សិស្សនៅវិទ្យាល័យ ហ៊ុន សែន ប្រម៉ោយ ស្ថិតនៅឃុំប្រម៉ោយ ស្រុកវាលវែង ខេត្តពោធិ៍សាត់ បានបន្តដួលសន្លប់ជាបន្តបន្ទាប់ ដែលគិតមកដល់ថ្ងៃអាទិត្យម្សិលមិញ បានកើនដល់ជាង ៧០នាក់ ដោយមន្ត្រីជំនាញសុខាភិបាលបញ្ជាក់ថា ការដួលសន្លប់នេះដោយសារតែពួកគេមានបញ្ហាសុខភាព។
អភិបាលស្រុកវាលវែង លោក វង្ស អេង បានឱ្យដឹងនៅថ្ងៃចន្ទនេះថា បើតាមបញ្ជីឈ្មោះសិស្សដែលបានពីក្រុមគ្រូពេទ្យ គិតចាប់ពីថ្ងៃទី១ ដល់ថ្ងៃទី៥ ខែកុម្ភៈនេះ តួលេខសិស្សវិទ្យាល័យ ហ៊ុន សែន ប្រម៉ោយ ដែលបានដួលសន្លប់ បានកើនដល់ ៧៣នាក់។
លោកបន្តថា តាមការបញ្ជាក់របស់ក្រុមគ្រូពេទ្យ សុខភាពសិស្សទាំងនោះពុំមានបញ្ហាអ្វីធ្ងន់ធ្ងរនោះទេ។ សម្រាប់អភិបាលស្រុកវាលវែងរូបនេះ យល់ថា បញ្ហាដែលមានសិស្សដួលសន្លប់ជាបន្តបន្ទាប់នេះ អាចបណ្តាលមកពីរឿងអប្បិយជំនឿ ដោយសារក្រោយពីមានការសាងសង់អគារសិក្សានោះមក មិនដែលមានសែនព្រេន។
លោកថា៖ «ពាក់ព័ន្ធពីម្សិលមិញ[ថ្ងៃអាទិត្យ]ដែលយើងធ្វើការសែនព្រេន កាលពីម្សិលមិញ ដូចថាសែនអត់ត្រូវ គេរឹតតែធ្វើឱ្យយើងកាន់តែមានអាការច្រើន ប៉ុន្តែយប់មិញនេះ យើងបានបួងសួងសាជាថ្មី អំពាវនាវសុំគេសាជាថ្មីទៅ ឃើញថាអ្នកដែលជំងឺទាំងអស់ធូរស្បើយនិយាយធម្មតា»។
តែយ៉ាងណា អធិការនគរបាលស្រុកវាលវែង លោក ធាង ឡេង មានប្រសាសន៍ថា សិស្សដែលសន្លប់សរុបមានចំនួន ៦០នាក់ ហើយនៅពេលនេះ នាយកវិទ្យាល័យ បានសម្រេចឱ្យសិស្សទាំងនោះសម្រាកការសិក្សាជាបណ្ដោះអាសន្ន។
លោក ធាង ឡេង បន្តថា ក្រោយកើតមានហេតុការណ៍នេះ អាជ្ញាធរ និងគ្រូបង្រៀន បានបញ្ជូនសិស្សដែលបានដួលសន្លប់ទាំងនោះ ទៅសម្រាកព្យាបាលនៅមន្ទីរពេទ្យ ក្នុងនោះ មានសិស្សចំនួន ៩នាក់ ប៉ុណ្ណោះដែលកំពុងនៅមន្ទីរពេទ្យ ខណៈស្ថានភាពសុខភាពសិស្ស ៥១នាក់ផ្សេងទៀត បានធូរស្រាល និងត្រូវបានក្រុមគ្រូពេទ្យអនុញ្ញាតឱ្យត្រលប់ទៅផ្ទះវិញ។
លោកថា៖ «ក្នុងនាមសមត្ថកិច្ច មានតែបន្តគ្រប់គ្រងសភាពការណ៍ និងសិក្សាស្រាវជ្រាវ ដោយសហការជាមួយជំនាញខាងសុខាភិបាល គ្រូ និងអាជ្ញាធរមូលដ្ឋាន ផងដែរ»។
នាយកវិទ្យាល័យ ហ៊ុន សែន ប្រម៉ោយ លោក ពីង សុខា បានបដិសេធការឆ្លើយតបលម្អិតព័ត៌មាននេះ ដោយគ្រាន់តែបញ្ជាក់ថា ពេលនេះ រូបលោក និងអាជ្ញាធរកំពុងដោះស្រាយ។
អនុប្រធានមន្ទីរសុខាភិបាលខេត្តពោធិ៍សាត់ លោក តឹក សុភាព មានប្រសាសន៍ថា ក្រុមគ្រូពេទ្យបានទៅពិនិត្យ និងព្យាបាលលើសិស្សទាំងនោះរួចរាល់ហើយ មិនមានបញ្ហាធ្ងន់ធ្ងរទេ ហើយមូលហេតុដែលដួលសន្លប់នេះ អាចបណ្ដាលមកពីកង្វះចំណីអាហារ គេងមិនគ្រប់គ្រាន់ និងតក់ស្លុតនៅពេលឃើញសិស្សផ្សេងដួលសន្លប់។
លោកថា៖ «តាមពិតទៅ យើងបានរកហើយ ហាក់ដូចជាមិនពាក់ពន្ធរឿងជំងឺទេ ទី១ ខ្ញុំគិតថា មកពីការហូបចុករបស់គាត់អត់បានគ្រប់គ្រាន់ ហើយទី២ ទាក់ទងនឹងការសម្រាក ហើយអ្វីដែលសំខាន់នៅពេលដែលឃើញប្អូនម្នាក់ដួលសន្លប់អ៊ីចឹងទៅ ហើយភាគច្រើនជានារី គាត់ភ័យដួលសន្លប់អ៊ីចឹងទៅ»៕
