រដ្ឋបាលស្រុកអង្គស្នួល ខេត្តកណ្តាល បានហៅតំណាងកម្មកររោងចក្រកាត់ដេរសម្លៀកបំពាក់ បូវឃើរ ហ្គាមេន ហ្វេកធើរី ខេមបូឌា លីមីតធីត (Bowker Garment Factory Cambodia) CO.,LTD. ទៅដោះស្រាយវិវាទការងារ ក្រោយពីគ្មានដំណោះស្រាយពីក្រសួងការងារ។
នាយកដ្ឋានវិវាទការងារ នៃក្រសួងការងារ បានកោះហៅតំណាងកម្មករបម្រើការងារនៅរោងចក្រ បូវឃើរ ស្ថិតនៅឃុំបែកចាន ស្រុកអង្គស្នួល ខេត្តកណ្ដាល ទៅដោះស្រាយវិវាទការងារជាបន្តបន្ទាប់ ទៅតាមបណ្តឹងរបស់ថៅកែ ក្រោយពីកម្មករទាមទារទៅថៅកែឱ្យផ្តល់ប្រាក់ឈ្នួលអំឡុងពេលឈប់សម្រាករៀងរាល់ថ្ងៃសៅរ៍ រយៈពេល១ខែ ក្នុងខែធ្នូ ឆ្នាំ២០២២ ប៉ុន្តែពុំមានលទ្ធផលជាវិជ្ជមាននោះទេ។
ប្រធានសហព័ន្ធសហជីពឯករាជ្យ លោក រី សិទ្ធីណែត ដែលតាមដានករណីនេះ និងតំណាងឱ្យកម្មករនៅរោងចក្រ បូវឃើរ ប្រាប់វីអូឌីនៅថ្ងៃអង្គារនេះថា កាលពីម្សិលមិញនេះ អភិបាលស្រុកអង្គស្នួល ហៅតំណាងកម្មករ ក្នុងនោះក៏មានរូបលោកផងដែរ ឱ្យចូលដោះស្រាយវិវាទការងារជាមួយភាគីរោងចក្រ ប៉ុន្តែមិនទទួលបានដំណោះស្រាយជាវិជ្ជមាននោះទេ។
ប្រធានសហព័ន្ធសហជីពរូបនេះ បន្តថា ភាគីរោងចក្រសុំយកសំណើរបស់កម្មករទៅពិភាក្សាជាមួយថ្នាក់ដឹកនាំសិន និងសន្យាផ្តល់ចម្លើយមកភាគីកម្មករនៅថ្ងៃនេះវិញ។
លោកបន្ថែមថា៖ «តើក្រុមហ៊ុនមានលទ្ធភាពប៉ុន្មានសម្រាប់ផ្តល់ជូនកម្មករឱ្យក្រុមហ៊ុនឆ្លើយមកសិន ៥០ភាគរយ ឬ៣០ភាគរយ ឱ្យគាត់ឆ្លើយសិន។ ដំបូង បើគាត់អត់ព្រម យើងទាមទារប្រាក់ឈ្នួល ១០០ភាគរយ ព្រោះវាជាច្បាប់។ បើយើងទាមទារ ៥០ភាគរយ វាអត់មានក្នុងច្បាប់»។
លោក រី សិទ្ធីណែត លើកឡើងថា ករណីថៅកែឱ្យដាក់ពាក្យឈប់ដោយខ្លួនឯងដោយគ្មានប្រាក់ឈ្នួលនេះ គឺជាការមិនទទួលខុសត្រូវ កេងប្រវ័ញ្ចកម្លាំងពលកម្ម និងជាទង្វើខុសច្បាប់។ លោកថា ប្រសិនបើរោងចក្រអត់មានការងារឱ្យកម្មករធ្វើទេ គឺម្ចាស់រោងចក្រត្រូវជូនដំណឹងទៅនាយកដ្ឋានអធិការការងារ ដើម្បីសុំព្យួរការងារកម្មករ ប៉ុន្តែលោកថា រោងចក្រ បូវឃើរ នៅមានការងារឱ្យកម្មករធ្វើ និងមានការងារថែមម៉ោងពីថ្ងៃចន្ទដល់ថ្ងៃសុក្រផងដែរ។
លោក រី សិទ្ធីណែត ឱ្យដឹងថា ការសម្របសម្រួលដោះស្រាយវិវាទរបស់នាយកដ្ឋានវិវាទការងារកន្លងមកនេះ គឺមិនបានបញ្ចូលសម្តីភាគីកម្មករទៅក្នុងកំណត់ហេតុនោះទេ ដែលធ្វើឱ្យភាគីកម្មករមិនសប្បាយចិត្ត និងផ្តិតស្នាមមេដៃលើកំណត់ហេតុនៃកិច្ចប្រជុំទាំងនោះ។
វីអូឌី មិនអាចសុំការឆ្លើយតបពីអភិបាលស្រុកអង្គស្នួល លោក ខុន សេរីរដ្ឋា និងប្រធានរដ្ឋបាលរោងចក្រ បូវឃើរ លោក ស៊ាង រដ្ឋា បានទេ នៅថ្ងៃអង្គារនេះ ដោយទូរសព្ទចូលគ្មានអ្នកទទួល។
បើតាមតំណាងកម្មករ លោក ឆន ចាន់ រោងចក្រ បូវឃើរ ជារោងចក្រកាត់ដេរសម្លៀកបំពាក់មានកម្មករជាង ៤ ៣០០នាក់បម្រើការងារ និងមានថៅកែជាជនជាតិហុងកុង។
កាលពីថ្ងៃទី១៧ ខែធ្នូ ឆ្នាំ២០២២ សហព័ន្ធសហជីពឯករាជ្យ និងអង្គការដៃគូផ្សេងទៀត បានផ្ញើលិខិតមួយទៅក្រុមហ៊ុនបញ្ជាទិញ អាឌីដាស (ADIDAS) ដើម្បីសុំអន្តរាគមន៍ដោះស្រាយវិវាទការងារជូនកម្មករនៅរោងចក្រ បូវឃើរ ដោយអះអាងថា រោងចក្រមួយនេះបានបង្ខំកម្មករឱ្យដាក់ពាក្យសុំច្បាប់ឈប់សម្រាកដោយគ្មានប្រាក់ឈ្នួល រៀងរាល់ថ្ងៃសៅរ៍ នៅក្នុងខែធ្នូ ឆ្នាំ២០២២។
ក្នុងលិខិតនេះ ក្រុមសហជីពបានស្នើដល់អ្នកបញ្ជាទិញ Adidas ជំរុញ និងដាក់សម្ពាធទៅលើក្រុមហ៊ុន បូវឃើរ ត្រូវអនុវត្តច្បាប់ស្តីពីការងារឱ្យបានត្រឹមត្រូវ ពោលគឺឱ្យកម្មករឈប់សម្រាកដោយមានប្រាក់ឈ្នួលត្រឹមត្រូវ ក្នុងករណីរោងចក្រអត់ការងារឱ្យកម្មករធ្វើការពិតប្រាកដមែន៕
