កម្មករ–កម្មការិនីបម្រើការងារនៅរោងចក្រ សិនតៃ ហ្គាមេន (ខេមបូឌា) ខូអិលធីឌី (ZHEN TAI Garment (Cambodia) Co.,Ltd) ស្ថិតនៅភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ នៅថ្ងៃចន្ទនេះ បាននាំគ្នាតវ៉ាសុំចូលធ្វើការងារវិញ ក្រោយថៅកែព្យួរការងាររយៈពេល២ខែ។
កម្មករ និងប្រធានសហជីពស្មារតីកម្មករ ប្រចាំរោងចក្រសិនតៃ លោក កឹម សុភេន ប្រាប់វីអូឌីនៅកន្លែងតវ៉ាមុខរោងចក្រថា កម្មករ–កម្មការិនីជាង ៩០០នាក់ ត្រូវបានថៅកែព្យួរការងាររយៈពេល ២ខែ មកហើយ ក្រោមហេតុផលគ្មានការបញ្ជាទិញ និងគ្មានការងារឱ្យធ្វើ ហើយក្នុងអំឡុងពេលព្យួរការងារនោះ កម្មករទទួលបានប្រាក់ឧបត្ថម្ភចំនួន ៣០ដុល្លារក្នុង១ខែ។
ប្រធានសហជីពរូបនេះបន្តថា នៅថ្ងៃនេះ ដល់ថ្ងៃកំណត់ដែលកម្មករត្រូវវិលត្រលប់ចូលធ្វើការងារវិញ ប៉ុន្តែថៅកែរោងចក្រមិនអនុញ្ញាតឱ្យពួកគាត់ចូលធ្វើការងារនោះទេ និងមិនបានជូនដំណឹងអ្វីដល់កម្មករថែមទៀត។
លោក កឹម សុភេន បានឱ្យដឹងថា កម្មករដែលថៅកែព្យួរការងារនេះ ភាគច្រើនជាកម្មករបម្រើការងារនៅរោងចក្រ សិនតៃ ចន្លោះពី ៣ឆ្នាំ ទៅ១០ឆ្នាំ។ លោកថា ក្រុមកម្មករទាមទារចូលធ្វើការងារវិញ ឬដោះដូរឱ្យកម្មករដែលមិនត្រូវបានព្យួរការងារកន្លងមក ឈប់សម្រាកបណ្តោះអាសន្នវិញ បើសិនរោងចក្រត្រូវព្យួរការងារកម្មករបន្ត។
លោកបន្ថែមថា៖ «ពេលដែលដល់ថ្ងៃចូលធ្វើការងារវិញ កម្មករក៏បាននាំគ្នាចូលធ្វើការងារវិញ ដើម្បីបានប្រាក់ផ្គត់ផ្គង់ជីវភាពគ្រួសារ ប៉ុន្តែជាក់ស្តែង មកដល់ថ្ងៃនេះ បែរជាខាងក្រុមហ៊ុនមិនអនុញ្ញាតឱ្យពួកគាត់ចូលធ្វើការងារវិញទេ។ បើសិនជាគ្មានអ្នកបញ្ជាទិញ និងគ្មានការងារធ្វើមែន ខាងក្រុមហ៊ុនគួរតែឱ្យអ្នកព្យួការងារ២ខែនេះបានចូលធ្វើការងារវិញម្តង ហើយអ្នកដែលកំពុងបំពេញការងារនេះ ឱ្យពួកគាត់សម្រាកខ្លះទៅ ដោយប្តូរវេនគ្នាធ្វើម្តងទៅ ដើម្បីជួយសម្រួលជីវភាពគ្រួសាររបស់គាត់ ដើម្បីចែកគ្នារស់»។
