សមត្ថកិច្ចនឹងពិចារណាជុំវិញការចាត់វិធានការផ្លូវច្បាប់ លើអតីតមន្ត្រីក្រសួងកសិកមុ្មរុក្ខាប្រមាញ់ និងនេសាទ ដែលមិនព្រមចេញមុខសុំទោសជាសាធារណៈ ពាក់ព័ន្ធការបង្ហោះសារកាលពីចុងឆ្នាំមុនថា សមត្ថកិច្ចយកសារធាតុផ្សេងៗមកដុតបំផ្លាញក្លែងបន្លំថាជាសារធាតុគ្រឿងញៀន។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន មានប្រសាសន៍នៅថ្ងៃពុធថា កាលពីចុងឆ្នាំ២០២២ លោក នី ណាក់ ម្ចាស់គណនីហ្វេសប៊ុក IMan-KH ប្រតិដ្ឋព័ត៌មានចោទសមត្ថកិច្ចថា យកសារធាតុផ្សេងៗមកដុតបំផ្លាញក្លែងបន្លំជាសារធាតុញៀន។ ករណីនេះ លោកថា ក្រសួងបានប្រាប់ទៅម្ចាស់គណនីហ្វេសប៊ុករូបនោះ ឱ្យចេញមុខសុំទោសជាសាធារណៈពាក់ព័ន្ធការបង្ហោះសារកាលពីចុងឆ្នាំមុន ដើម្បីកុំឱ្យសាធារណរជនមានការភាន់ច្រឡំ។ ប៉ុន្តែត្រូវបាន ម្ចាស់គណនីនោះ ឈ្មោះ លោក នី ណាក់ បដិសេធសុំទោសនេះ។
លោក ឆាយ គឹមខឿន បន្ថែមថា សមត្ថកិច្ចកំពុងពិចារណា ក្នុងការចាត់វិធានការច្បាប់លើលោក នី ណាក់ ពាក់ព័ន្ធរឿងប្រតិដ្ឋព័ត៌មាន ចោទសមត្ថកិច្ចថា យកសារធាតុផ្សេងៗមកដុតបំផ្លាញក្លែងបន្លំជាសារធាតុញៀន។
លោកមានប្រសាសន៍ថា៖ «ការឆ្លើយតបរបស់គាត់ជាមួយសមត្ថកិច្ចបែបនេះ បានបញ្ជាក់ជូនសាធារណជនបានជ្រាបហើយថា មនុស្សគាត់របៀបម៉េច ។ ការចាត់វិធានការរបស់ស្ថាប័ន ឬមន្ត្រីអនុវត្តច្បាប់ ផ្អែកទៅលើនីតិវីធី ផ្អែកទៅលើវត្ថុតាងច្បាស់លាស់។ និយាយអ៊ីចឹង មិនមែនអត់មានភស្តុតាងនោះទេ វាស្ថិតនៅក្នុងការពិចារណា និងការកំណត់ថាត្រូវធ្វើម៉េចបន្តទៀត ដោយចាត់វិធានការយ៉ាងណានោះ ខ្ញុំអត់បញ្ជាក់ជូនទេ»។
តាមសេចក្តីប្រកាសព័ត៌មានរបស់អ្នកនាំពាក្យនៃអគ្គស្នងការដ្ឋាននគរបាលជាតិ ដែលវីអូឌីទទួលបាននៅថ្ងៃទី១ ខែកុម្ភៈ បានសរសេរថា ថ្មីៗនេះមានគេហទំព័រហ្វេសប៊ុក IMan-KH របស់ឈ្មោះ នី ណាក់ បានបង្ហោះសារផ្សព្វផ្សាយព័ត៌មានប្រតិដ្ឋមានចរិតមួលបង្កាច់ បរិហារកេរ្តិ៍ ដោយបានប្រមាថយ៉ាងធ្ងន់ធ្ងរដល់កិត្តិយស និងសេចក្តីថ្លៃថ្នូររបស់កងកម្លាំងនគរបាលជាតិ។
សេចក្តីប្រកាសដដែលបន្តថា លោក នី ណាក់ បានចោទប្រកាន់សមត្ថកិច្ចថា យកសារធាតុផ្សេងៗមកដុតបំផ្លាញបន្លំថាជាសារធាតុញៀន រួមទាំងចោទកម្លាំងនគរបាលជាតិថា ជាចោរដ៏សាហាវជាមេខ្លោងធំនៃអំពើជួញដូរគ្រឿងញៀនទៀតផង។ ករណីនេះ ត្រូវបានសមត្ថកិច្ចអះអាងថា លោក នី ណាក់ មានចេតនា វាយប្រហារបំផ្លាញកិត្យានុភាព កិត្តិយស និងសេចក្តីថ្លៃថ្នូររបស់កម្លាំងនគរបាលជាតិ ក្នុងគោលបំណងលាបពណ៌ញុះញង់ធ្វើឱ្យសាធារណជនមានការភាន់ច្រឡំ អស់ជំនឿបាត់បង់ភាពកក់ក្តៅ និងរើសអើងចំពោះកងកម្លាំងនគរបាលជាតិ។
សេចក្តីប្រកាសព័ត៌មានបញ្ជាក់ថា៖ «ក្នុងនាមកងកម្លាំងអនុវត្តច្បាប់យើងខ្ញុំនឹងប្រើប្រាស់គ្រប់វិធានការស្របតាមច្បាប់ប្រឆាំងនូវរាល់ទង្វើទាំងឡាយណាដែលធ្វើឱ្យប៉ះពាល់ដល់កិត្យានុភាព និងកិត្តិយសរបស់កងកម្លាំងនគរបាលជាតិ»។
