លោកនាយករដ្ឋមន្ត្រី ហ៊ុន សែន បានគូសបញ្ជាក់ថា កម្ពុជាមិនបានបញ្ជូនកងទ័ព និងផ្តល់ជំនួយយោធាដល់ប្រទេសអ៊ុយក្រែននោះទេ ហើយការដែលកម្ពុជាជួយបណ្តុះបណ្តាលជំនាញដោះមីនដល់មន្ត្រីជំនាញអ៊ុយក្រែននោះ គឺជាកិច្ចការមនុស្សធម៌សុទ្ធសាធ។
ក្នុងពិធីប្រគល់សញ្ញាបត្រដល់និសិត្សនៅសាកលវិទ្យាល័យវេស្ទើន នាថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានច្រានចោលចំពោះការលើកឡើងមួយចំនួន នាពេលថ្មីៗនេះ ដែលថា កម្ពុជាបានផ្តល់ជំនួយយោធាឱ្យអ៊ុយក្រែន។ លោកបានគូសបញ្ជាក់ថា កម្ពុជាមិនបានបញ្ជូនកងទ័ព និងគ្រូបណ្តុះបណ្តាលដោះមីនចូលទៅក្នុងប្រទេសអ៊ុយក្រែនឡើយ។
លោកអះអាងថា៖ «កម្ពុជាមិនបានផ្តល់ជំនួយយោធាឱ្យអ៊ុយក្រែនទេ កម្ពុជាគ្មានសមត្ថភាពដើម្បីផ្តល់ជំនួយយោធាឱ្យអ៊ុយក្រែនទេ។ ឯរឿងកម្ពុជាជួយបណ្តុះបណ្តាលអ្នកដោះមីនអ៊ុយក្រែន គឺជាកិច្ចការមនុស្សធម៌សុទ្ធសាធ សូមកុំភ័ន្តច្រឡំ! កម្ពុជាបានបញ្ជូនកងទ័ពទៅធ្វើការដោះមីននៅក្រៅប្រទេស រួមចំណែកការពារសន្តិភាព ក្រោមឆ័ត្រអង្គការសហប្រជាជាតិ ដែលយើងឥឡូវ យើងមានកងទ័ពឈរជើងនៅ ៤ប្រទេស នៅម៉ាលី នៅសូដង់ខាងត្បូង នៅលីបង់ នៅអាហ្វ្រិកកណ្ដាល»។
លោកនាយករដ្ឋមន្ត្រី ហ៊ុន សែន បានគូសបញ្ជាក់ទៀតថា៖ «ឯនៅក្នុងប្រទេសរបស់យើង យើងបានជួយបណ្តុះបណ្តាលអ្នកដែលមកតាំងពីកូឡុំប៊ី និងប្រទេសមួយចំនួនផ្សេងទៀត មករៀនដោះមីននៅកម្ពុជា នៅកម្ពុជា! ហើយយើងមានមជ្ឈមណ្ឌលមីនអាស៊ាន ដែលមានទីតាំងនៅកម្ពុជា។ អ៊ីចឹងខ្ញុំសូមជម្រាបថា ប្រទេសណាក៏ដោយដែលចង់មករៀនដោះមីននៅកម្ពុជា សូមអញ្ជើញ រាប់ទាំងប្រទេសរុស្ស៊ី យើងជួយបណ្តុះបណ្តាលឱ្យទាំងអស់»។
កាលពីថ្ងៃទី២៤ ខែមករា ឆ្នាំ២០២៣ ក្រសួងការបរទេសកម្ពុជា ក៏បានចេញសេចក្តីថ្លែងការណ៍មួយដោយច្រានចោលចំពោះការចេញផ្សាយព័ត៌មានជាលក្ខណៈក្រាហ្វិកមួយតាមប្រព័ន្ធតេឡេក្រាមឈ្មោះ Demografiya upala ដែលមានការបង្ហាញជំហរប្រទេសនានា ពាក់ព័ន្ធនឹងសង្គ្រាមនៅអ៊ុយក្រែន ហើយក្នុងនោះ កម្ពុជាត្រូវបានគេដាក់ឱ្យស្ថិតក្នុងចំណោមក្រុមប្រទេសដែលផ្តល់ជំនួយយោធាដល់អ៊ុយក្រែន។
ក្រសួងការបរទេសកម្ពុជា គូសបញ្ជាក់ក្នុងសេចក្តីថ្លែងការណ៍នោះថា៖ «ការសម្រេចចិត្តផ្តល់ការបណ្តុះបណ្តាលបច្ចេកទេសសម្អាតគ្រាប់មីនដល់អ្នកដោះមីនអ៊ុយក្រែន នៅប្រទេសកម្ពុជា ក្រោមកិច្ចសហប្រតិបត្តិការជាមួយទីភ្នាក់ងារសហប្រតិបត្តិការអន្តរជាតិជប៉ុន [JICA] គឺត្រូវបានធ្វើឡើងដោយឈរលើមូលដ្ឋានមនុស្សធម៌សុទ្ធសាធ ដែលស្រដៀងគ្នានឹងបេសកកម្មថែរក្សាសន្តិភាពរបស់ខ្លួននៅតំបន់អាហ្វ្រិក និងមជ្ឈិមបូព៌ា ដោយមានការឧបត្ថម្ភពីអង្គការសហប្រជាជាតិ»។
ក្រសួងការបរទេសកម្ពុជា បានទទូចឱ្យប្រព័ន្ធតេឡេក្រាមឈ្មោះ Demografiya upala កែតម្រូវចំពោះការផ្សព្វផ្សាយនោះ ដោយហេតុថា ការចាត់ចូលកម្ពុជាទៅក្នុងក្រុមប្រទេសដែលផ្តល់ការគាំទ្រខាងយោធាឱ្យអ៊ុយក្រែនបែបនេះ មិនត្រឹមតែមិនពិតទេ តែថែមទាំងអាចធ្វើឱ្យខូចប្រយោជន៍កម្ពុជា ដែលជាប្រទេសស្រឡាញ់សន្តិភាព និងប្រកាន់ខ្ជាប់គោលនយោបាយការបរទេសអព្យាក្រឹត ដូចមានចែងក្នុងរដ្ឋធម្មនុញ្ញរបស់កម្ពុជា។
កាលពីពាក់កណ្តាលខែមករា ថ្មីៗនេះ កម្ពុជាបានជួយបណ្តុះបណ្តាលរយៈពេល១សប្តាហ៍ ដល់មន្ត្រីជំនាញបោសសម្អាតមីននៅអ៊ុយក្រែន ពីជំនាញនៃការដោះមីន និងគ្រឿងផ្ទុះ ជាពិសេសឧបករណ៍រាវមីនប្រភេទផលិតនៅជប៉ុន ក្រោមកិច្ចសហការកម្ពុជា-ជប៉ុន លើសកម្មភាពកម្ចាត់មីនមនុស្សធម៌៕