កម្ពុជា នឹងធ្វើជាម្ចាស់ផ្ទះរៀបចំវេទិកាថ្នាក់តំបន់អាស៊ី និងប៉ាស៊ីហ្វិកលើកទី១១ ស្តីពី 3R និងសេដ្ឋកិច្ចចក្រា ដោយផ្តោតលើការគ្រប់គ្រងសំណល់រឹង ជាពិសេសបញ្ហាសំណល់ប្លាស្ទិក ដែលនឹងប្រព្រឹត្តទៅចាប់ពីថ្ងៃទី៨ ដល់ថ្ងៃទី១១ ខែកុម្ភៈ ឆ្នាំ២០២៣ នៅខេត្តសៀមរាប។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា មានប្រសាសន៍នៅក្នុងសន្និសីទសារព័ត៌មាន នារសៀលថ្ងៃទី៧ ខែកុម្ភៈនេះថា នេះជាលើកទី១ហើយ ដែលកម្ពុជា ធ្វើជាម្ចាស់ផ្ទះ ក្នុងការរៀបចំវេទិកាថ្នាក់តំបន់នេះ ក្រោមប្រធានបទ «សមាហរណកម្មសេដ្ឋកិច្ចចក្រាទៅក្នុងការអភិវឌ្ឍលើគ្រប់វិស័យឆ្ពោះទៅសម្រេចបានសង្គមគ្មានសំណល់ និងគោលដៅអភិវឌ្ឍន៍ប្រកបដោយចីរភាព ដោយមានការចូលរួមពីតំណាងបណ្តាប្រទេសចំនួន ៣៥។ បើតាមលោក ភក្ត្រា 3R មានន័យថា ការកាត់បន្ថយ ការប្រើប្រាស់ឡើងវិញ និងការកែច្នៃឡើងវិញនូវសំណល់ប្លាស្ទិក។
លោកបន្តថា ការរៀបចំវេទិកា 3R នេះ នឹងជជែកពិភាក្សាផ្តោតជាសំខាន់ពាក់ព័ន្ធនឹងការគ្រប់គ្រងសំណល់រឹង ជាពិសេសបញ្ហាសំណល់ប្លាស្ទិក។
លោក នេត្រ ភក្ត្រា ថ្លែងថា៖ «រហូតមកដល់បច្ចុប្បន្ននេះ សំណល់ប្លាស្ទិក ដែលនៅលើភពផែនដីនេះគឺមានចំនួន ១២ប៊ីលានតោន ហើយនៅក្នុងមួយឆ្នាំ ផលិតផលដែលធ្វើពីប្លាស្ទិក ហើយត្រូវបានប្រើប្រាស់គឺចន្លោះពី ៤០០ទៅ៦០០លានតោន[…] បើសិនជាយើងមិនមានវិធានការទប់ស្កាត់ទៅលើបញ្ហាហ្នឹងទេ ក្នុងការកាត់បន្ថយទៅលើការប្រើប្រាស់ប្លាស្ទិកហ្នឹងទេ នោះសំណល់ប្លាស្ទិកនៅលើភពផែនដីរបស់យើង នឹងកើនឡើងរហូតទៅដល់ ៣៤ប៊ីលានតោន ដែលចំនួននេះ គឺជាចំនួនដ៏ច្រើនបំផុត ហើយបើប្រៀបធៀបទៅនឹងត្រីនៅមហាសមុទ្រ គឺចំនួនប្លាស្ទីកនេះគឺមានច្រើនជាងត្រីនៅក្នុងមហាសមុទ្រ»។
លោកបន្តថា សំណល់ប្លាស្ទិក ក៏ជាបញ្ហាមួយដែលបង្កើតឱ្យមានផលប៉ះពាល់ទៅដល់បរិស្ថាន សុខភាព និងសេដ្ឋកិច្ចផងដែរ ដែលទាមទារឱ្យមានកិច្ចសហការួមគ្នាក្នុងការគ្រប់គ្រង និងកាត់បន្ថយការប្រើប្រាស់។
