រដ្ឋមន្ត្រីក្រសួងព័ត៌មាន បានចាត់តាំងអតីតអ្នកសារព័ត៌មាន និងបច្ចុប្បន្នជារដ្ឋលេខាធិការក្រសួងមួយរូបជាអ្នកសម្របសម្រួល ដើម្បីពង្រឹងប្រសិទ្ធភាពវិជ្ជាជីវៈ ការងារផ្សាយព័ត៌មាន និងការងារសមាគមសារព័ត៌មាន ខណៈកន្លងមកមានការរិះគន់ចំពោះឥរិយាបថអ្នកសារព័ត៌មានដែលចុះផ្សាយផ្ទាល់នៅកន្លែងកើតហេតុ។
សេចក្ដីសម្រេចចុះថ្ងៃទី២ ខែកុម្ភៈ ឆ្នាំ២០២៣ រដ្ឋមន្ត្រីក្រសួងព័ត៌មានលោក ខៀវ កាញារីទ្ធ ឱ្យដឹងថា ការសម្រេចចាត់ តាំង ដោយប្រគល់ភារកិច្ចទៅ លោក ប៉ែន បូណា ដែលជាអតីតអ្នកសារព័ត៌មាន និងបច្ចុប្បន្នជារដ្ឋលេខាធិការក្រសួងព័ត៌មានផង ឱ្យទទួលបន្ទុកការងារសម្របសម្រួលពង្រឹងប្រសិទ្ធភាពវិជ្ជាជីវៈសារព័ត៌មាន ការងារផ្សាយព័ត៌មាន និងការងារសមាគមសារព័ត៌មាននេះ ធ្វើឡើងដោយយោងទៅតាមតម្រូវការចាំបាច់របស់ក្រសួង។
រដ្ឋលេខាធិការក្រសួងព័ត៌មាន លោក ប៉ែន បូណា ប្រាប់វីអូឌីថា កន្លងមក ក្រសួងបានរៀបចំវគ្គបណ្ដុះបណ្ដាលជាបន្តបន្ទាប់ហើយ តែយ៉ាងណាបន្ទាប់ពីទទួលបានការចាត់តាំង លោកថា នឹងរៀបចំធ្វើការងារនេះឱ្យបានឆាប់។
លោកមើលឃើញថា អ្នកសារព័ត៌មាននៅកម្ពុជាភាគច្រើនបានគោរពក្រមសីលធម៌វិជ្ជាជីវៈ ព្រមទាំងច្បាប់ស្ដីពីរបបសារព័ត៌មាន បានត្រឹមត្រូវហើយ ដោយនៅសល់មួយចំនួនតូចប៉ុណ្ណោះ ដែលនៅបំពានក្រមសីលធម៌វិជ្ជាជីវៈ ហើយអ្នកសារព័ត៌មានទាំងនោះ ភាពច្រើនជាអ្នកធ្វើការតាមអនឡាញ។
លោកមានប្រសាសន៍ថា៖«អ៊ីចឹង យើងត្រូវផ្ដោត កែ តម្រង់ទិសពួកគាត់ ដើម្បីឱ្យងាយមក គិតពីក្រមសីលធម៌ វិជ្ជាជីវៈឱ្យបានល្អ។ យើងនឹងរៀបចំជាវគ្គបណ្ដុះបណ្ដាលបង្រៀនពួកគាត់អំពីក្រមសីលធម៌វិជ្ជាជីវៈ អំពីច្បាប់មុននឹងឱ្យពួកគាត់អញ្ជើញទៅអនុវត្តការងារវិញ ដើម្បីឱ្យពួកគាត់ស្គាល់សិន ស្គាល់ថា វិជ្ជាជីវៈគេត្រូវមានក្រមសីលធម៌អីខ្លះដែលត្រូវគោរព។ ច្បាប់ស្ដីពីរបបសារព័ត៌មានយើងមានចែងអំពីអីខ្លះ គាត់យល់អាហ្នឹងទៅ គាត់ជឿជាក់ថា គាត់នឹងយកទៅអនុវត្តបានល្អ»។
