ខណៈអគារកាស៊ីណូ ហ្គ្រេនដាយមិន (Grand Diamond) នៅក្រុងប៉ោយប៉ែត ខេត្តបន្ទាយមានជ័យ កំពុងតែត្រូវបានរុះរើ និងវាយកម្ទេចចោល គ្រួសារកម្ពុជាមួយចំនួននៅតែរង់ចាំការផ្ដល់អត្តសញ្ញាណពីសាច់ញាតិរបស់ខ្លួនដែលបាត់បង់ក្នុងករណីអគ្គិភ័យមួយនេះ។
គួរបញ្ជាក់ថា យ៉ាងហោចណាស់ មនុស្សចំនួន ២៨នាក់ បានស្លាប់នៅក្នុងអគ្គិភ័យដែលទំនងជាបណ្ដាលមកពីបញ្ហាអគ្គិសនីនៅកាស៊ីណូខាងលើនេះ កាលពីចុងខែមុន ដោយអំឡុងពេលនៃការជួយសង្គ្រោះ និងរុះរើអគារដ៏ធំមួយនេះ ជនរងគ្រោះ និងក្រុមជួយសង្គ្រោះ ក៏បានលើកឡើងពីក្ដីបារម្ភអំពីកង្វះប្រព័ន្ធប្រកាសអាសន្ន និងឧបករណ៍បាញ់ទឹក ក៏ដូចជាការជាប់គាំងនៃទ្វារ និងជណ្តើរយន្ត ផងដែរ។
ជាមួយគ្នានេះ យ៉ាងហោចណាស់មានពលរដ្ឋខ្មែរចំនួន ៣គ្រួសារ បានលើកឡើងថា សាច់ញាតិរបស់ពួកគេបានបាត់ខ្លួនចាប់តាំងពីមានករណីអគ្គិភ័យនេះមក។
ទោះជាយ៉ាងណា អាជ្ញាធរថា គិតរហូតមកដល់ពេលបច្ចុប្បន្ននេះ នៅតែមិនទាន់មានការកំណត់អត្តសញ្ញាណជនរងគ្រោះជាជនជាតិខ្មែរណាម្នាក់ឡើយ ក្នុងចំណោមសាកសពដែលរកឃើញទាំង២៨នាក់នោះ ខណៈសមត្ថកិច្ចក៏បានបិទបញ្ចប់ការរុករកនិងស្រាវជ្រាវ ហើយចាប់ផ្ដើមកិច្ចការងារវាយកម្ទេចអគារកាស៊ីណូនេះវិញ។
អភិបាលរងខេត្តបន្ទាយមានជ័យ លោក ង៉ោ ម៉េងជ្រួន បានឱ្យដឹងថា ការធ្វើតេស្ត DNA បានកំណត់អត្តសញ្ញាណសាកសពចំនួនពីរបន្ថែមទៀតដែលជាជនជាតិថៃ ដោយលោកបន្ថែមថា នៅពេលបច្ចុប្បន្ន គឺនៅសល់សាកសពមិនស្គាល់អត្តសញ្ញាណតែពីរទៀតប៉ុណ្ណោះ។
លោកថា៖ «យើងកំពុងតែរង់ចាំលទ្ធផល DNA ដើម្បីបញ្ជាក់ថាតើពួកគេជាជនជាតិខ្មែរ ឬថៃ»។
អភិបាលរងខេត្តបន្ទាយមានជ័យរូបនេះ បន្ថែមថា ការរុះរើនិងវាយកម្ទេចចោលកាស៊ីណូនេះ ត្រូវធ្វើឡើងឱ្យបានឆាប់រហ័សតាមការចង់បានដោយក្រុមហ៊ុន ខណៈអាជ្ញាធរមានភារកិច្ចត្រឹមជួយសម្រួលដល់ប្រតិបត្តិការតែប៉ុណ្ណោះ។
លោកថា៖ «ការសម្រេចចិត្ត គឺស្ថិតនៅលើក្រុមហ៊ុនផ្ទាល់»។
ស្នងការនគរបាលខេត្តបន្ទាយមានជ័យ លោក សិទ្ធិ ឡោះ បានលើកឡើងថា រូបលោកក៏បានដឹងពីពលរដ្ឋខ្មែរចំនួន ៣ គ្រួសារដែលបាត់បង់សាច់ញាតិរបស់ពួកគេផងដែរ ប៉ុន្តែអាជ្ញាធរត្រូវរង់ចាំលទ្ធផល DNA ជាមុនសិន ដើម្បីអាចបញ្ជាក់បាន។
លោកថា៖ «ការធ្វើតេស្ត DNA គឺធ្វើឡើងនៅក្នុងប្រទេសថៃ។ នៅពេលដែលលទ្ធផលចេញមក យើងនឹងចាត់វិធានការ និងធ្វើការស៊ើបអង្កេតបន្តទៀត ហើយខណៈដែលលទ្ធផលមិនទាន់ចេញមក យើងមិនអាចធ្វើការសន្និដ្ឋានអ្វីបាននោះទេ។ សាកសពដែលរកឃើញត្រូវបានឆេះទាំងស្រុង ហើយវាពិតជាមិនអាចធ្វើការសន្និដ្ឋានបានដោយងាយៗនោះទេ»។
យោងតាមស្នងការរងនគរបាលខេត្តបន្ទាយមានជ័យ លោក ប៊ុន ផេង បានឱ្យដឹងថា នៅវេលាម៉ោងប្រមាណជា ១០ព្រឹក ថ្ងៃអង្គារ ក្នុងនោះក៏មានអណ្ដាតភ្លើងតូចមួយឆាបឆេះចេញពីទីតាំងអគារកាស៊ីណូនេះផងដែរ ខណៈវីដេអូដែលត្រូវបានបង្ហោះលើបណ្តាញសង្គមបានបង្ហាញឱ្យឃើញពីផ្សែងហុយចេញពីអគារ និងអណ្តាតភ្លើងតាមបង្អួចមួយ។
ទោះជាយ៉ាងណា លោកបន្ថែមថា ភ្លើងដែលឆាបឆេះនោះត្រូវបានពន្លត់ដោយកម្មករហើយ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Poipet Casino Reignites during Demolition, Still No Cambodian Bodies Identified
