កម្មករឱ្យដឹងថា ពួកគេជាង១ ០០០នាក់ បម្រើការងារនៅរោងចក្រកាត់ដេរ ស្មាតស៊ើតស៍ ហ្គាមេន មេនូហ្វេកធឺរីង (ខេមបូឌា) (Smart Shirt Garments Manufaturing(Cambodia) Co.,LTD) ស្ថិតក្នុងភូមិស្រង់ ឃុំស្រង់ ស្រុកគងពិសី ខេត្តកំពង់ស្ពឺ បានផ្ទុះការតវ៉ានៅថ្ងៃពុធនេះ ដោយបិទកំណាត់ផ្លូវជាតិលេខ៤១ ក្រោយថៅកែកាត់លុយអំឡុងពេលកម្មករឈប់សម្រាកថ្ងៃបុណ្យចូលឆ្នាំចិន។
កម្មការិនីម្នាក់បម្រើការងារនៅរោងចក្រ ស្មាតស៊ើតស៍ ដែលសុំមិនបញ្ចេញឈ្មោះ បានប្រាប់វីអូឌីថា កាលពីថ្ងៃសៅរ៍ ចំថ្ងៃបុណ្យចូលឆ្នាំចិន កម្មករបម្រើការងារនៅរោងចក្រ ស្មាតស៊ើតស៍ បានឈប់សម្រាកទាំងអស់គ្នា ដោយភាគីរោងចក្រព្រមព្រៀងមិនកាត់លុយកម្មករនោះទេ ប៉ុន្តែក្រោយកម្មករឈប់សម្រាករួច គឺថៅកែបានកាត់លុយកម្មករទៅវិញ ដែលធ្វើឱ្យក្រុមកម្មករមិនសប្បាយចិត្ត ហើយផ្ទុះការតវ៉ា។
អ្នកស្រីបន្ថែមថា៖ «ការឈប់ថ្ងៃសែនចិនហ្នឹង ខាងរោងចក្រគេថា គេនឹងកាត់បំណាច់ឆ្នាំ ប៉ុន្តែក្រោយមក គេបែរជាថាកាត់លុយវិញ។ អ៊ីចឹងកម្មករគាត់អត់ពេញចិត្ត គាត់តវ៉ា គាត់បិទផ្លូវ។ មួយទៀត រឿងថៅកែសន្យាដំឡើងលុយឱ្យប្រធានៗ ៦ដុល្លារ រហូតពេលខាងរោងចក្រមិនទាន់បានផ្តល់ចម្លើយដល់ពួកយើងទេ»។
ប្រធានសមាគមអភិវឌ្ឍន៍ជីវភាពពលរដ្ឋកម្ពុជា លោក ព្រុំ ប៊ុនថន ដែលតាមដានករណីកម្មករតវ៉ានេះ បានបញ្ជាក់បន្ថែមថា កម្មករបានផ្ទុះការតវ៉ារយៈពេល៣ថ្ងៃមកហើយ ក្រោយគ្មានដំណោះស្រាយពីអាជ្ញាធរពាក់ព័ន្ធ ប៉ុន្តែកម្មករទើបតែតវ៉ាដោយបិទកំណាត់ផ្លូវជាតិលេខ៤១ នៅមុខរោងចក្រ នៅព្រឹកថ្ងៃពុធនេះ។
ប្រធានសមាគមរូបនេះ បន្តថា តាមរបាយការណ៍ដែលលោកទទួលបាន ដើមចមដែលនាំឱ្យកម្មករផ្ទុះការតវ៉ានោះ គឺថៅកែរោងចក្របានអនុញ្ញាតឱ្យកម្មករឈប់សម្រាកនៅថ្ងៃសែនចិន ដោយព្រមព្រៀងកាត់កងជាមួយបំណាច់ឆ្នាំ ប៉ុន្តែក្រោយកម្មករឈប់សម្រាករួច បែរជាភាគីក្រុមហ៊ុនកាត់លុយលើកទឹកចិត្ត (លុយព្រីម) និងប្រាក់ឈ្នួលកម្មករទៅវិញ។
លោកបន្ថែមថា៖ «អ៊ីចឹងមន្ទីរការងារគួរតែសម្របសម្រួលដោះស្រាយករណីនេះ កុំឱ្យទុកអូសបន្លាយយូរ ដែលធ្វើខាតបង់ទាំងសងខាង ខាតបង់ទាំងកម្មករ និងនិយោជក មានន័យថា កម្មករក៏គាត់ខាតបង់ប្រាក់ឈ្នួលគាត់ ដោយសារគាត់អត់ធ្វើឱ្យនិយោជក អាហ្នឹងនិយោជកគាត់អត់គិតប្រាក់ឈ្នួលឱ្យពួកគាត់ទេ។ ទី២ និយោជកក៏ខាតបង់នូវចង្វាក់ផលិតកម្មកររបស់ពួកគាត់ដែរ»។
វីអូឌី នៅមិនអាចសុំការបញ្ជាក់ជុំវិញករណីនេះពីតំណាងរោងចក្រ ស្មាតស៊ើតស៍ និងប្រធានមន្ទីរការងារ និងបណ្តុះបណ្តាលវិជ្ជាជីវៈ ខេត្តកំពង់ស្ពឺ លោក ចឹក បូរិន បានទេ នៅថ្ងៃពុធនេះ។
របាយការណ៍របស់ក្រសួងឧស្សាហកម្ម បច្ចេកវិទ្យា វិទ្យាសាស្រ្ត និងនវានុវត្តន៍ បានឱ្យដឹងថា មានរោងចក្រសហគ្រាសថ្មីចំនួន ១៨៦រោងចក្រ បានចុះបញ្ជីក្នុងឆ្នាំ២០២២ ដែលធ្វើឱ្យចំនួនរោងចក្រសហគ្រាសសរុបនៅក្នុងប្រទេសកម្ពុជា កើនដល់១ ៩៨២រោងចក្រ៕