លោកបន្ថែមថា៖«ខ្ញុំមើលឃើញមានពីរ ប្រភេទ មានប្រភេទម្យ៉ាង បងប្អូនយើងគាត់អត់បានឆ្លងកាត់ការសិក្សាក្រមសីលធម៌វិជ្ជាជីវៈ អំពីច្បាប់អីទេ គាត់គិតថា ឱ្យតែមានកាត និងបណ្ណសារព័ត៌មានមួយគាត់អាចធ្វើអ្វីក៏បានដែរ។ អ៊ីចឹងជាអំណាចពេញទីរបស់គាត់ ដូច្នេះ គាត់ទៅប្រព្រឹត្តទៅវាឆ្គាំឆ្គង វាបំពានក្រមសីលធម៌វិជ្ជាជីវៈ វាបំពានអ្នកដទៃ ប៉ុន្តែមួយក្រុមទៀត។ ខ្ញុំគិតថា គាត់ដឹង ក៏ប៉ុន្តែគាត់ធ្វើដោយចេតនា ដើម្បីទាក់ទាញឱ្យមានអ្នកមើលច្រើន ចូល Like និង Comment ច្រើនអាហ្នឹងហើយដែលជាជោគជ័យគាត់នោះ។ ខ្ញុំគិតថា គាត់យល់ខុស។ អ៊ីចឹងអ្នកទាំងអស់ហ្នឹង ដែលយើងនឹងអញ្ជើញគាត់មកដើម្បីប្រាប់អំពីការប្រកបវិជ្ជាជីវៈហ្នឹង»។
លោក ប៉ែន បូណា បន្តថា ការបណ្ដុះបណ្ដាលអំពីក្រមសីលធម៌ និងច្បាប់ដល់អ្នកសារព័ត៌មាននេះ ដើម្បីជំរុញឱ្យអ្នកសារព័ត៌មានទាំងនោះ គោរពនិងអនុវត្តទៅតាមក្រមសីលធម៌វិជ្ជាជីវៈ ព្រមទាំងច្បាប់ឱ្យបានល្អនិងត្រឹមត្រូវ។
អតីតអ្នកសារព័ត៌មានជើងចាស់ លោក ប៉ែន បូណា ត្រូវបានព្រះបាទ សម្តេចព្រះបរមនាថ នរោត្តម សីហមុនី ចេញព្រះរាជក្រឹត្យត្រាស់បង្គាប់តែងតាំងជារដ្ឋលេខាធិការក្រសួងព័ត៌មានកាលពីខែធ្នូ ឆ្នាំ២០២២ កន្លងទៅ។
អ្នករាយការណ៍ព័ត៌មានឱ្យវិទ្យុសំឡេងសហរដ្ឋអាមេរិក VOA ប្រចាំប្រទេសកម្ពុជា លោក ស៊ុន ណារិន ចាត់ទុកការចាត់តាំងនេះថាជារឿងល្អ ដោយសារ បច្ចុប្បន្ន លោកមើលឃើញថា អ្នកសារព័ត៌មានមួយចំនួននៅមិនទាន់ទទួលបានការបណ្ដុះបណ្ដាលពីក្រមសីលធម៌ វិជ្ជាជីវៈនៅឡើយ ។ ទន្ទឹមនឹងការពង្រឹងវិជ្ជាជីវៈនេះដែរ លោកជំរុញឱ្យបង្កើតក្រុមប្រឹក្សាសារព័ត៌មានឯករាជ្យមួយ ដែលដើរតួនាទីក្នុងការដាក់ពិន័យលើអ្នកសារព័ត៌មាន ដែលមិនអនុវត្ត និងគោរពតាមក្រមសីលធម៌ វិជ្ជាជីវៈផងដែរ។
លោកថា៖«យើងគួរមានក្រុមប្រឹក្សាសារព័ត៌មាន ឬក្រុមប្រឹក្សាសីលធម៌ដែលជាស្ថាប័នមួយឯករាជ្យ ហើយមានការទទួលពីរដ្ឋ មានន័យថា រដ្ឋទទួលស្គាល់ ប៉ុន្តែមិនមានឥទ្ធិពលលើហ្នឹងទេ។ ក្រុមនឹងដើរតួនាទីឯករាជ្យ ក្នុងនឹងតួនាទីមួយសំខាន់ហ្នឹង យើងបង្កើតក្រមសីលធម៌ ជាលក្ខណៈអនុវត្តទូទាំងប្រទេស ក្រមសីលធម៌សារព័ត៌មានថ្នាក់ជាតិ។ ក្រុមប្រឹក្សាហ្នឹង មានតួទីដាក់ពិន័យលើអ្នកសារព័ត៌មាន មិនគោរពក្រមសីលធម៌ ហើយមានថ្កោលទោសពីសារធាណជន»។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា(CamboJa) លោក ណុប វី មានប្រសាសន៍ថា ការចាត់តាំងមន្ត្រីឱ្យសម្របសម្រួល និងសហការគ្រប់ភាគីពាក់ព័ន្ធ ដើម្បីពង្រឹងសមត្ថភាពវិជ្ជាជីវៈគឺរឿងល្អសម្រាប់អ្នកសារព័ត៌មាន។
