មន្ត្រីជាន់ខ្ពស់សាលាឧទ្ធរណ៍រាជធានីភ្នំពេញ អះអាងថា នឹងពន្លឿននីតិវិធីបើកសវនាការលើសំណុំរឿងកញ្ញា សេង ធារី ខណៈមេធាវីបញ្ជាក់ថា កូនក្ដីរបស់ខ្លួនបានប្ដឹងឧទ្ធរណ៍ប្រឆាំងនឹងសេចក្ដីសម្រេចតុលាការជាន់ទាបដែលបានកាត់ទោសឱ្យកញ្ញាជាប់ពន្ធនាគារ៦ឆ្នាំរួចហើយ។
កាលពីថ្ងៃទី ១៤ ខែមិថុនា ឆ្នាំ២០២២ សាលាដំបូងរាជធានីភ្នំពេញ បានប្រកាសសាលក្រមផ្ដន្ទាទោសមេធាវីអន្តរជាតិ និងមានសញ្ជាតិខ្មែរអាមេរិករាំងផង កញ្ញា សេង ធារី ឱ្យជាប់ពន្ធនាគារ ៦ ឆ្នាំ ក្រោមបទ «ញុះញង់ និងរួមគំនិតក្បត់» ពាក់ព័ន្ធដំណើរវិលត្រឡប់របស់លោក សម រង្ស៊ី កាលពីឆ្នាំ២០១៩។
លោក សំ ទិត្យសីហា មេធាវីការពារក្ដីឱ្យកញ្ញា សេង ធារី ប្រាប់វីអូឌីនៅថ្ងៃពុធថា កូនក្ដីរបស់លោកបានប្ដឹងឧទ្ធរណ៍រួចហើយ បន្ទាប់ពីតុលាការក្រុងភ្នំពេញកាត់ទោសឱ្យគាត់ជាប់ពន្ធនាគារកាលពីខែមិថុនា ឆ្នាំ២០២២ ប៉ុន្តែមកដល់ថ្ងៃទី១ ខែកុម្ភៈ លោកមិនទាន់ដឹងថា សាលាឧទ្ធរណ៍នឹងបើកសវនាការនៅថ្ងៃណានោះឡើយ។
លោកបង្ហាញក្ដីសង្ឃឹមថា តុលាការជាន់ខ្ពស់នឹងផ្ដល់យុត្តិធម៌ដល់កញ្ញា សេង ធារី ដោយសារ កូនក្ដីរបស់លោក ជាមនុស្សស្អាតស្អំ មិនបានប្រព្រឹត្តបទល្មើសដូចជាការចោទប្រកាន់ឡើយ។
លោកថា៖«សុខភាពរបស់គាត់មានភាពល្អប្រសើរទេ។ គាត់បានហាត់ប្រាណ គាត់បានអានសៀវភៅ។ អ្វីដែលខ្ញុំចាប់អារម្មណ៍ ជំហរ និងឆន្ទៈគាត់ នៅតែអះអាងគាត់មិនបានប្រព្រឹត្តកំហុសដូចការចោទប្រកាន់។ គាត់ប្រាប់ថា គាត់នឹងធ្វើការតស៊ូមតិ ដោយអហិង្សា ហើយសង្ឃឹមថា តុលាការជាន់ខ្ពស់នឹងផ្ដល់យុត្តិធម៌ឱ្យគាត់ដែលជាជនរងគ្រោះ មួយដែលមិនប្រព្រឹត្តបទល្មើសដូចការចោទប្រកាន់»។
អ្នកនាំពាក្យសាលាឧទ្ធរណ៍រាជធានីភ្នំពេញ លោក ជា ម៉េត ប្រាប់វីអូឌីនៅថ្ងៃទី១ ខែកុម្ភៈថា សាលាឧទ្ធរណ៍នឹងពិនិត្យ ដោយពន្លឿននីតិវិធីសវនាការ ប្រសិនបើកញ្ញា សេង ធារី បានប្ដឹងមកឧទ្ធរណ៍រួចមែននោះ។
លោកបន្តថា៖«ធម្មតារឿងមាននៅក្នុងឃុំ ភាពច្រើន យើងនឹងពន្លឿននីតិវិធី»។
ក្នុងជំនួបទ្វេភាគីជាមួយលោក ហ៊ុន សែន កាលពីថ្ងៃទី១២ ខែវិច្ឆិកា ឆ្នាំ២០២២ មេដឹកនាំសហរដ្ឋអាមេរិក លោក ចូ បៃដិន បានស្នើឱ្យដោះលែងសកម្មជនដែលត្រូវបានឃុំខ្លួនដោយចោទប្រកាន់ក្រោមហេតុផលនយោបាយ រួមទាំងពលរដ្ឋខ្មែរអាមេរិកាំង កញ្ញា សេង ធារីផងដែរ។
ក្រៅពីលោក ចូ បៃដិន នោះ អគ្គលេខាធិការអង្គការសហប្រជាជាតិលោក Antonio Guterres បានស្នើឱ្យកម្ពុជាបើកលំហសង្គមស៊ីវិល ពលរដ្ឋ អ្នកការពារសិទ្ធិមនុស្ស និងសកម្មជនបរិស្ថាន។ លោកបញ្ជាក់ថា សង្គមស៊ីវិល ពលរដ្ឋ អ្នកការពារសិទ្ធិមនុស្ស និងសកម្មជនបរិស្ថាន ត្រូវតែបើកចំហ និងទទួលបានការការពារ។
ការស្នើរបស់អគ្គលេខាធិការអង្គការសហប្រជាជាតិលោក Antonio Guterres ធ្វើឡើងអំឡុងពេលដែលលោកកំពុងមានវត្តមាននៅរាជធានីភ្នំពេញ ដើម្បីចូលរួមកិច្ចប្រជុំកំពូលអាស៊ាន។
កញ្ញា សេង ធារី ដែលមានសញ្ជាតិអាមេរិកាំង និងជាមេធាវីអន្តរជាតិមួយរូបផងនោះ ត្រូវបានលោក រស់ ពិសិដ្ឋ ចៅក្រមជំនុំជម្រះនៃសាលាដំបូងរាជធានីភ្នំពេញ កាលពីថ្ងៃទី១៤ ខែមិថុនា ឆ្នាំ២០២២ ផ្ដន្ទាទោសដាក់ពន្ធនាគាររយៈពេល៦ឆ្នាំ ពីបទ «ញុះញង់ និងរួមគំនិតក្បត់»។
ក្រោយការប្រកាសសាលក្រមមួយថ្ងៃ ពោលគឺនៅថ្ងៃទី១៥ ខែមិថុនា ឆ្នាំ២០២២ សមត្ថកិច្ចរាជធានីភ្នំពេញបានបញ្ជូនកញ្ញា សេង ធារី ចេញពីពន្ធនាគារព្រៃស រាជធានីភ្នំពេញ ទៅកាន់ពន្ធនាគារខេត្តព្រះវិហារ ក្រោមហេតុផលដើម្បីរក្សាសន្តិសុខសណ្តាប់ធ្នាប់៕