កម្មការិនីផ្នែកដេរ និងជាអនុប្រធានសហជីពស្មារតីកម្មករ ប្រចាំរោងចក្រសិនតៃ អ្នកស្រី ម៉ិច ស៊ាងហៃ ដែលអះអាងថា បម្រើការងារនៅរោងចក្រ សិនតៃ រយៈពេល១១ឆ្នាំមកហើយ បាននិយាយថា ថៅកែរោងចក្រ ជាពិសេសប្រធានរដ្ឋបាលរោងចក្រនេះ ហាក់មានការរើសអើងលើសហជីពរបស់អ្នកស្រី។
អនុប្រធានសហជីព បន្តថា ថៅកែបានព្យួរការងារតែកម្មករណាគាំទ្រសហជីពរបស់អ្នកស្រីប៉ុណ្ណោះ ខណៈកម្មករ និងសហជីពដែលស្និទ្ធជាមួយថៅកែ មិនត្រូវបានព្យួរការងារនោះឡើយ។
អ្នកស្រីបន្ថែមថា៖ «និយាយពីការចំណាយវិញ ទី១ ថ្លៃផ្ទះជួល ផ្ទះជួលមិនមែន១ខែ៣០ដុល្លារទេ មានចាប់ពី៤០ដុល្លារទៅ១០០ដុល្លារ។ មួយទៀត ការចំណាយលើការហូបចុកប្រចាំថ្ងៃ ដោយគ្រប់មុខទំនិញទាំងអស់សុទ្ធតែឡើងថ្លៃ អ៊ីចឹងត្រូវចំណាយច្រើន។ ត្រឹម៣០ដុល្លារនេះ វាពិបាកខ្លាំងណាស់សម្រាប់ពួកយើងជាកម្មករ។ មួយទៀតនោះ ចំណាយលើកូនរៀន និងបង់សងធនាគារ ជាដើម»។
កម្មការិនីផ្នែកដេរម្នាក់ទៀត អ្នកស្រី ជៀម សុជា មានប្រសាសន៍ថា រូបអ្នកស្រី និងកម្មករដែលត្រូវបានព្យួរការងារ គឺបានជួបបញ្ហាជីវភាពជាខ្លាំងអំឡុងពេលព្យួរការងាររយៈពេល ២ខែមកនេះ។ អ្នកស្រីថា ពួកគាត់ក៏កំពុងព្រួយបារម្ភខ្លាចបាត់បង់ការងារ និងការបញ្ឈប់ពីការងារដោយមិនទទួលបានអត្ថប្រយោជន៍ផ្សេងៗតាមច្បាប់ ខណៈពួកគាត់កំពុងជួបញ្ហាក្នុងការចំណាយប្រចាំថ្ងៃ។
អ្នកស្រីបន្ថែមថា៖ «ដូចខ្ញុំបញ្ជាក់អ៊ីចឹង បើអត់បានចូលធ្វើការ គឺវាប៉ះពាល់ជីវភាពខ្លាំងតែម្តង។ ហើយខ្ញុំព្រួយបារម្ភខ្លាំងជាងគេ គឺការបាត់បង់អត្ថប្រយោជន៍ហ្នឹងតែម្តង។ បើគាត់បញ្ឈប់ពួកខ្ញុំ សុំឱ្យគាត់ទូទាត់អត្ថប្រយោជន៍ផ្សេងៗឱ្យពួកខ្ញុំឱ្យត្រឹមត្រូវមក ខ្ញុំទៅបាត់អស់ ខ្ញុំទៅរកការងារកន្លែងផ្សេងធ្វើហើយ។ តែនេះ គាត់ព្យួរ១ខែហើយ១ខែទៀត មិនដឹងគាត់មានគំនិតបែបណា»។
អនុប្រធានរដ្ឋបាលរោងចក្រសិនតៃ លោក ស៊ិន ធី សុំមិនឆ្លើយពាក់ព័ន្ធករណីនេះទេ ដោយលោកបង្វែរឱ្យទៅសួរប្រធានរដ្ឋបាលរោងចក្រ អ្នកស្រី អ៊ួន សុភា វិញ ប៉ុន្តែវីអូឌីមិនអាចសុំការបញ្ជាក់ពីប្រធានរដ្ឋបាលរោងចក្ររូបនេះបានទេ ដោយទូរសព្ទមិនអាចទាក់ទងបាន។
អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា នៃក្រសួងការងារ និងបណ្តុះបណ្តាលវិជ្ជាជីវៈ លោក វង្ស សុវណ្ណ មានប្រសាសន៍ថា លោកទទួលបានដំណឹងជុំវិញករណីនេះហើយ។ លោកថា ខាងក្រសួងក៏បានឱ្យភាគីរោងចក្រឆ្លើយបំភ្លឺករណីនេះផងដែរ ប៉ុន្តែខាងរោងចក្រមិនទាន់បានឆ្លើយតបនៅឡើយ។
យ៉ាងណា លោកថា តាមព័ត៌មានដែលលោកទទួលបានក្រៅផ្លូវការ គឺរោងចក្រនេះអាចនឹងបន្តព្យួរការងារកម្មករទៀត។
លោកបន្ថែមថា៖ «ខ្ញុំមើលឯកសារព្យួរ លោកព្យួររហូតមកដល់ថ្ងៃទី៦នេះ អ៊ីចឹងយើងតាមដានមើលថ្ងៃស្អែកបន្តទៀត ព្រោះដល់ថ្ងៃទី៧ ដល់ថ្ងៃចូលវិញហើយ អាហ្នឹងអាចអ៊ីចឹង។ យើងបានទំនាក់ទំនងទៅខាងរោងចក្រដែរ ប៉ុន្តែគេមិនទាន់ឆ្លើយតប។ ហើយមួយទៀត តាមព័ត៌មានមក ប្រហែលការព្យួរការងារបន្ត តែអាហ្នឹងយើងអត់ទាន់បានចុះទៅដល់ផ្ទាល់ទេ អ៊ីចឹងចាំមើលស្អែកទៀត»។
បើតាមលោក កឹម សុភេន រោងចក្រ សិនតៃ ជារោងចក្រផលិតសម្លៀកបំពាក់ មានកម្មករបម្រើការងារជាង ១ ៧០០នាក់ និងមានថៅកែជាជនជាតិចិន ហើយកន្លងមក រោងចក្របានគំរាមកំហែងទៅសហជីពដែលការពារផលប្រយោជន៍កម្មករ ដោយបានប្តឹងតំណាងសហជីពរបស់លោកចំនួន ៣នាក់ ទៅតុលាការផងដែរ ក្រោយកម្មករតវ៉ាទាមទារសិទ្ធ្ិការងារ។
កាលពីថ្ងៃទី១៩ ខែធ្នូ ឆ្នាំ២០២២ ចៅក្រមស៊ើបសួរសាលាដំបូងរាជធានីភ្នំពេញ លោក លឹម សុគន្ធារ៉ា បានចេញដីកាកោះហៅប្រធានសហជីពស្មារតីកម្មករ លោក កឹម សុភេន និងលេខាធិការ លោក គឹម វណ្ណដេត ព្រមទាំងអនុប្រធានសហជីពសា្មរតីកម្មករ អ្នកស្រី ម៉ិច ស៊ាងហៃ ឱ្យចូលបំភ្លឺនៅតុលាការ ទៅតាមបណ្តឹងរបស់ថៅកែរោងចក្រ សិនតៃ។
ដីកានេះបានចោទថ្នាក់ដឹកនាំសហជីពទាំង៣នាក់នោះ ថាបានដឹកនាំកម្មករតវ៉ារយៈពេល២ថ្ងៃ ពោលគឺចាប់ពីថ្ងៃទី១ ដល់ថ្ងៃទី២ ខែធ្នូ ឆ្នាំ២០២២ បានធ្វើឱ្យខូចខាតដល់ចង្វាក់ផលិតកម្មរបស់រោងចក្រ និងបានប្តឹងទារសំណងចំនួន៣៧ ៥០០ដុល្លារផងដែរ៕