តែយ៉ាងណា លោកបារម្ភខ្លាចការអនុវត្តនេះ លើសពីតួនាទី និងកាតព្វកិច្ច ក្នុងគោលដៅពង្រឹងសមត្ថភាពអ្នកសារព័ត៌មាន ដែលអាចនឹងធ្វើឱ្យប៉ះពាល់ដល់ការអនុវត្តតួនាទី ភារកិច្ច និងសេរីភាពអ្នកសារព័ត៌មាន។
លោកថា៖«បើសិនជាតួនាទីនៃការចាត់តាំងរបស់ឯកឧត្ដមរដ្ឋមន្ត្រី លោកចាត់តាំងតំណាងក្រសួងព័ត៌មាន ដើម្បីឱ្យសម្របសម្រួលឬមួយចូលរួមធ្វើកិច្ចការងារជាមួយនឹងខាងស្ថាប័ន អង្គការ សមាគម ពាក់ព័ន្ធនឹង ដែលមិនប៉ះពាល់ទៅឯករាជ្យភាពនៃការងារស្ថាប័នទាំងអស់ហ្នឹង នៅក្នុងន័យមួយជួយពង្រឹងវិជ្ជាជីវៈ សេរីភាព សិទ្ធិរបស់អ្នកសារព័ត៌មាន គឺជារឿងមួយដែលយើងមិនមានការព្រួយបារម្ភទេ យើងស្វាគមន៍។ ក៏ប៉ុន្តែតួនាទីដែលដាក់ចេញមក វាធ្វើឱ្យមានផលប៉ះពាល់ឬមួយក៏ជាការត្រួតពិនិត្យតាមដាន ការអនុវត្តការងារភារកិច្ចអ្នកសារព័ត៌មាន ដូចកន្លងមក ក្រសួងធ្លាប់បានបង្កើត គណៈកម្មការក្រមសីលធម៌អីហ្នឹង អាហ្នឹងជាចំណុចមួយដែលយើងមានការព្រួយបារម្ភ»។
ការចាត់តាំងលោក ប៉ែន បូណា នាពេលនេះ បន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី ២៦ ខែមករា ឆ្នាំ២០២៣ បានបញ្ជាទៅរដ្ឋមន្ត្រីក្រសួងព័ត៌មានឱ្យពង្រឹងវិជ្ជាជីវៈអ្នកសារព័ត៌មានអនឡាញ ក្រោយពីមានការរិះគន់ឥរិយាបថចាងហ្វាងសារព័ត៌មាន TVFB ដែលបានស្ដីបន្ទោសអ្នកជួយលើកម៉ូតូជនរងគ្រោះ ក្នុងគ្រោះថ្នាក់ចរាចរណ៍មួយនៅលើស្ពានជ្រោយចង្វារ កាលពីពេលថ្មីៗ។
ជុំវិញបញ្ហានេះ លោក ខៀវ កាញារីទ្ធ ធ្លាប់លើកឡើងក្នុងពិធីបើកសិក្ខាសាលាស្ដីពី «ការអនុវត្តវិជ្ជាជីវៈនិងសេរីភាពសារព័ត៌មាន ក្នុងក្របខណ្ឌច្បាប់នៃព្រះរាជាណាចក្រកម្ពុជា» កាលពីថ្ងៃទី១៦ ខែវិច្ឆិកា ឆ្នាំ២០២១ ថា អ្នកសារព័ត៌មាននៅកម្ពុជាប្រមាណ ៨០ភាគរយ មិនបានរៀនវិជ្ជាជីវៈអ្នកសារព័ត៌មាន និងឈ្វេងយល់ទៅលើច្បាប់ស្ដីពីរបបសារព័ត៌មាន និងច្បាប់ព្រហ្មទណ្ឌទេ ដោយពួកគេចាប់ផ្ដើមប្រកបអាជីពនេះតែម្តង៕