មន្ត្រីអាមេរិក ឱ្យដឹងថា បាឡុងចារកម្មរបស់ចិនបានហោះលើទឹកដីសហរដ្ឋអាមេរិកប៉ុន្មានថ្ងៃមកហើយ នៅមុនដំណើរទស្សនកិច្ចទៅកាន់ទីក្រុងប៉េកាំង ដោយរដ្ឋមន្ត្រីការបរទេសសហរដ្ឋអាមេរិក លោក អេនតូនី ប្លីនខេន (Antony Blinken)។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៣ ខែកុម្ភៈ ឆ្នាំ២០២៣នេះ។
ប្រភពដដែលបន្តថា យន្តហោះចម្បាំងត្រូវបានចល័ត ប៉ុន្តែមេបញ្ជាការយោធាបានផ្តល់ដំបូន្មានដល់លោក ចូ បៃឌិន កុំឱ្យបាញ់ទម្លាក់បាឡុងនោះ ព្រោះខ្លាចកម្ទេចកម្ទីអាចប៉ះពាល់ដល់សុវត្ថិភាព។
ប្រភពដដែលបន្តថា បាឡុងចារកម្មនោះត្រូវបានប្រទះឃើញនៅជិតកោះ Aleutian និងកាណាដា មុនពេលហោះចូលសហរដ្ឋអាមេរិក។
អ្នកនាំពាក្យមន្ទីរបញ្ចកោណ លោកឧត្តមសេនីយ ផាទ្រីក រីឌឺ (Patrick Ryder) បាននិយាយថា៖ «រដ្ឋាភិបាលសហរដ្ឋអាមេរិកបានឃើញបាឡុងនោះ និងកំពុងឃ្លាំមើលក្នុងរយៈកម្ពស់ខ្ពស់ ដែលស្ថិតនៅលើទ្វីបអាមេរិកនាពេលនេះ»។
លោកបន្តថា៖ «បច្ចុប្បន្ននេះ បាឡុងនោះកំពុងហោះក្នុងរយៈកម្ពស់ខ្ពស់ ស្ថិតនៅលើចរាចរណ៍ផ្លូវអាកាសពាណិជ្ជកម្ម ហើយមិនបង្កការគំរាមកំហែងផ្នែកយោធា ឬរាងកាយដល់មនុស្សនៅលើដីនោះទេ»។
លោក Antony Blinken នឹងបំពេញទស្សនកិច្ចទៅកាន់ប្រទេសចិន នៅសប្តាហ៍ក្រោយ។ យ៉ាងណា គេនៅទាន់មិនច្បាស់ថាតើបាឡុងចារកម្មអាចប៉ះពាល់ដល់ផែនការធ្វើទស្សនកិច្ច ឬយ៉ាងណានោះទេ។
ក្រសួងការបរទេសចិន មិនបានឆ្លើយតបចំពោះសំណើសុំការអត្ថាធិប្បាយរបស់ Reuters ឡើយ។
ពាក់ព័ន្ធនឹងករណីនេះ មន្ត្រីអាមេរិកបានដោះស្រាយបញ្ហានេះជាមួយសមភាគីចិន តាមរយៈបណ្តាញការទូតក្នុងទីក្រុងប៉េកាំង និងក្នុងទីក្រុងវ៉ាស៊ីនតោន។
សមាជិកព្រឹទ្ធសភាអាមេរិក លោក ម៉ាកូ រូប៊ីអូ (Marco Rubio) មកពីគណបក្សសាធារណរដ្ឋ បានថ្លែងថា បាឡុងចារកម្មនេះគួរឱ្យព្រួយបារម្ភ ប៉ុន្តែមិនគួរឱ្យភ្ញាក់ផ្អើលនោះទេ។
លោក Rubio បាននិយាយនៅលើ Twitter ថា៖ «កម្រិតចារកម្មរបស់ទីក្រុងប៉េកាំងមកលើប្រទេសយើងបានកើនឡើងខ្លាំងក្នុងរយៈពេល ៥ឆ្នាំចុងក្រោយនេះ»។
ដំណឹងនេះបានផ្ទុះឡើងនៅពេលដែលនាយក CIA លោក វីល្លៀម បើន (William Burns) កំពុងថ្លែងនៅក្នុងព្រឹត្តិការណ៍សាកលវិទ្យាល័យ Georgetown ក្នុងទីក្រុងវ៉ាស៊ីនតោន ដែលលោកបានហៅប្រទេសចិនថាជា «បញ្ហាប្រឈមភូមិសាស្ត្រនយោបាយដ៏ធំបំផុត» ចំពោះអាមេរិក។
មន្ត្រីអាមេរិកថា បាឡុងចារកម្មបានហោះចូលទឹកដីអាមេរិកជាច្រើនដងមកហើយ ក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែបាឡុងដែលត្រូវបានបង្ហោះលើកនេះ ហាក់ដូចជាហោះបានយូរជាងលើកមុន។
សូមរម្លឹកថា ទំនាក់ទំនងរវាងចិន និងសហរដ្ឋអាមេរិក បានធ្លាក់ចុះក្នុងរយៈពេលប៉ុន្មានឆ្នាំចុងក្រោយនេះ ជាពិសេសបន្ទាប់ពីដំណើរទស្សនកិច្ចរបស់ប្រធានសភាអាមេរិក លោកស្រី ណានស៊ី ផេឡូស៊ី (Nancy Pelosi) ទៅកាន់កោះតៃវ៉ាន់ កាលពីខែសីហា ដែលបានជំរុញឱ្យចិនធ្វើសមយុទ្ធយោធាជាច្រើនលើកនៅជុំវិញដែនកោះមួយនេះ៕