អាជីវករជាង៣០០នាក់នៅផ្សារធំទួលសង្កែ ប្រមូលផ្ដុំមុខក្រសួងមហាផ្ទៃ ខណៈតំណាង៣នាក់ចូលបំភ្លឺ

ផ្សារធំទួលសង្កែ ហៅ ផ្សារសាំហាន់ កាលពីអំឡុងឆ្នាំ២០២១។ (ហ្វេសប៊ុក៖ អនុគណៈកម្មការស្រាវជ្រាវជំងឺកូវីដ១៩)

អាជីវករលក់ដូរនៅផ្សារធំទួលសង្កែ ហៅ ផ្សារ​សាំហាន់ បានឱ្យដឹងថា ពួកគេជាង៣០០នាក់បានប្រមូលផ្តុំគ្នានៅមុខក្រសួងមហាផ្ទៃ នៅថ្ងៃចន្ទ​នេះ ខណៈ​តំណាង​អាជីវករ​ ៣នាក់ ចូល​ឆ្លើយ​បំភ្លឺ​នៅ​ក្រសួង​មួយនេះ​ ក្រោយ​មាន​វិវាទ​ជាមួយ​ម្ចាស់​ផ្សារ។

លោក វុធ រ៉ាវី ជា​អាជីវករ​លក់​សម្លៀកបំពាក់នៅផ្សារ​សាំហាន់ រយៈពេល​៦ឆ្នាំមកហើយ​​ បាន​ប្រាប់​វីអូឌី​ថា តំណាង​អាជីវករ​ចំនួន​៣នាក់ត្រូវបានក្រសួងមហាផ្ទៃ​ ហៅទៅ​ឆ្លើយ​បំភ្លឺ ទៅតាមបណ្តឹងរបស់ម្ចាស់ផ្សារ ដែលប្តឹងពួកគេ​ថា​បាន​ញុះ​ញ​ង់​ឱ្យអាជីវករ​តវ៉ា។ លោក​បន្ត​ថា ខណៈ​​តំណាង​អាជីវករ​ ៣នាក់ ចូល​​បំ​ភ្លឺ​នៅក្រសួងមហាផ្ទៃនោះ គឺអាជីវករចំនួន៣៣០នាក់ តំណាង​ឱ្យ​អាជីវករចំនួន១ ០៣០​តូប ដែល​លក់​ដូ​រនៅផ្សារធំទួលសង្កែ ហៅ ផ្សារ​សាំហាន់ បាន​នាំគ្នាប្រមូលផ្តុំមុខក្រសួងផង​ដែរ ដើម្បីគាំទ្រតំណាងរបស់ខ្លួន។

លោក វុធ រ៉ាវី ឱ្យដឹង​ថា ដើមចម​ដែល​បណ្តាល​ឱ្យ​អាជីវករ​តវ៉ា និង​តំណាង​៣នាក់ ត្រូវ​​រង​បណ្តឹង​នៅ​ក្រសួងមហាផ្ទៃនោះ គឺដោយ​សារ​មាន​ការ​ដោះដូរ​ម្ចាស់​ផ្សារ​ថ្មី និង​ការ​ដំឡើងថ្លៃជួលតូបខ្ពស់ជាងមុនរហូត៣ ០០០ដុល្លារ រយៈ​ពេល​២ឆ្នាំ ខណៈម្ចាស់ផ្សារចាស់យកថ្លៃជួលតូបពីអាជីវករត្រឹមតែ១ ៥០០ដុល្លារ ដោយកុងត្រារយៈពេល​៣ឆ្នាំ។ លោក​ថា ក្រោយ​​​ពី​ក្រុមអាជីវករ​ផ្ទុះការតវ៉ាជាបន្តបន្ទាប់រួចមក ភាគី​ម្ចាស់​ផ្សារ​ថ្មី បាន​ប្តឹង​តំណាង​អាជីវករ ៣នាក់ ​ទៅ​ក្រសួង​មហាផ្ទៃ ដោយចោទថាបានញុះញង់ឱ្យអាជីវករតវ៉ាផ្សេងៗ។

