រុស្ស៊ីបានប្រតិកម្មយ៉ាងខ្លាំងចំពោះការសម្រេចចិត្តរបស់អាល្លឺម៉ង់ ដែលអនុម័តលើការបញ្ជូនរថក្រោះ Leopard 2 ទៅកាន់ប្រទេសអ៊ុយក្រែន ដោយថា សកម្មភាពនេះនឹងបំផ្លាញទំនាក់ទំនងរវាងប្រទេសទាំង២ ដោយមិនអាចស្តារឡើងវិញបានឡើយ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន CNA កាលពីថ្ងៃទី២៥ ខែមករា ឆ្នាំ២០២៣។
ពាក់ព័ន្ធនឹងករណីនេះ អ្នកនាំពាក្យក្រសួងការបរទេសរុស្ស៊ី លោកស្រី ម៉ារៀ ហ្សាខារ៉ូវ៉ា (Maria Zakharova) បាននិយាយនៅក្នុងសារតាម Telegram ថា ចំណាត់ការនេះ គឺជាការបញ្ជាក់ពីការចូលរួមរបស់អាល្លឺម៉ង់នៅក្នុង «សង្គ្រាមដែលបានគ្រោងទុកជាមុន» ប្រឆាំងនឹងរុស្ស៊ី។
លើសពីនេះ ស្ថានទូតរុស្ស៊ីប្រចាំនៅទីក្រុងប៊ែរឡាំង បានលើកឡើងថា ការសម្រេចចិត្តដែលបើកផ្លូវឱ្យសមាជិក NATO ផ្សេងទៀតអាចបញ្ជូនរថក្រោះផលិតដោយអាល្លឺម៉ង់ទៅឱ្យអ៊ុយក្រែន នឹងធ្វើឱ្យជម្លោះនេះកាន់តែតានតឹងឡើង។
ឯកអគ្គរដ្ឋទូតរុស្ស៊ី លោក សឺហ្គេ នេឆាយ៉េវ (Sergei Nechayev) បាននិយាយថា៖ «ការសម្រេចចិត្តដ៏គ្រោះថ្នាក់បំផុតនេះ នឹងធ្វើឱ្យមានការប្រឈមមុខដាក់គ្នាកាន់តែខ្លាំងឡើង»។
លោកបន្ថែមថា៖ «វានឹងបំផ្លាញទំនាក់ទំនងរវាងរុស្ស៊ី និងអាល្លឺម៉ង់ ដែលមិនអាចស្តារឡើងវិញឡើយ»។
ទីក្រុងកៀវ និងសម្ពន្ធមិត្តលោកខាងលិច បានលើកឡើងថា ការឈ្លានពានរបស់រុស្ស៊ីលើអ៊ុយក្រែន ដែលបានចាប់ផ្តើមនៅថ្ងៃទី២៤ ខែកុម្ភៈ ឆ្នាំមុន គឺជាសង្គ្រាមឈ្លានពានដណ្តើមទឹកដី។
យ៉ាងណា ទីក្រុងមូស្គូ និយាយថា លោកខាងលិចកំពុងប្រើអ៊ុយក្រែន ដើម្បីធ្វើឱ្យសន្តិសុខរបស់រុស្ស៊ីចុះខ្សោយ។
ទីក្រុងកៀវ បានទទូចសុំរថក្រោះពីលោកខាងលិចអស់រយៈពេលជាច្រើនខែ ដោយនិយាយថា នឹងអាចឱ្យកងទ័ពរបស់ខ្លួនអាចទម្លុះខ្សែការពាររបស់រុស្ស៊ី និងដណ្តើមយកមកវិញនូវទឹកដីដែលត្រូវបានកាន់កាប់នៅភាគខាងកើត និងខាងត្បូង។
រុស្ស៊ី បានលើកឡើងម្តងហើយម្តងទៀតថា ខ្លួននឹងកម្ទេចរថក្រោះដែលបញ្ជូនទៅអ៊ុយក្រែន និងថារថក្រោះទាំងនោះនឹងធ្វើឱ្យសង្គ្រាមអូសបន្លាយកាន់តែយូរជាងមុន៕