ចៅក្រមជំនុំជម្រះនៃតុលាការកំពូល ប្រកាសសាលដីកាដោយតម្កល់សាលដីកាសាលាឧទ្ធរណ៍បាត់ដំបងទុកជាបានការដដែល ដោយឱ្យអ្នកសារព័ត៌មានអនឡាញម្នាក់ឈ្មោះ កៅ ពិសិដ្ឋ បន្តជាប់ពន្ធនាគារ ២ឆ្នាំ និងពិន័យជាប្រាក់ចំនួន៣លានរៀលដដែល។
ប្រធានចៅក្រមជំនុំជម្រះ នៃតុលាការកំពូល លោក គង់ ស្រ៊ីម ប្រកាសនៅព្រឹកថ្ងៃទី១ ខែកុម្ភៈ ឆ្នាំ២០២៣ ថាការដែល លោក កៅ ពិសិដ្ឋ បានបង្ហោះហ្វេសប៊ុក ដោយរិះគន់ថា ប្រជាជនខ្មែរមិនពេញចិត្តលើការដឹកនាំ ឬថាទ្រព្យសម្បត្តិរបស់នាយករដ្ឋមន្ត្រី ហ៊ុន សែន បានមកពីអំពើពុករលួយ និងថាវ៉ាក់សាំងចិនមិនទាន់ទទួលស្គាល់ដោយអង្គការសុខភាពពិភពលោក ជាដើមនោះ ពិតជាបានប្រព្រឹត្តបទល្មើសពិតមែន។
បន្ថែមពីនេះ ក្រមជំនុំជម្រះនៃតុលាការកំពូល បានសម្រេចប្ដូរបទចោទលើលោក កៅ ពិសិដ្ឋ ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ទៅជាបទ «ប្រព្រឹត្តអំពើបង្កឱ្យវឹកវរធ្ងន់ធ្ងរដល់សន្តិសុខសង្គម» ហើយចំណែកបទចោទ «រារាំងដល់ការអនុវត្តវិធានការ» នៅរក្សាទុកដដែល។
លោក នួន ផានិត មេធាវីការពារសិទ្ធិឱ្យលោក កៅ ពិសិដ្ឋ នៅតែយល់ថា ការដែលចៅក្រមនៅតែសម្រេចបែបនេះ គឺជារឿងអយុត្តិធម៌សម្រាប់កូនក្ដីរបស់លោក ដោយគ្រាន់តែអនុវត្តសេរីភាពបញ្ចេញមតិរបស់ខ្លួនប៉ុណ្ណោះ។
លោកថា៖ «ខ្ញុំយល់ថាជាសិទ្ធិសេរីភាពបញ្ចេញមតិ ទោះបីជាការបញ្ចេញមតិរបស់គាត់ហ្នឹង វាជ្រុលជ្រួសពីការពិត ជាការចោទប្រកាន់ទាក់ទងនឹងអំពើពុករលួយ ការរិះគន់ពីប្រសិទ្ធភាពវ៉ាក់សាំងកូវីដ-១៩ របស់ប្រទេសចិនមានប្រសិទ្ធភាពដែរឬទេ តែការចោទប្រកាន់ពីបទហ្នឹងវាធ្ងន់ធ្ងរពេក»។
ចំណែកអ្នកស្រី កៅ ម៉ាលីស អាយុ៣៤ឆ្នាំ ដែលជាប្អូនស្រីរបស់លោក កៅ ពិសិដ្ឋ សោកស្ដាយដែលតុលាការកំពូលសម្រេចផ្ដន្ទាទោសលើបងប្រុសឱ្យបន្តជាប់ពន្ធនាគារ ព្រោះអ្នកស្រីយល់ថា បងប្រុសខ្លួនមិនបានប្រព្រឹត្តបទល្មើស ដោយគ្រាន់តែបង្ហោះហ្វេសប៊ុកនោះទេ។
អ្នកស្រីថា៖ «សោកស្ដាយហ្នឹងហើយ បើគេមិនព្រម ធ្វើម៉េច! មានតែសោកស្ដាយហ្នឹងហើយ»។
បើតាមកតិកាសញ្ញាអន្តរជាតិ ស្ដីពីសិទ្ធិពលរដ្ឋ និងសិទ្ធិនយោបាយ មាត្រា១៩ ចែងថា ជនគ្រប់រូបមានសិទ្ធិប្រកាន់យកមតិយោបល់ដោយគ្មានការជ្រៀតជ្រែក ហើយជនគ្រប់រូបមានសិទ្ធិសេរីភាពក្នុងការបញ្ចេញមតិ សិទ្ធិនេះត្រូវរាប់បញ្ចូលទាំងសេរីភាពស្រាវជ្រាវព័ត៌មាន ទទួលនិងផ្សព្វផ្សាយព័ត៌មាន និងគំនិតសព្វបែបយ៉ាងដោយមិនគិតពីព្រំដែន ដោយផ្ទាល់មាត់ សរសេរ ឬបោះពុម្ព តាមទម្រង់សិល្បៈ ឬក៏ដោយមធ្យោបាយផ្សព្វផ្សាយដទៃទៀត តាមការជ្រើសរើសរបស់ខ្លួន។