លោកបន្ថែមថា៖ «ការលក់ដូរពីមុនមកហ្នឹង​មិនធ្លាប់មានការតវ៉ាទេ ទើបតែមានម្ចាស់ផ្សារមកក្តោបក្តាប់ថ្មីនេះទេ បានធ្វើឱ្យអាជីវករផ្ទុះការតវ៉ា ដោយសារតែការគាប​សង្កត់​អាជីវករ​ខ្លាំង​ពេក។ បង​ដឹង​ស្រាប់​ហើយ ​ទើប​ងើប​ពី​ជំងឺកូវីដ១៩ លក់​ដូរអត់​ដាច់​ទេ ហើយ​មក​គាប​សង្កត់​គ្នា​ តូបមួយ ២ ០០០ ​ទៅ៣ ០០០ដុល្លារ​អីចឹង គ្នាមានលុយអីណាបង់? ហើយ​​កា​រ​តវ៉ា​កន្លងមកហ្នឹងគឺជាការស្ម័គ្រ​​ចិត្ត​របស់បងប្អូនអាជីវករ​រៀងៗខ្លួនទេ គ្មានអ្នកណាបង្ខិតបង្ខំ ឬបំបះ​បំបោរ​ឱ្យអាជីវករ​ធ្វើៗ​​ គឺអត់ទេ»

តំណាងអាជីវករ​ លោក ស្រ៊ុន ភី ប្រាប់អ្នកសារព័ត៌មាន ​ក្រោយឆ្លើយ​បំភ្លឺនៅក្រសួងមហាផ្ទៃ ថាលោកមិនបានញុះញង់អាជីវករ​​ឱ្យតវ៉ា ឬ​ធ្វើសកម្មភាពប្រឆាំងម្ចាស់ផ្សារ​នោះទេ។ លោក​​ថា អាជីវករ​ផ្ទុះ​ការ​តវ៉ា​នោះ ដោយ​សារ​តែ​ពួក​គេរង​ការគាប​​សង្កត់ពីម្ចាស់ផ្សាររៀងៗខ្លួន និង​តវ៉ា​ដើម្បីផលប្រយោជន៍រៀងខ្លួនតែប៉ុណ្ណោះ។

លោកបន្ថែមថា៖ «ពាក់ព័ន្ធការចោទថាញុះញង់​នេះ យើង​សុំច្រានចោល​ទាំងស្រុង ដោយសារយើងទាំងអស់គ្នាធ្វើ គឺជាកម្លាំង​សាមគ្គី​រួម បាន​ន័យ​ថា ខ្ញុំមិនបានកៀរគរ​ហៅ​បងប្អូនអាជីវករទាំងហ្នឹង​ធ្វើសកម្មភាពផ្សេងៗទេ គឺ​ពួក​យើង​ស្ម័គ្រចូល​រួម​ទាំង​អស់​គ្នា ​ដើម្បី​ថែ​រក្សា ឬ​ដើម្បី​ការពារសិទ្ធិ​ក្នុងការលក់ដូររបស់ពួកយើងទាំងអស់គ្នា។ យើងមាន​តូបរៀង​ខ្លួន យើង​ត្រូវ​ការ​ពារ​តូបរៀងខ្លួន គ្មានអ្នកទៅញុះញង់បងប្អូនណាមួយទេ»

អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍យ៉ាងខ្លីថា ក្រុមអាជីវករបានរំសាយត្រលប់ទៅផ្ទះវិញ ក្រោយក្រសួងដោះស្រាយបញ្ចប់វិវាទនេះ ប៉ុន្តែតំណាងអាជីវករឱ្យដឹងថា ការឆ្លើយបំភ្លឺព្រឹកមិញនេះ គឺខាងក្រសួងមិនទាន់បានសម្រេចថាយ៉ាងណានៅឡើយទេ។

វីអូឌី មិនអាចសុំការឆ្លើយតប​ពីតំណាងផ្សារសាំហាន់ លោក​ គឹម ឆាយ ដែ​ល​ជាដើមបណ្តឹង​បានទេ ពាក់ព័ន្ធករណីនេះដោយទូរសព្ទមិនអាចទាក់ទងបាន។

ផ្សារធំទួល​សង្កែ​ ហៅ ផ្សារសាំហាន់ ស្ថិតនៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ បើតាមក្រុម​អាជីវករ ផ្សារនេះ​មាន​តូប​សរុប១ ០៣០​តូប ហើយ​​អាជីវករដែលជា​ម្ចាស់តូប​បានផ្ទុះការតវ៉ាទាំង​អស់​គ្នា ដើម្បីទាមទារកុំឱ្យម្ចាស់​ផ្សារ ឬ​អ្នក​​គ្រប់គ្រងថ្មីឡើងថ្លៃតូបខ្ពស់៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