ប្រធានាធិបតីស្តីទីមីយ៉ាន់ម៉ា បានលើកឡើងនៅឯកិច្ចប្រជុំថ្នាក់ដឹកនាំ កាលពីថ្ងៃពុធម្សិលមិញថា របបយោធាមីយ៉ាន់ម៉ា បានបន្តដាក់ប្រទេសក្នុងភាពអាសន្នរយៈពេល ៦ខែទៀត ខណៈក្រុមអ្នកតវ៉ាបានរួមគ្នា «តវ៉ាដោយស្ងៀមស្ងាត់» ចំពេលខួប២ឆ្នាំនៃរដ្ឋប្រហារយោធា។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន CNA នៅថ្ងៃទី១ ខែកុម្ភៈ ឆ្នាំ២០២៣។
មេដឹកនាំរបបយោធាមីយ៉ាន់ម៉ាលោក មីន អ៊ុងឡាំង (Min Aung Hlaing) នៅក្នុងកិច្ចប្រជុំមួយកាលពីថ្ងៃអង្គារ ជាមួយក្រុមប្រឹក្សាការពារជាតិ និងសន្តិសុខជាតិ (NDSC) ដែលគាំទ្រដោយកងទ័ព ក៏បានលើកឡើងផងដែរថា ការបោះឆ្នោតពហុបក្សត្រូវតែធ្វើឡើង «ដូចដែលប្រជាជនចង់បាន»។
លោកមិនបានបញ្ជាក់ពីពេលវេលាកំណត់សម្រាប់ការបោះឆ្នោត ដែលមិនអាចធ្វើឡើងក្នុងអំឡុងពេលដាក់ប្រទេសក្នុងភាពអាសន្នឡើយ។ ក្រុមអ្នករិះគន់ បាននិយាយថា ការបោះឆ្នោតអាចនឹងមានការក្លែងបន្លំដើម្បីរក្សាអំណាចរបស់យោធា។
ប្រធានាធិបតីស្តីទីមីយ៉ាន់ម៉ាលោក យីន វី (Myint Swe) បានមានប្រសាសន៍ថា៖ «ទោះបីជាយោងទៅតាមមាត្រា៤២៥ នៃរដ្ឋធម្មនុញ្ញ [ការដាក់ប្រទេសក្នុងភាពអាសន្ន] អាចធ្វើឡើងបានតែ ២ដងប៉ុណ្ណោះ ស្ថានភាពបច្ចុប្បន្ន គឺស្ថិតនៅក្រោមកាលៈទេសៈខុសប្រក្រតី ហើយវាសមស្របក្នុងការប្រកាសដាក់ប្រទេសក្នុងភាពអាសន្នម្តងទៀតដែលមានរយៈពេល ៦ខែ»។
ក្រុមអ្នកតវ៉ា និងមេដឹកនាំជនស៊ីវិលដែលនិរទេសខ្លួនបានប្តេជ្ញាបញ្ចប់នូវអ្វីដែលពួកគេហៅថា «ការដណ្តើមអំណាចខុសច្បាប់» របស់កងទ័ព។ នៅតាមទីក្រុងធំៗនៅទូទាំងប្រទេសមីយ៉ាន់ម៉ា ផ្លូវនានាមានសភាពស្ងប់ស្ងាត់ ខណៈប្រជាពលរដ្ឋស្នាក់ដើម្បីសម្តែងនូវការតវ៉ាដោយភាពស្ងប់ស្ងាត់ ហើយអ្នកគាំទ្រលទ្ធិប្រជាធិបតេយ្យរាប់រយនាក់ បានប្រមូលផ្តុំគ្នានៅក្នុងប្រទេសថៃ និងហ្វីលីពីន។
នៅក្នុងទីក្រុងពាណិជ្ជកម្មសំខាន់ៗនៃទីក្រុងយ៉ាំងហ្គោន (Yangon) និងម៉ាន់ដាឡាយ (Mandalay) រូបភាពនៅលើប្រព័ន្ធផ្សព្វផ្សាយសង្គម បានបង្ហាញពីផ្លូវដែលមានសភាពស្ងប់ស្ងាត់ដែលក្រុមប្រឆាំងរដ្ឋប្រហារហៅថា «ការតវ៉ាដោយស្ងៀមស្ងាត់» ប្រឆាំងនឹងរបបយោធា។ សកម្មជនប្រជាធិបតេយ្យបានក្រើនរម្លឹកប្រជាពលរដ្ឋកុំឱ្យដើរតាមដងផ្លូវចន្លោះពីម៉ោង១០ព្រឹកដល់ម៉ោង៣រសៀល។
នៅប្រទេសថៃ ក្រុមបាតុករប្រឆាំងរដ្ឋប្រហាររាប់រយនាក់ បានធ្វើបាតុកម្មនៅខាងក្រៅស្ថានទូតមីយ៉ាន់ម៉ាក្នុងទីក្រុងបាងកក។
ក្រៅពីនេះ ក្រុមសកម្មជនក៏បានធ្វើបាតុកម្មនៅរដ្ឋធានីម៉ានីល ប្រទេសហ្វីលីពីនផងដែរ។
គួរបញ្ជាក់ថា របបយោធាមីយ៉ានម៉ា បានប្រកាសដាក់ប្រទេសក្នុងភាពអាសន្នរយៈពេល១ឆ្នាំនៅពេលឡើងកាន់អំណាច ហើយបើតាមរដ្ឋធម្មនុញ្ញរបស់មីយ៉ាន់ម៉ា អនុញ្ញាតឱ្យមីយ៉ាន់ម៉ាដាក់ប្រទេសក្នុងភាពអាសន្នតែ ២ដងប៉ុណ្ណោះ។
ការផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី បានធ្វើឱ្យមីយ៉ាន់ម៉ាមានភាពឯកោនៅលើឆាកអន្តរជាតិ និងមានវិបត្តិសេដ្ឋកិច្ចធ្ងន់ធ្ងរ។
ប្រទេសមីយ៉ាន់ម៉ា បានស្ថិតក្នុងភាពចលាចលចាប់តាំងពីរដ្ឋប្រហារមក ជាមួយនឹងចលនាតស៊ូប្រយុទ្ធប្រឆាំងនឹងយោធា បន្ទាប់ពីការបង្រ្កាបយ៉ាងបង្ហូរឈាមលើក្រុមអ្នកប្រឆាំង ដែលនាំឱ្យមានការដាក់ទណ្ឌកម្មពីលោកខាងលិចជាបន្តបន្ទាប់។
យោងតាមអង្គការសហប្រជាជាតិ ប្រជាជនប្រមាណ ១,២លាននាក់ បានផ្លាស់ទីលំនៅ និងជាង ៧០ ០០០នាក់ បានចាកចេញពីប្រទេស៕