ក្រសួងសង្គមកិច្ចអះអាងពីការចាប់ផ្ដើមកំណត់អត្តសញ្ញាណជនអនាថា និងក្រុមមនុស្សផ្សេងទៀតដែលកំពុងរស់នៅក្នុងមណ្ឌលព្រៃស្ពឺ ដើម្បីបញ្ជូនពួកគេទៅកាន់មណ្ឌលនានា និងទៅកាន់ស្រុកកំណើត ហើយមណ្ឌលព្រៃស្ពឺនេះនឹងអាចបិទតែម្តង ក្នុងករណីបញ្ជូនមនុស្សចេញអស់។
ការលើកឡើងរបស់ក្រសួងនេះ ក្រោយតំណាងឧត្តមស្នងការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា(OHCHR) លោកស្រី រួអេដា អែលហាច (Roueida EI Hage) កាលពីថ្ងៃទី៧ ខែកុម្ភៈ បានពិភាក្សាការងារជាមួយ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង សូត ស្តីពីស្ថានភាពនៅមជ្ឈមណ្ឌលសំចតសង្គមកិច្ចរាជធានីភ្នំពេញ ឬ មណ្ឌលព្រៃស្ពី។
ទំព័រហ្វេសប៊ុករបស់ OHCHR កាលពីថ្ងៃទី៧ ខែកុម្ភៈ បានឱ្យដឹងថា ក្នុងជំនួបនោះ ភាគីទាំងពីរ បានពិភាក្សាអំពីផែនការនៃកិច្ចសហប្រតិបត្តិការ ដើម្បីដោះស្រាយភាពចន្លោះប្រហោងនៅមណ្ឌលព្រៃស្ពឺ លក្ខខណ្ឌរស់នៅមណ្ឌលស្តារនីតិសម្បទា យន្តការបញ្ជូនបន្ត និងសិទ្ធិទទួលបានជំនួយផ្នែកវេជ្ជសាស្រ្ដដល់ពួកគេ។
អ្នកនាំពាក្យក្រសួងសង្គមកិច្ច លោក តូច ចាន់នី មានប្រសាសន៍ថា ក្រសួងបានសម្រេចបញ្ជូនមនុស្សចេញពីមណ្ឌលព្រៃស្ពឺចាប់ពីថ្ងៃទី៨ ខែកុម្ភៈទៅ ដោយក្រសួងកំពុងកំណត់អត្តសញ្ញាណមនុស្សនៅក្នុងមណ្ឌលនេះជាផ្នែកៗ។
លោកបន្តថា ប្រសិនបុគ្គលដែលធ្លាប់ពាក់ព័ន្ធនឹងគ្រឿងញៀននឹងត្រូវបញ្ជូនទៅមណ្ឌលបន្សាបគ្រឿងញៀន ហើយប្រសិនបើពួកគេជាជនអនាថា នឹងស្វែងរកផ្ទះសម្បែងតាមបណ្ដាខេត្តនានា ហើយផ្ដល់បណ្ណក្រីក្រដល់ពួកគេ។ លោកថា ចំណែកជនមានវិប្បល្លាសស្មារតីនឹងបញ្ជូនទៅមណ្ឌលវិប្បល្លាសស្មារតីជាដើម។
លោកបន្តថា៖«ហើយថ្ងៃហ្នឹង ខ្ញុំគិតថាល្ងាចនេះមន្ទីរសង្គមកិច្ចមួយចំនួនមកទទួលនៅមណ្ឌលព្រៃស្ពឺ។ យើងធ្វើអីចឹងទៅអស់ហើយ ហើយបញ្ហាព្រៃស្ពឺមិនមានច្រើនទៀតទេ»។
