តុលាការកំពូល គ្រោងប្រកាលសាលដីកាលើសំណុំរឿង «ញុះញង់» ដែលចោទប្រកាន់លើអ្នកសារព័ត៌មានឈ្មោះ កៅ ពិសិដ្ឋ នៅថ្ងៃទី០១ ខែកុម្ភៈ ខាងមុខនេះ ខណៈដែលក្រុមគ្រួសាររបស់លោកយល់ថាជារឿងអយុត្តិធម៌ និងស្នើតុលាការដោះលែងអ្នកសារព័ត៌មានរូបនេះឱ្យមានសេរីភាពឡើងវិញ។
លោក កៅ ពិសិដ្ឋ អ្នកសារព័ត៌មានរបស់គេហទំព័រ www.srbreakingnews.com ត្រូវបានសមត្ថកិច្ចខេត្តបាត់ដំបង ចាប់ខ្លួនកាលអំឡុងខែកក្កដា ឆ្នាំ២០២១ ក្រោយពីអ្នកសារព័ត៌មានរូបនោះបានបង្ហោះសារនៅតាមបណ្ដាញសង្គមហ្វេសប៊ុក ដោយរិះគន់រដ្ឋាភិបាលអំពីវិធានការទប់ស្កាត់ជំងឺកូវីដ-១៩ និងសុំឱ្យសហគមន៍អន្តរជាតិចាត់វិធានការលើរដ្ឋាភិបាលកម្ពុជា ដូចជា ការផ្ដាច់ជំនួយ ជាដើម។
លោក នួន ផានិត មេធាវីការពារសិទ្ធិឱ្យលោក កៅ ពិសិដ្ឋ បានលើកឡើងថា ក្រោយតុលាការកំពូលបើកការជំនុំជម្រះនៅថ្ងៃទី២៥ ខែមករា ប្រធានចៅក្រមជំនុំជម្រះសម្រេចថា សំណុំរឿងនេះ តុលាការនឹងប្រកាសសាលដីកានៅថ្ងៃទី០១ ខែកុម្ភៈ។
លោក នួន ផានិត បានប្រាប់វីអូឌីនៅថ្ងៃទី២៦ ខែមករា នេះថា កូនក្ដីរបស់ខ្លួនដែលត្រូវសមត្ថកិច្ចបញ្ជូនឱ្យមកចូលរួមសវនាការផងដែរ បានថ្លែងនៅក្នុងសវនាការដោយនៅតែចាត់ទុកការបង្ហោះសារនៅតាមបណ្ដាញសង្គមហ្វេសប៊ុក ដោយរិះគន់រដ្ឋាភិបាលអំពីវិធានការទប់ស្កាត់ជំងឺកូវីដ-១៩នោះ មិនមែនជាការញុះញង់នោះទេ គឺគ្រាន់តែជាសេរីភាពបញ្ចេញមតិប៉ុណ្ណោះ។
លោកមេធាវី នួន ផានិត ថា៖ «កូនក្ដី តាមពិតទៅ គាត់គិតថាអ្វីដែលគាត់បង្ហោះតាមរយៈហ្វេសប៊ុកហ្នឹង គឺជាសេរីភាពក្នុងការបញ្ចេញមតិ នេះជាការយល់ឃើញរបស់គាត់»។
លោក នួន ផានិត ក៏បានស្នើដល់តុលាការកំពូលឱ្យពិនិត្យក្នុងការដោះលែងកូនក្ដីរបស់ខ្លួនឱ្យមានសេរីភាពឡើងវិញតាមរយៈការច្រានចោលនូវសាលដីការបស់សាលាឧទ្ធរណ៍បាត់ដំបង។
ចំណែកអ្នកស្រី កៅ ម៉ាលីស អាយុ៣៤ឆ្នាំ ដែលជាប្អូនស្រីរបស់លោក កៅ ពិសិដ្ឋ យល់ថា ការផ្ដន្ទាទោសលើបងប្រុសខ្លួនកន្លងមក គឺជារឿងអយុត្តិធម៌ និងស្នើដល់តុលាការកំពូលប្រកាសដោះលែងឱ្យមានសេរីភាពឡើងវិញ។
