មន្ត្រីជំនាញមកពីក្រសួងបរិស្ថាននៃបណ្តាប្រទេសក្នុងតំប់អាស៊ី និងប៉ាស៊ីហ្វិក បានពិភាក្សាគ្នា លើការបង្កើតភាពស៊ីសង្វាក់គ្នា ក្នុងការសម្រេចបាននូវគោលដៅអភិវឌ្ឍន៍ប្រកបដោយចីរភាព (SDG) និងកិច្ចព្រមព្រៀងទីក្រុង ប៉ារីស ស្តីពី ការប្រែប្រួលអាកាសធាតុ តាមរយៈសេដ្ឋកិច្ចចក្រា ឬសេដ្ឋកិច្ចវិលជុំ។
កិច្ចពិភាក្សានេះ បានធ្វើឡើងនៅក្នុងវេទិកាថ្នាក់តំបន់អាស៊ីនិងប៉ាស៊ីហ្វិកលើកទី១១ ស្តីពី 3R និងសេដ្ឋកិច្ចចក្រា នៅព្រឹកថ្ងៃទី៨ ខែកុម្ភៈ ឆ្នាំ២០២៣នេះ នៅសណ្ឋាគារសុខា ខេត្តសៀមរាប។
រដ្ឋលេខាធិការ និងជាមន្ត្រីនាំពាក្យនៃក្រសួងបរិស្ថានកម្ពុជា លោក នេត្រ ភក្ត្រា មានប្រសាសន៍ថា មន្ត្រីជំនាញបច្ចេកទេស មកពីបណ្តាប្រទេសនានា រួមនឹងអង្គការដៃគូបានជជែកពិភាក្សាយ៉ាងផុសផុល ដើម្បីពិនិត្យលើបញ្ហាដែលបានជួបប្រទះ និងដំណោះស្រាយ។
លោកបន្តថា ក្នុងវេទិកានេះ វាគ្មិនមកពីក្រសួងបរិស្ថានកម្ពុជា វៀតណាម អូស្ត្រាលី ហ្វីលីពីន អង្គការយូនីដូបានធ្វើបទបង្ហាញលើប្រធានបទសំខាន់ៗមួយចំនួន ដើម្បីជជែកពិភាក្សា ក្នុងនោះរួមមាន ជីវសេដ្ឋកិច្ចប្រកបដោយនិរន្តរភាព និងវិលជុំ នៅក្នុងរបៀបវារៈអាកាសធាតុ និងកាលានុវត្តន៍ភាព វិថីទៅកាន់អព្យាក្រឹត្យកាបូន តួនាទីរបស់សេដ្ឋកិច្ចចក្រា កាតាលីករសកម្មភាពរួមសម្រាប់សហគ្រាសធុនតូច និងមធ្យមនាំទៅរកការផ្លាស់ប្តូរកាបូនទាប យុទ្ធសាស្ត្រអភិវឌ្ឍន៍រយៈពេលវែងរបស់កម្ពុជា និងផែនទីបង្ហាញផ្លូវរបស់កម្ពុជាក្នុងការប្រើប្រាស់ និងផលិតភាពប្រកបដោយនិរន្តរភាព រួមទាំងយុទ្ធសាស្ត្រសេដ្ឋកិច្ចចក្រា និងផែនការសកម្មភាពនានាជាដើម។
លោកបន្តថា គ្រប់គ្នាបានឯកភាពគ្នាថា ការផ្លាស់ប្តូរទៅជាសេដ្ឋកិច្ចចក្រា ឬសេដ្ឋកិច្ចវិលជុំ គឺចាំបាច់ត្រូវសម្រេចបានទាំងគោលដៅអភិវឌ្ឍន៍ប្រកបដោយចីរភាព និងគោលដៅផ្នែកការប្រែប្រួលអាកាសធាតុ ដែលបានព្រមព្រៀងដោយសហគមន៍អន្តរជាតិ និងដើម្បីជួយកសាងសេដ្ឋកិច្ចពិភពលោកឡើងវិញ។ បណ្តាប្រទេសនានាបានបង្ហាញពីភាពចាំបាច់នៃសមត្ថភាពផ្នែកហិរញ្ញវត្ថុ និងបច្ចេកទេស។
លោក នេត្រ ភក្ត្រា បានលើកឡើងថា កម្ពុជាបានរៀបចំយុទ្ធសាស្ត្រសេដ្ឋកិច្ចចក្រា ដើម្បីជួយឱ្យប្រសើរឡើងនូវទិដ្ឋភាពជាច្រើននៃសេដ្ឋកិច្ច និងសង្គម និងការសម្រេចបាននូវនិរន្តរភាពបរិស្ថាន ដោយការលើកកម្ពស់ការប្រើប្រាស់ថាមពល និងធនធានសម្ភារៈឱ្យកាន់តែមានប្រសិទ្ធភាព ខណៈពេលកម្ពុជា កំពុងកាត់បន្ថយផលប៉ះពាល់ពីការប្រើប្រាស់ធនធានហួសកម្រិត និងការបង្កើតកាកសំណល់។
គួរបញ្ជាក់ថា វេទិកាថ្នាក់តំបន់អាស៊ី និងប៉ាស៊ីហ្វិកលើកទី១១ ស្តីពី 3R និងសេដ្ឋកិច្ចចក្រា ដែលកម្ពុជាធ្វើជាម្ចាស់ផ្ទះនេះ ប្រព្រឹត្តទៅរយៈពេល៣ថ្ងៃ គឺចាប់ពីថ្ងៃទី០៨ ដល់ថ្ងៃទី១០ ខែកុម្ភៈ ឆ្នាំ២០២៣ ក្រោមប្រធានបទ «សមាហរណកម្មសេដ្ឋកិច្ចចក្រាទៅក្នុងការអភិវឌ្ឍលើគ្រប់វិស័យឆ្ពោះទៅសម្រេចបានសង្គមគ្មានសំណល់ និងគោលដៅអភិវឌ្ឍន៍ប្រកបដោយចីរភាព ដោយមានការចូលរួមពីតំណាងបណ្តាប្រទេសចំនួន៣៩ សរុបប្រមាណ ៥០០នាក់៕
