លោកនាយករដ្ឋមន្ត្រី ហ៊ុន សែន ប្រកាសបើកផ្លូវឱ្យអ្នកគាំទ្របក្សប្រឆាំងនៅក្រៅប្រទេសអាចធ្វើដំណើរមកលេងស្រុកកំណើតបានដោយមិនប្រើវិធានការច្បាប់ លើកលែងតែអ្នកមានដីកាចាប់ខ្លួនពីតុលាការ នូវអ្វីដែលលោកហៅថា ដើម្បីអនុវត្តស្មារតីបង្រួបបង្រួមជាតិ។
ការថ្លែងរបស់មេដឹកនាំកម្ពុជានេះ ធ្វើឡើងក្នុងពិធីជួបសំណេះសំណាលជាមួយសិស្សប្រឡងជាប់បាក់ឌុប ទទួលបាននិទ្ទេស A សម្រាប់ឆ្នាំសិក្សាឆ្នាំ២០២១ និង២០២២ នៅរាជធានីភ្នំពេញ នាថ្ងៃព្រហស្បតិ៍នេះ។
លោកថ្លែងថា អ្នកគាំទ្របក្សប្រឆាំងមួយចំនួនដែលកំពុងរស់នៅក្រៅប្រទេសមិនហ៊ានមកលេងស្រុកកំណើតរបស់ខ្លួននៅកម្ពុជាទេ ដោយសារពួកគេធ្លាប់ជេរប្រមាថគណបក្សប្រជាជននិងខ្លះទៀតធ្លាប់រៃអង្គាសលុយដើម្បីឱ្យមេដឹកនាំរបស់ពួកគេ ព្រោះតែខ្លាចអាជ្ញាធរចាត់វិធានការច្បាប់។
លោកគូសបញ្ជាក់ថា បញ្ហានេះ រដ្ឋាភិបាលមិនមានចំណាត់ការណាមួយ ចំពោះពួកគេដែលចង់មកលេងនៅស្រុកកំណើតក្នុងប្រទេសកម្ពុជាទេ វាលើកលែងអ្នកដែលមានដីកាតាមចាប់ខ្លួនពីតុលាការកម្ពុជា។
បន្ថែមពីនេះលោកបញ្ជាក់ថា ការមើលឃើញកម្ពុជាផ្ទាល់ភ្នែក ក៏អាចឃើញការរីកចម្រើនរបស់កម្ពុជាក្រោមការដឹកនាំរបស់រដ្ឋាភិបាលដែរ ដើម្បីកុំឱ្យចាញ់បោកមេដឹកនាំពួកគេ ដែលឃោសនាថា រដ្ឋាភិបាលបានលក់ទឹកដីកម្ពុជាឱ្យទៅប្រទេសវៀតណាម។
លោកថា៖«ចំនុចនេះក៏មានបងប្អូនយើងមួយចំនួននៅខាងក្រៅច្រឡំៗថា គាត់ធ្លាប់គាំទ្របក្សប្រឆាំងចូស្រុកខ្មែរអត់បាន អត់ទេ សូមមកចុះ រាប់ទាំងអ្នកដែលមានដីកាចាប់ខ្លួន បើចង់ឱ្យគេចាប់ វាអត់មានទាស់ខុសអីទេព្រោះខ្លួនមានសិទ្ធិមកតើ?។[…]នេះជាការដោះស្រាយបញ្ហាជាតិសាស្ត្ររបស់យើង ឱ្យមានការរួបរួមគ្នាអ្នកដែលយកយើងជាសត្រូវយើងក៏មិនស្វាគមន៍គេដែរ»។
លោក ហ៊ុន សែន ក្នុងពិធីមួយនៅខេត្តសៀមរាប កាលពីថ្ងៃទី២១ ខែតុលា ឆ្នាំ២០២២ ធ្លាប់បានអំពាវនាវ ឱ្យមនុស្សមួយចំនួន ដែលបន្តគាំទ្រលោក សម រង្ស៊ី ហើយចង់រួចខ្លួន ពីបម្រាមតុលាការ អាចផ្ដាច់ខ្លួនពីលោក សម រង្ស៊ី ដោយថា រដ្ឋាភិបាលធានាបើកផ្លូវឱ្យបន្តជីវិតនយោបាយឡើងវិញបាន តាមរយៈការស្នើសុំព្រះរាជទានលើកលែងទោសពីព្រះមហាក្សត្រ។
តែយ៉ាងណា សាររបស់លោក ហ៊ុន សែន នេះត្រូវបានអ្នកតាមដានយល់ឃើញថា ជាយុទ្ធសាស្ត្រ ដើម្បីឱ្យ លោក សម រង្ស៊ី នៅឯកោនៅក្រៅសង្វៀននយោបាយ។
ក៏ប៉ុន្តែជាង២ខែមកនេះ គេនៅមិនទាន់ឃើញរដ្ឋាភិបាលប្រកាសឈ្មោះមន្ត្រីណាម្នាក់ដែលស្និទ្ធជាមួយលោក សម រង្ស៊ី បានផ្តាច់ខ្លួនចេញពីលោក សម រង្ស៊ី តាមការអំពាវនាវរបស់លោក ហ៊ុន សែន នោះទេ៕