លោកថា៖ «បើតាមតែបងគិតទៅ ដូចជាវាអយុត្តិធម៌ណាស់ គ្រាន់តែបញ្ចេញមតិយោបល់លើហ្វេសប៊ុកក៏ត្រូវជាប់ទោសដែរអូន។ បងមានតែសំណូមពរចង់ឱ្យគាត់ដោះលែងមុនកំណត់ ដូចគេដាក់២ឆ្នាំអ៊ីចឹង»។
វីអូឌី មិនអាចសុំការឆ្លើយតបពីអ្នកនាំពាក្យតុលាការកំពូល អ្នកស្រី ម៉ៅ ធីតា បានទេ នៅថ្ងៃព្រហស្បតិ៍នេះ។
ចំណែកនាយិកាស្ដីទី នៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ អ្នកស្រី ឆន សុគន្ធា មានប្រសាសន៍ថា ករណីលោក កៅ ពិសិដ្ឋ ហាក់គ្មានសង្ឃឹមថា តុលាការកំពូលនឹងទម្លាក់ការចោទប្រកាន់នោះទេ ដោយសារតែសំណុំរឿងនេះជាប់ពាក់ព័ន្ធជាមួយនឹងរឿងនយោបាយ ខណៈដែលតុលាការពីរថ្នាក់បានផ្ដន្ទាទោសធ្ងន់ធ្ងរ ដែលផ្ទុយពីសកម្មភាពរបស់លោក។
អ្នកស្រី ឆន សុគន្ធា បន្ថែមថា ប្រសិនបើតុលាការកំពូលនៅតែតម្កល់សាលដីកាសាលាឧទ្ធរណ៍មែន នឹងធ្វើឱ្យបាត់បង់ធនធានអ្នកសារព័ត៌មានម្នាក់ដែលហ៊ានសរសេរពីចំណុចខ្វះខាតរបស់រដ្ឋាភិបាល។
អ្នកស្រីថា៖ «យើងស្ដាយ ប្រសិនតុលាការគាត់តម្កល់បទចោទរហូតដល់ពីរឆ្នាំ។ នៅក្នុងឆ្នាំនេះ លោកនឹងចេញ។ ប៉ុន្តែបាត់បង់ធនធានមនុស្សមួយ ដោយសារលោកជាអ្នកសារព័ត៌មានអាជីព លោកអ្នកសរសេរអត្ថបទ ហ៊ានសរសេរពាក់ព័ន្ធនឹងបញ្ហាសង្គម ឬបញ្ហារសើប ពាក់ព័ន្ធនឹងក្នុងប្រទេស ឬក្នុងខេត្តមូលដ្ឋានដែលលោកធ្វើការ»។
កាលពីថ្ងៃទី៣០ ខែធ្នូ ឆ្នាំ២០២១ សាលាដំបូងខេត្តបាត់ដំបង បានផ្ដន្ទាទោសលោក កៅ ពិសិដ្ឋ ឱ្យជាប់ពន្ធនាគារចំនួន២ឆ្នាំ និងពិន័យជាប្រាក់ចំនួន៣លានរៀល ពាក់ព័ន្ធសំណុំរឿង «ញុះញង់ឱ្យប្រព្រឹត្តបទឧក្រិដ្ឋជាអាទិ៍» និង «រារាំងដល់ការអនុវត្តវិធានការ» ហើយកាលពីថ្ងៃទី០៥ ខែកក្កដា ឆ្នាំ២០២២ ចៅក្រមសាលាឧទ្ធរណ៍បាត់ដំបង បានសម្រេចតម្កល់សាលក្រមសាលាដំបូងខេត្តបាត់ដំបង ទុកជាបានការដដែល។
អង្គការអ្នកសារព័ត៌មានគ្មានព្រំដែន កាលពីថ្ងៃទី២១ ខែកក្កដា ឆ្នាំ២០២១ បានចេញសេចក្តីថ្លែងការណ៍មួយ ទាមទារឱ្យអាជ្ញាធរកម្ពុជាដោះលែងលោក កៅ ពិសិដ្ឋ ជាបន្ទាន់និងឥតលក្ខខណ្ឌ ដោយកាលណោះ អង្គការអន្តរជាតិមួយនេះថា រដ្ឋាភិបាលកម្ពុជាកំពុងប្រើលេសទប់ស្កាត់ជំងឺកូវីដ-១៩ ទៅបំបិទសំឡេងអ្នករិះគន់តែប៉ុណ្ណោះ៕