លោក នី ណាក់ មានប្រសាសន៍នៅថ្ងៃពុធថា លោកមិនសុំទោសជាសាធារណៈ តាមការបង្គាប់បញ្ជារបស់ក្រសួង ពាក់ព័ន្ធរឿងលោករិះគន់សមត្ថកិច្ចថា បានយកសារធាតុផ្សេងៗមកដុតបំផ្លាញក្លែងបន្លំជាសារធាតុញៀន ពីព្រោះអ្វីដែលលោកលើកឡើងនេះ គ្រាន់តែជាការបញ្ចេញមតិតាមអ្នកជាប់ឃុំនៅក្នុងពន្ធនាគារតែប៉ុណ្ណោះ។
យ៉ាងណា លោក នី ណាក់ បង្ហាញការព្រួយបារម្ភពីសុវត្ថិភាព ក្រោយពីសមត្ថកិច្ច ឱ្យលោកចេញមុខសុំទោសជាសាធារណៈ ពាក់ព័ន្ធករណីនេះ។
លោកមានប្រសាសន៍ថា៖ «សម្រាប់ខ្ញុំមានការព្រួយបារម្ភពីសុវត្ថិភាព ពីព្រោះយើងទើបតែចេញពីពន្ធនាគារថ្មីៗដែរ ប៉ុន្តែការបញ្ចេញមតិវាតែងតែមានការគំរាមកំហែង មានការធ្វើទុកបុក្ខម្នេញ មានការចាប់ និងមានការចាត់វិធានការពីខាងតុលាការជាដើម។ ដូច្នេះសូមឱ្យអង្គការសង្គមស៊ីវិល ក៏ដូចជាអ្នកធ្វើការសិទ្ធិមនុស្សជួយតាមដានរឿងរបស់ខ្ញុំផង»។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា មានប្រសាសន៍ថា ចំពោះរឿងដែលលោក នី ណាក់ លើកឡើង តាមសម្តីរបស់អ្នកជាប់ឃុំថា សមត្ថកិច្ចយកសារធាតុផ្សេងៗមកដុតបំផ្លាញ ដើម្បីក្លែងបន្លំជាសារធាតុញៀននោះ តាមច្បាប់មិនមានអ្វីដែលត្រូវមានទោសនោះទេ ពីព្រោះសេរីភាពបញ្ចេញមតិមានចែងនៅក្នុងច្បាប់។
លោក ស៊ឹង សែនករុណា ជំរុញទៅអាជ្ញាធរស្រាវជ្រាវឱ្យបានគ្រប់ជ្រុងជ្រោយ មុននឹងធ្វើការចោទប្រកាន់លើ លោក នី ណាក់ ដើម្បីកុំឱ្យរងការរិះគន់ពីសហគមន៍ជាតិ និងអន្តរជាតិ ។
លោកមានប្រសាសន៍ថា៖ «ការចាត់វិធានការ គួរតែមានការពិនិត្យឱ្យបានច្បាស់លាស់ជៀសវាងការរិះគន់អំពីសាធារណៈមតិ អំពីការចាត់វិធានការទៅលើការបញ្ចេញមតិរបស់សកម្មជនសង្គម ពាក់ព័ន្ធនឹងបញ្ហាសង្គមដែលកំពុងកើតមានឡើង។ អ៊ីចឹងហើយចង់មិនចង់ បើសិនជាចាត់វិធានការទៅលើលោក នី ណាក់ ដោយមិនមានមូលដ្ឋានច្បាស់លាស់ ច្បាស់ជារងការរិះគន់ពីសហគមន៍ជាតិ និងអន្តរជាតិទៀតហើយ»។
កាលពីចុងឆ្នាំ ២០១៩ លោក នី ណាក់ ធ្លាប់បានបង្ហោះសារតាមហ្វេសប៊ុករបស់ខ្លួន ដោយមានខ្លឹមសារថា ទិញម៉ាស់ពាក់ឱ្យកូនមាន់ ក្នុងពេលដែលប្រទេសកម្ពុជាកំពុងជួបវិបត្តិជំងឺកូវីដខ្លាំង។ បន្ទាប់ពីបង្ហោះសារនេះ ត្រូវបានក្រសួងកសិកម្ម រុក្ខាប្រមាញ់ និងនេសាទប្តឹង ហើយត្រូវតុលាការរាជធានីភ្នំពេញផ្តន្ទាទោសលោក នី ណាក់ ឱ្យជាប់ពន្ធនាគារចំនួន ១៨ ខែ និងពិន័យប្រាក់ចូលថវិការដ្ឋចំនួន ២លានកាលពីខែសីហា ឆ្នាំ២០២០ ក្រោមការចោទប្រកាន់ពីបទជេរប្រមាថជាសាធារណៈ និងញុះញង់ឱ្យមានការរើសអើង។
ក្រោយមក នៅថ្ងៃទី១០ ខែមិថុនា ឆ្នាំ ២០២២ លោក នី ណាក់ ត្រូវបានដោះលែងឱ្យមានសេរីភាពឡើងវិញ បន្ទាប់ពីតុលាការអនុវត្តទោសរបស់លោកចប់តាមអំណាចសាលក្រមស្ថាពររបស់សាលាដំបូងរាជធានីភ្នំពេញ៕