លោកបានគូសបញ្ជាក់ថា៖ «វេទិកា 3R នេះ ធ្វើឡើងក្នុងគោលបំណងមួយ ដើម្បីរកនូវវិធានការរួមដើម្បីដោះស្រាយបញ្ហាបំពុលដោយប្លាស្ទិក ហើយនិងថាតើយើងអាចគ្រប់គ្រងស្ថានភាពនៃប្លាស្ទិកនៅលើពិភពលោកនេះ បានដោយកម្រិតណា»។
លោក នេត្រ ភក្ត្រា បន្ថែមថា៖ «បច្ចុប្បន្នេះពិភពលោក បានយកចិត្តទុកដាក់ខ្លាំងទៅលើការប្រើប្រាស់ឡើងវិញ ការកែច្នៃ និងការកាត់បន្ថយប្លាស្ទិក ដើម្បីកាត់បន្ថយផលប៉ះពាល់នៃប្លាស្ទិកនៅលើភពផែនដី ហើយនៅក្នុងនោះគឺមានការដាក់ចេញនូវគោលនយោបាយ សេដ្ឋកិច្ចចក្រា ឬក៏សេដ្ឋកិច្ចវិលជុំ ដែលសំដៅទៅលើការទាញយកនូវការកែច្នៃទៅលើសំណល់រឹង មកធ្វើជារបស់ដែលមានតម្លៃ ហើយប្រើប្រាស់នៅក្នុងប្រព័ន្ធវិលជុំ នេះគឺជាផ្នែកមួយដែលយើងគិតអំពីបញ្ហាដែលកើតឡើងនៅលើភពផែនដី ដើម្បីកាត់បន្ថយនូវផលប៉ះពាល់»។
បើតាមរដ្ឋលេខាធិការក្រសួងបរិស្ថានរូបនេះ វេទិកា 3R ត្រូវបានបង្កើតឡើងនៅឆ្នាំ២០០៩ ដោយចាប់ផ្តើមរៀបចំឡើងនៅប្រទេសជប៉ុន។ សមាជិកនៃវេទិកានេះ រួមមាន រដ្ឋាភិបាល ទីភ្នាក់ងារអន្តរជាតិ ទីភ្នាក់ងារជំនួយ វិស័យឯកជន គ្រឹះស្ថានស្រាវជ្រាវ អង្គការក្រៅរដ្ឋាភិបាល និងភាគីពាក់ព័ន្ធនានាផ្សេងទៀត ដោយពួកគេបានជជែកពាក់ព័ន្ធនឹងគោលនយោបាយ ការផ្តល់ការគាំទ្រទៅលើ 3R ការចែករំលែកនូវចំណេះដឹងព័ត៌មាន ក៏ដូចជាបទពិសោធន៍នានាដល់សមាជិក ព្រមទាំងរឹតបន្តឹងបន្ថែមនូវកិច្ចសហប្រតិបត្តិការ លើការលើកកម្ពស់គោលការណ៍ 3R។
គួរបញ្ជាក់ថា វេទិកាថ្នាក់តំបន់អាស៊ី និងប៉ាស៊ីហ្វិកលើកទី១១ ស្តីពី 3R និងសេដ្ឋកិច្ចចក្រា ដែលកម្ពុជាធ្វើជាម្ចាស់ផ្ទះនេះ មានការសហការរវាងក្រសួងបរិស្ថាននៃប្រទេសកម្ពុជា ក្រសួងបរិស្ថាននៃប្រទេសជប៉ុន និងមជ្ឈមណ្ឌលសហប្រជាជាតិសម្រាប់ការអភិវឌ្ឍក្នុងតំបន់ ដោយមានអ្នកចូលរួមប្រមាណពី ៤០០ ទៅ៥០០នាក់៕