ស្វាមីរបស់ម្ចាស់ហាងបញ្ចាំនៅកាស៊ីណូណាហ្គាវើលដ៍ដែលត្រូវបានប្លន់សម្លាប់យកទ្រព្យសម្បត្តិអស់រាប់ម៉ឺនដុល្លារ បានប្រកាសផ្ដល់រង្វាន់ចំនួន១ ០០០ ដុល្លារដល់អ្នកដែលដឹងកន្លែងលាក់ខ្លួនរបស់ជនសង្ស័យ ដែលលោកជឿថាបានសម្លាប់ភរិយារបស់លោក។
លោកស្រី អ៊ឹង ជុងហ្គិច អាយុ៣៧ឆ្នាំ ត្រូវបានប្រទះឃើញដេកស្លាប់នៅក្នុងបន្ទប់ទឹកជាន់ទី១ នៃកាស៊ីណូណាហ្គាវើលដ៍ទី១ កាលពីថ្ងៃទី១៦ ខែមករា។ នេះបើយោងតាមបុគ្គលិកម្នាក់របស់លោកស្រី។ លោកស្រី អ៊ឹង ជុងហ្គិច គឺជាម្ចាស់ហាងបញ្ចាំនៅក្នុងកាស៊ីណូណាហ្គាវើលដ៍ទី១។
ស្វាមីរបស់លោកស្រី អ៊ឹង ជុងហ្គិច គឺលោក ចាន់ សួរ ត្រូវបានគេមើលឃើញថាមានទុក្ខព្រួយជាខ្លាំងនៅក្នុងពិធីបុណ្យសពរបស់ភរិយាពីរថ្ងៃបន្ទាប់ពីមរណភាព។ លោកបាននិយាយនៅពេលនោះទាំងទឹកភ្នែកថា «ហេតុអ្វីអូនទៅចោលបង?»។
លោក ចាន់ សួរ បាននិយាយកាលពីថ្ងៃពុធថា អ្នកប្រើប្រាស់បណ្តាញសង្គមហ្វេសប៊ុកបានផ្ញើឱ្យលោកនូវរូបបុរសម្នាក់ដែលអាចជាជនសង្ស័យក្នុងករណីឃាតកម្មនេះ។
លោកបានដឹងថា សមត្ថកិច្ចកំពុងតែស៊ើបអង្កេត ប៉ុន្តែលោកចង់បានយុត្តិធម៌ ហើយប្រកាសថានឹងផ្តល់ប្រាក់រង្វាន់ចំនួន ១ ០០០ដុល្លារ ដល់អ្នកណាដែលរាយការណ៍ពីជនសង្ស័យទៅសមត្ថកិច្ច។
លោក ចាន់ សួរ បាននិយាយថា៖ «ខ្ញុំមិនចង់សួរសមត្ថកិច្ចទៀតទេ ព្រោះខ្ញុំសួរច្រើនដងហើយ។ សមត្ថកិច្ចកំពុងធ្វើកិច្ចការនេះ»។
លោកបន្តថា លោកបានបង្ហាញរូបថតបុរសម្នាក់ដែលត្រូវបានអះអាងថាជាជនសង្ស័យទៅសមត្ថកិច្ច។
លោក ចាន់ សួរ បន្ថែមថា មានគេបង្ហោះតាមអ៊ីនធឺណិត ដោយឃើញជនសង្ស័យធ្វើដំណើរចេញពីអាកាសយានដ្ឋានអន្តរជាតិភ្នំពេញ ប៉ុន្តែលោកមិនជឿឡើយ ទាល់តែបានឃើញរូបថតនោះ។
លោកបានសរសេរនៅលើបណ្តាញសង្គមហ្វេសប៊ុកថា៖ «នេះជាលើកទីមួយ ហើយជាការឈឺចាប់បំផុតសម្រាប់ជីវិតខ្ញុំ។ ខ្ញុំសុំបងប្អូនប្រជាជនយើង បើសិនបានឃើញឃាតកក្នុងរូបនេះ សូមជួយផ្ដល់ព័ត៌មានដល់សមត្ថកិច្ចដែលនៅជិតបំផុត ឬផ្ដល់ព័ត៌មានមកដល់ខ្ញុំ»។
នាយប៉ុស្តិ៍នគរបាលសង្កាត់ទន្លេបាសាក់ លោក សាល សណ្ដុះ មានប្រសាសន៍ថា លោកបានឃើញរូបដែលត្រូវបានអះអាងថាជាជនសង្ស័យ តាមប្រព័ន្ធផ្សព្វផ្សាយសង្គម ប៉ុន្តែលោកមិនអាចបញ្ជាក់បានថាតើបុរសនោះពិតជាជនសង្ស័យ ឬយ៉ាងណានោះទេ។ លោកថា អ្នកប្រើប្រាស់ប្រព័ន្ធផ្សព្វផ្សាយសង្គម ហាក់ដូចជាច្បាស់ជាងសមត្ថកិច្ចទៀត។
លោកថា មន្ត្រីកំពុងដុតដៃដុតជើងក្នុងការស៊ើបអង្កេត ប៉ុន្តែលោកមិនអាចផ្តល់ព័ត៌មានលម្អិតឡើយ។
អ្នកនាំពាក្យអគ្គស្នងការដ្ឋាននគរបាលរាជធានីភ្នំពេញ លោក សាន សុខសីហា មានប្រសាសន៍ថា ការបង្ហោះរូបបុគ្គលណាម្នាក់តាមអ៊ីនធឺណិត ដោយអះអាងថាជាជនសង្ស័យក្នុងករណីឃាតកម្ម អាចប៉ះពាល់ដល់ការស៊ើបអង្កេតរបស់សមត្ថកិច្ច ប៉ុន្តែប្រជាពលរដ្ឋមានសេរីភាពក្នុងការបង្ហោះ។ លោកថា នេះជាសិទ្ធិរបស់ពួកគេ។
លោកបន្ថែមថា៖ «ការបង្ហោះ ឬបង្ហាញតាមអ៊ីនធឺណិត អាចធ្វើឱ្យជនសង្ស័យស្រួលរត់គេចខ្លួន»។
លោកបន្តថា លោកមិនអាចធ្វើអត្ថាធិប្បាយចំពោះករណីដែលឃើញជនសង្ស័យចាកចេញពីអាកាសយានដ្ឋាននោះទេ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក មានប្រសាសន៍ដែរថា ការបង្ហោះរូបដែលត្រូវបានអះអាងថាជាឃាតក នឹងមិនជួយដល់ការស៊ើបអង្កេតរបស់សមត្ថកិច្ចឡើយ ប៉ុន្តែវាមិនខុសអ្វីឡើយ។
លោកបន្ថែមថា៖ «នេះមិនខុសទេ។ ទោះយ៉ាងណា ការបង្ហោះបែបនេះមិនជួយដល់គ្រួសារជនរងគ្រោះឡើយ ព្រោះវាអាចធ្វើឱ្យជនសង្ស័យរត់គេចខ្លួន»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Victim’s Husband Offers $1,000 Reward Over NagaWorld Murder