សមត្ថកិច្ចខេត្តបាត់ដំបង ចាប់ខ្លួនមនុស្សពីរនាក់ដែលជាបងប្អូននឹងគ្នា ពីបទបន្លំខ្លួនធ្វើជាសមត្ថកិច្ច និងកំហែងយកប្រាក់ពីអ្នកដទៃ។
លោក អ៊ឹម កុសល អ្នកនាំពាក្យស្នងការដ្ឋាននគរបាលខេត្តបាត់ដំបង បានមានប្រសាសន៍កាលពីថ្ងៃអង្គារថា សមត្ថកិច្ចបានចាប់ខ្លួនឈ្មោះ ឯម សុវិសាល និងឈ្មោះ ឯម សុវិសេដ្ឋ នៅសង្កាត់អូរចារ ក្រុងបាត់ដំបង។ លោក អ៊ឹម កុសល មិនបានបញ្ជាក់ថាពួកគេបន្លំខ្លួនធ្វើជាមន្ត្រីកម្រិតណានោះទេ ប៉ុន្តែបានអះអាងថាមានជនរងគ្រោះមកប្តឹងសមត្ថកិច្ច ដោយអះអាងថា បុគ្គលទាំងពីរនេះបានកំហែងយកប្រាក់រាប់ពាន់ដុល្លារពីពួកគេ។
លោក អ៊ឹម កុសល បានបន្តថា បុគ្គលទាំងពីរនេះត្រូវបានបញ្ជូនទៅពន្ធនាគារខេត្តបាត់ដំបង ហើយនឹងត្រូវសាកសួរដោយសាលាដំបូងខេត្តបាត់ដំបង។
លោក អ៊ឹម កុសល បានមានប្រសាសន៍ថា៖ «យើងពិបាកដឹងថាតើពួកគេកំហែងយកប្រាក់ប៉ុន្មានដង ពីព្រោះយើងមិនមានពាក្យបណ្ដឹងពីជនរងគ្រោះផ្សេងទៀត ហើយនេះគឺជាពាក្យបណ្ដឹងដំបូង ដូច្នេះយើងចាត់វិធានការ។ ហើយយើងសង្ឃឹមថា ប្រសិនបើជនរងគ្រោះផ្សេងទៀតដាក់ពាក្យបណ្តឹង នោះសមត្ថកិច្ចនឹងមានភស្តុតាងបន្ថែម»។
យោងតាមការបង្ហោះតាមបណ្ដាញសង្គមហ្វេសប៊ុករបស់នគរបាលខេត្តបាត់ដំបង កាលពីថ្ងៃទី៦ ខែកុម្ភៈ បានអះអាងថា បុគ្គលទាំងពីរនេះបានបន្លំខ្លួនធ្វើជាសមត្ថកិច្ច ដោយមិនបានបញ្ជាក់ថាពួកគេបន្លំខ្លួនធ្វើជាមន្ត្រីកម្រិតណាទេ។
លោក អ៊ឹម កុសល បាននិយាយថា ឈ្មោះ ឯម សុវិសាល និង ឯម សុវិសេដ្ឋ ជាប់ពាក់ព័ន្ធនឹងករណីមួយផ្សេងទៀតនៅខេត្តពោធិសាត់ ប៉ុន្តែលោកឱ្យអ្នករាយការណ៍ព័ត៌មានទៅសួរក្រសួងព័ត៌មាន សម្រាប់ព័ត៌មានលម្អិតអំពីការចាប់ខ្លួនបុគ្គលទាំងពីរនេះនៅខេត្តពោធិ៍សាត់។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានបង្ហោះអំពីករណីនេះ កាលពីថ្ងៃទី៥ ខែកុម្ភៈ ដោយនិយាយថា បុគ្គលទាំងពីរនេះជាបងប្អូននឹងគ្នា ដែលធ្លាប់ត្រូវបាននគរបាលខេត្តពោធិ៍សាត់ឃាត់ខ្លួន។ អ្នកទាំងពីរត្រូវបានចោទប្រកាន់ថាបានបន្លំខ្លួនក្នុងតួនាទីមួយចំនួន ដូចជា អ្នកកាសែត មន្ត្រីនគរបាលសេដ្ឋកិច្ចរបស់ក្រសួងមហាផ្ទៃ មន្ត្រីនាយកដ្ឋានព្រៃឈើ និង
មន្ត្រីក្រសួងព័ត៌មាន។
លោក ខៀវ កាញារីទ្ធ បានសរសេរនៅលើហ្វេសប៊ុកថា៖ «ពួកគេបន្តកំហែងយកប្រាក់ពីអ្នកដទៃ ហើយរូបភាពរបស់ពួកគេត្រូវបានបង្ហោះនៅលើបណ្តាញសង្គមហ្វេសប៊ុក ព្រោះពួកគេត្រូវបាននគរបាលខេត្តពោធិ៍សាត់ឃាត់ខ្លួន។ កាលពីម្សិលមិញ នគរបាលខេត្តបាត់ដំបង បានចាប់ខ្លួនពួកគេ ពាក់ព័ន្ធនឹងករណីប្រើប្រាស់ឈ្មោះអ្នកដទៃដើម្បីកំហែងយកប្រាក់ពីប្រជាពលរដ្ឋ»។
អ្នកនាំពាក្យក្រសួងព័ត៌មាន លោក ផុស សុវណ្ណ មានប្រសាសន៍ថា លោកមិនបានដឹងអំពីករណីនេះទេ។
យោងតាមវិទ្យុបាយ័ន អ្នកសារព័ត៌មានចំនួន៥នាក់ រួមទាំងឈ្មោះ ឯម សុវិសាល និងឈ្មោះ ឯម សុវិសេដ្ឋ ត្រូវបាននគរបាលស្រុកក្រគរ ខេត្តពោធិ៍សាត់ ឃាត់ខ្លួនពីបទកំហែងយកប្រាក់ពីប្រជាពលរដ្ឋក្នុងតំបន់។
ប្រភពដដែលបន្តថា បុគ្គលទាំងពីរនេះក៏បានគំរាមគ្រួសារនៅភូមិបំណាក់ ស្រុកក្រគរ ដែលទុកឈើនៅក្រោមផ្ទះ ដោយអះអាងថា ខ្លួនជាមន្ត្រីនគរបាលក្រសួងមហាផ្ទៃ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Brothers Arrested for Impersonating Officials, Extortion
