គិតមកទល់ពេលនេះ រញ្ជួយដីកម្រិតធ្ងន់បានវាយប្រហារប្រទេសតួកគី និងប្រទេសស៊ីរី ដែលចាប់ផ្ដើមតាំងពីថ្ងៃចន្ទម្សិលមិញ បានសម្លាប់មនុស្សជាង ៤ ០០០ នាក់ និងរាប់រយនាក់ផ្សេងទៀតរងរបួស ខណៈអគារជាច្រើនបានដួលរលំ ហើយក្រុមអ្នកជួយសង្គ្រោះកំពុងស្វែងរកអ្នកនៅរស់រានមានជីវិតនៅក្នុងគំនរបាក់បែក។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន CNA នៅថ្ងៃទី៧ ខែកុម្ភៈ ឆ្នាំ២០២៣ នេះ។
ការរញ្ជួយដីកម្រិត ៧,៨ រិចទ័រ បានវាយប្រហារប្រទេសទាំងពីរនេះកាលពីព្រឹកថ្ងៃចន្ទ ដោយបានធ្វើឱ្យអគារជាច្រើនដួលរលំ និងបណ្តាលឱ្យមនុស្សរាប់ពាន់នាក់ផ្សេងទៀតរងរបួស ឬគ្មានផ្ទះសម្បែង។
អាជ្ញាធរគ្រប់គ្រងគ្រោះមហន្តរាយ និងគ្រោះអាសន្នរបស់តួកគី (AFAD) បាននិយាយនៅក្នុងសេចក្តីថ្លែងការណ៍ចុងក្រោយរបស់ខ្លួនថា មនុស្សជិត ៨ ០០០នាក់ ត្រូវបានជួយសង្គ្រោះពីអគារចំនួន ៤ ៧៥៨ ដែលត្រូវបានបំផ្លាញ។
ប្រមុខ AFAD លោក យូនុស សេហ្សឺ (Yunus Sezer) បាននិយាយថា មនុស្សចំនួន២ ៩២១នាក់បានស្លាប់នៅក្នុងប្រទេសតួកគី ខណៈការរញ្ជួយដីនៅតែបន្តអង្រួនតំបន់។ មជ្ឈមណ្ឌលគ្រប់គ្រងគ្រោះរញ្ជួយដីអឺរ៉ុប (EMSC) បាននិយាយថា គ្រោះរញ្ជួយដីកម្រិត ៥,៦រិចទ័រ បានវាយប្រហារភាគកណ្តាលនៃប្រទេសតួកគី នៅថ្ងៃអង្គារនេះ។
ងាកមកប្រទេសស៊ីរី យ៉ាងហោចណាស់មនុស្សចំនួន ១ ៤៤៤ នាក់បានស្លាប់ និងប្រហែល ៣ ៥០០នាក់បានរងរបួស។ នេះបើយោងតាមតួលេខរបស់រដ្ឋាភិបាលក្រុងដាម៉ាស (Damascus) និងក្រុមអ្នកជួយសង្គ្រោះ៕