មាត្រាដដែលនេះថា ការប្រើប្រាស់សិទ្ធិដែលចែងខាងលើនេះ តម្រូវឱ្យមានករណីយកិច្ច និងការទទួលខុសត្រូវពិសេស។ ដូច្នេះការប្រើប្រាស់សិទ្ធិនេះអាចមានការរឹតត្បិតមួយចំនួនដែលត្រូវកំណត់ដាច់ខាតដោយច្បាប់ និងដែលចាំបាច់ ដើម្បី គោរពសិទ្ធិ និងកិត្តិសព្ទរបស់អ្នកដទៃ និងការពារសន្តិសុខជាតិ សណ្តាប់ធ្នាប់សាធារណៈ សុខភាព ឬសីលធម៌។
ដោយឡែក ច្បាប់ស្ដីពីរបបសារព័ត៌មានវិញ ក៏មិនមានបញ្ញត្តិអំពីការផ្ដន្ទាទោសដាក់ពន្ធនាគារនោះដែរ ដោយគ្រាន់តែចង្អុលបង្ហាញឱ្យមានការកែតម្រូវ លុបចេញ ឬត្រូវរងពិន័យជាប្រាក់ប៉ុណ្ណោះ។
ទោះជាយ៉ាងណាក៏ដោយ នាយិកាស្ដីទី នៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) អ្នកស្រី ឆន សុគន្ធា ចាត់ទុកការសរសេរសារនៅបណ្តាញសង្គមហ្វេសប៊ុករបស់លោក កៅ ពិសិដ្ឋ គឺជាសេរីភាពនៃការបញ្ចេញមតិប៉ុណ្ណោះ។
អ្នកស្រីយល់ថា ការសម្រេចរបស់តុលាការនេះ គឺជារឿងអយុត្តិធម៌សម្រាប់លោក កៅ ពិសិដ្ឋ ដោយសារនៅក្នុងប្រទេសកម្ពុជាយើង ក្នុងរដ្ឋធម្មនុញ្ញបានចែងពីសិទ្ធិសេរីភាពបញ្ចេញមតិ ហើយប្រទេសកម្ពុជាក៏ជាហត្ថលេខីនៃកតិកាសញ្ញា និងអនុសញ្ញាសិទ្ធិមនុស្សអន្តរជាតិនានា ហើយដែលខ្លឹមសារនៃកតិកាសញ្ញានិងអនុសញ្ញាទាំងនោះក៏ត្រូវបានដាក់ចូលក្នុងរដ្ឋធម្មនុញ្ញកម្ពុជាផងដែរ។
អ្នកស្រីថា៖ «អ៊ីចឹងការបញ្ចេញមតិយោបល់របស់លោក ពិសិដ្ឋ មិនមែនមានន័យថាឱ្យតែមានការរិះគន់ឱ្យមានលក្ខណៈប្រសើរឡើង គឺជាការរិះគន់ និងការបង្អាប់ទេ»។
លោក កៅ ពិសិដ្ឋ អ្នកសារព័ត៌មានរបស់គេហទំព័រ www.srbreakingnews.com ត្រូវបានសមត្ថកិច្ចខេត្តបាត់ដំបង ចាប់ខ្លួនកាលអំឡុងខែកក្កដា ឆ្នាំ២០២១។
អង្គការអ្នកសារព័ត៌មានគ្មានព្រំដែន កាលពីថ្ងៃទី២១ ខែកក្កដា ឆ្នាំ២០២១ បានចេញសេចក្តីថ្លែងការណ៍មួយ ទាមទារឱ្យអាជ្ញាធរកម្ពុជាដោះលែងលោក កៅ ពិសិដ្ឋ ជាបន្ទាន់និងឥតលក្ខខណ្ឌ ដោយកាលណោះ អង្គការអន្តរជាតិមួយនេះថា រដ្ឋាភិបាលកម្ពុជាកំពុងប្រើលេសទប់ស្កាត់ជំងឺកូវីដ-១៩ ទៅបំបិទសំឡេងអ្នករិះគន់តែប៉ុណ្ណោះ៕