្រឆាំងនឹងការចាប់ខ្លួនលោក ថាច់ សេដ្ឋា។
អនុប្រធានគណបក្សភ្លើងទៀន លោក ថាច់ សេដ្ឋា ត្រូវបានចាប់ខ្លួននៅក្នុងរាជធានីភ្នំពេញ និងត្រូវបានឃុំខ្លួនបណ្តោះអាសន្ន តាំងពីសប្ដាហ៍មុន បន្ទាប់ពីរងការចោទប្រកាន់ពីបទ «មិនបានបំពេញកាតព្វកិច្ចចំពោះឧបករណ៍អាចជួញដូរបាន» ឬហៅថា ការចេញសែកដោយគ្មានសាច់ប្រាក់ ដែលប្រព្រឹត្តតាំងពីឆ្នាំ២០១៩។
ទាក់ទិននឹងករណីនេះ គណបក្សភ្លើងទៀន ក៏បានចេញប្រតិកម្ម និងបានរិះគន់គណបក្សកាន់អំណាច ចំពោះការចាប់ខ្លួនអនុប្រធានគណបក្សរូបនេះផងដែរ។
សកម្មជនដីធ្លីបឹងកក់មួយរូប អ្នកស្រី សាត ផា ដែលបានចាកចេញពីកម្ពុជាទៅកាន់ប្រទេសថៃ បន្ទាប់ពីមានការគំរាមសម្លាប់ដោយជនអនាមិក កាលពីឆ្នាំមុន បានលើកឡើងថា ព្រឹត្តិការណ៍នេះមានការចូលរួមដោយមនុស្សប្រមាណជា ៤០នាក់ នៅក្នុងខេត្តឈុនបុរី ប្រទេសថៃ ហើយក្នុងនោះមាន ១៥នាក់ ក្នុងចំណោមពួកគេ ក៏បានកោរសក់នៅក្នុងការតវ៉ាផងដែរ។
អ្នកស្រីបន្តថា៖ «[ទាក់ទិននឹងការតវ៉ានេះ] យើងទាមទារឱ្យមានការដោះលែងលោក ថាច់ សេដ្ឋា។ យើងមិនមានការពេញចិត្តចំពោះការដែលមេដឹកនាំសម័យបច្ចុប្បន្ននេះ ធ្វើទុក្ខបុកម្នេញ និងជិះជាន់លើប្រជាជនឡើយ»។
អ្នកស្រី សាត ផា បន្ថែមថា ការដែលក្រុមខ្លួនធ្វើបាតុកម្មនៅក្នុងវត្តមួយ ក្នុងខេត្តឈុនបុរីនេះ ដោយសារតែពួកគេមានការព្រួយបារម្ភពីសុវត្ថិភាពក្នុងការតវ៉ានៅទីក្រុងបាងកក ហើយខណៈដែលពួកគេតវ៉ានោះ សមត្ថកិច្ចថៃក៏បានថតរូបបាតុករ និងសួរពីមូលហេតុដែលពួកគេកោរសក់ និងបានស្នើសុំឱ្យពួកគេបញ្ចប់ការតវ៉ាផងដែរ។
បើតាមអ្នកស្រី សាត ផា ការចុះមកកាន់ទីតាំងដោយផ្ទាល់ពីសំណាក់សមត្ថកិច្ចនេះ ក៏បានបង្កើនការភ័យខ្លាចក្នុងចំណោមអ្នកចូលរួមផងដែរ។
ជាមួយគ្នានេះ លោក ឆន សុខឿន អាយុ៤៣ឆ្នាំ មានស្រុកកំណើតនៅខេត្តបន្ទាយមានជ័យ ដែលជាអ្នកគាំទ្រគណបក្សសង្គ្រោះជាតិដែលត្រូវបានតុលាការរំលាយ និងបានចាកចេញពីប្រទេសបន្ទាប់ពីត្រូវបានស្នើសុំឱ្យចុះចូលជាមួយគណបក្សកាន់អំណាច បានឱ្យដឹងថា សមត្ថកិច្ចថៃបានប្រាប់ក្រុមអ្នកតវ៉ាថា ការតស៊ូមតិប្រឆាំងនឹងរដ្ឋាភិបាលកម្ពុជារបស់ពួកគាត់ ក៏អាចប៉ះពាល់ដល់រដ្ឋាភិបាលថៃផងដែរ។
លោកបានបន្តប្រាប់ពីអ្វីដែលសមត្ថកិច្ចថៃបានលើកឡើងថា៖ «សកម្មភាពរបស់អ្នក គឺជាការផ្ញើសារនយោបាយទៅកាន់រដ្ឋាភិបាលរបស់អ្នក ប៉ុន្តែវាក៏អាចមានផលប៉ះពាល់ដល់រដ្ឋាភិបាលនៃប្រជាជាតិរបស់ខ្ញុំផងដែរ ដោយសារតែយើងមិនអនុញ្ញាតឱ្យអ្នកខាងក្រៅប្រើប្រាស់ប្រទេសរបស់យើងជាទីតាំងសម្រាប់ការធ្វើសកម្មភាពនយោបាយណាមួយនោះទេ»។
លោក ឆន សុខឿន បន្ថែមថា អ្នកគាំទ្រ និងសកម្មជនបក្សប្រឆាំងនៅប្រទេសថៃ ជានិច្ចកាល ក៏ត្រូវបានតាមដានជាប្រចាំនៅក្នុងប្រទេសផងដែរ ប៉ុន្តែពួកគេនៅតែបន្តព្យាយាមជំរុញឱ្យមានការផ្លាស់ប្តូរប្រជាធិបតេយ្យនៅកម្ពុជា។
ខណៈត្រូវបានឃ្លាំមើលដោយសមត្ថកិច្ចជាប់ជានិច្ច សកម្មជនគណបក្សប្រឆាំង ដែលបានចាកចេញមុនឬក្រោយគណបក្សសង្គ្រោះជាតិត្រូវបានរំលាយ ទៅស្នាក់នៅប្រទេសថៃទាំងនោះ បានឱ្យដឹងទៀតថា ពួកគេត្រូវបានបង្ខំឱ្យរស់នៅក្នុងជីវិតដែលលាក់លៀម ដើម្បីចៀសវាងការទាក់ទាញចំណាប់អារម្មណ៍ ហើយក្នុងនោះ រដ្ឋាភិបាលថៃក៏មិនស្ទាក់ស្ទើរក្នុងការនិរទេសពួកគេចេញផងដែរ បើទោះបីជាពួកគេមួយចំនួនមានឋានៈជាជនភៀសខ្លួនរបស់អង្គការសហប្រជាជាតិក៏ដោយ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានថ្លែងថា ករណីរបស់លោក ថាច់ សេដ្ឋា គឺជាបញ្ហាផ្ទាល់ខ្លួន ដោយមិនមែនធ្វើឡើងក្រោមហេតុផលនយោបាយឡើយ។
លោកថា៖ «បើលោក ថាច់ សេដ្ឋា មិនបានចេញសែកស្អុយ វានឹងមិនមានជាបញ្ហាអ្វីនោះទេ។ វាគឺជារឿងផ្ទាល់ខ្លួនរបស់លោក ថាច់ សេដ្ឋា»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Candlelight Supporters’ Protest Broken Up by Thai Police
