អធិការបតីអាល្លឺម៉ង់ លោក អូឡាហ្វ ស្កូល (Olaf Scholz) បានបញ្ជាក់នៅថ្ងៃអាទិត្យម្សិលមិញថា ប្រទេសរបស់លោកនឹងមិនបញ្ជូនយន្តហោះចម្បាំងទៅអ៊ុយក្រែនទេ ខណៈទីក្រុងកៀវ (Kyiv) អំពាវនាវឱ្យលោកខាងលិច ផ្ដល់អាវុធឱ្យខ្លួនកាន់តែច្រើនបន្ថែមទៀត ដើម្បីទប់ទល់នឹងការឈ្លានពានរបស់រុស្ស៊ី។ នេះបើតាមការរាយការណ៍ដោយសារព័ត៌មាន AFP ដែលត្រូវបានយកមកចុះផ្សាយបន្តដោយសារព័ត៌មាន Euronews។
ការថ្លែងបដិសេធក្នុងការបញ្ជូនយន្តហោះចម្បាំងទៅកាន់អ៊ុយក្រែននេះ ធ្វើឡើងបន្ទាប់ពីអាល្លឺម៉ង់ទើបតែប្រកាសកាលពីថ្ងៃពុធសប្ដាហ៍មុន ក្នុងការបញ្ជូនរថក្រោះប្រយុទ្ធ Leopard 2 ទៅកាន់ប្រទេសអ៊ុយក្រែន ដោយខ្លួនក៏បានអនុញ្ញាតឱ្យប្រទេសផ្សេងទៀតធ្វើដូច្នេះផងដែរ។
ទោះជាយ៉ាងណា ថ្លែងក្នុងបទសម្ភាសកាលពីថ្ងៃអាទិត្យ ជាមួយកាសែតក្នុងស្រុកមួយ អំពីប្រតិកម្មរបស់ខ្លួនចំពោះសំណើរបស់ទីក្រុងកៀវ ក្នុងការទទួលបានយន្តហោះចម្បាំង អធិការបតីអាល្លឺម៉ង់រូបនេះ ឱ្យដឹងថា៖ «សំណួរទាក់ទងនឹងយន្តហោះចម្បាំង មិនត្រូវបានធ្វើឡើងនោះទេ»។
លោកបន្ថែមថា៖ «បន្ទាប់ពីការសម្រេចចិត្ត [លើការបញ្ជូនរថក្រោះ] ត្រូវបានធ្វើឡើង ការជជែកពិភាក្សាថ្មីនឹងចាប់ផ្តើមនៅក្នុងប្រទេសលើបញ្ហាផ្សេងទៀតដែលមិនធ្ងន់ធ្ងរ និងធ្វើឱ្យប៉ះពាល់ដល់ទំនុកចិត្តរបស់ប្រជាពលរដ្ឋ ក្នុងការសម្រេចចិត្តរបស់រដ្ឋាភិបាល»។
គួរបញ្ជាក់ថា អាល្លឺម៉ង់ រួមនឹងសហរដ្ឋអាមេរិក កាលពីសប្ដាហ៍មុន បានប្រកាសក្នុងការបញ្ជូនរថក្រោះធុនធ្ងន់ទៅកាន់អ៊ុយក្រែន ដោយទីក្រុងកៀវលើកឡើងថា នឹងអាចធ្វើឱ្យកងទ័ពរបស់ខ្លួនមានលទ្ធភាពតទល់ជាមួយរុស្ស៊ីបាន។
ទាក់ទិននឹងករណីនេះ រុស្ស៊ីក៏បានប្រតិកម្មយ៉ាងខ្លាំងចំពោះការសម្រេចចិត្តរបស់អាល្លឺម៉ង់ ដែលអនុម័តលើការបញ្ជូនរថក្រោះទៅកាន់ប្រទេសអ៊ុយក្រែនផងដែរ ខណៈខ្លួនថា សកម្មភាពនេះនឹងបំផ្លាញទំនាក់ទំនងរវាងប្រទេសទាំង២ ដោយមិនអាចស្តារឡើងវិញបានឡើយ៕