អ្នកនាំពាក្យក្រសួងសង្គមកិច្ចរូបនេះបន្ថែមថា ប្រសិនបើក្រសួងអាចបញ្ជូនមនុស្សដែលរស់នៅទីនោះអស់ ក្រសួងនឹងបិទមណ្ឌលសំចតព្រៃស្ពីតែម្តង ប៉ុន្តែប្រសិនបើមិនអាចទេ អ្នកដែលរស់នៅទីនោះគឺសម្រាប់តែជនអនាថាប៉ុណ្ណោះ។
លោកបន្ថែមថា៖«ប្រសិនបើយើងដោះបញ្ហាហ្នឹងអស់ គឺអត់មានមនុស្សទេ ត្រូវបិទហើយ ប៉ុន្តែឥឡូវត្រូវដោះបញ្ហាឱ្យអស់សិន »។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត នៅតែមានការបារម្ភថា ប្រសិនបើមណ្ឌលព្រៃស្ពឺមិនមានការកែប្រែឱ្យប្រសើរនោះទេ នោះការរំលោភសិទ្ធិមនុស្សនៅតែមាន។
លោកថា៖«យើងជាអង្គការលីកាដូនៅតែមើលឃើញ នឹងនៅតែបារម្ភអំពីមណ្ឌលនេះ មិនមានការកែលម្អមានភាពល្អប្រសើរទេ។ ចឹងនៅតែកន្លែងមួយដែលមានការរំលោភសិទ្ធមនុស្ស។ អ៊ីចឹងបានយើងនៅតែទទូចថា ប្រសិនបើកែលម្អមិនបានទេ គួរតែពិចារណាទៅទាក់ទងនឹងការបិទ ដើម្បីកុំឱ្យមានការរិះគន់ទៅដល់ក្រសួង ឬរាជរដ្ឋាភិបាលនោះ»។
អង្គការលីកាដូ (LICADHO) ចេញផ្សាយសេចក្ដីថ្លែងការណ៍មួយនៅថ្ងៃទី៧ ខែធ្នូ ឆ្នាំ២០២២ បានឱ្យដឹងថា មនុស្សពីរនាក់បានស្លាប់បាត់បង់ជីវិត ខណៈកំពុងឃុំខ្លួនដោយមិនត្រឹមត្រូវនៅមណ្ឌលសង្គមកិច្ចព្រៃស្ពឺរបស់រដ្ឋ ក្នុងខែសីហា ឆ្នាំ២០២២។ បន្ថែមពីនេះ មានភស្តុតាងបង្ហាញថា មនុស្សជាង ១០នាក់បានស្លាប់ ក្នុងចំណោមអ្នកជាប់ឃុំទាំងអស់នៅក្នុងមណ្ឌលមួយនេះ នៅចន្លោះខែកក្កដា និងខែសីហា ឆ្នាំ២០២២។
សេចក្តីថ្លែងការណ៍បានបន្តថា ការស្លាប់នៅមណ្ឌលព្រៃស្ពឺទាំងពីរនាក់ក្នុងខែសីហា ដោយការឃុំខ្លួនមិនត្រឹមត្រូវនោះ គឺមានស្ត្រីម្នាក់ និងបុរសម្នាក់។ លីកាដូ បានឱ្យដឹងថា អ្នកជាប់ឃុំទាំងពីរនាក់នោះ មានជំងឺធ្ងន់ធ្ងរត្រូវបានទុកចោលនៅលើឥដ្ឋ នៅក្នុងបន្ទប់ឃុំឃាំង រហូតដល់ស្លាប់ នៅចំពោះមុខអ្នកជាប់ឃុំផ្សេងទៀត ដោយមិនបានផ្ដល់ការព្យាបាលឱ្យបានគ្រប់គ្រាន់ឡើយ។
កាលពីថ្ងៃទី ១ មិថុនា ឆ្នាំ២០១៦ លោកនាយករដ្ឋមន្ត្រី ហ៊ុន សែន ក៏ធ្លាប់លើកឡើងថា មណ្ឌលព្រៃស្ពឺក្នុងរយៈពេលជាច្រើនឆ្នាំនេះ នៅតែមិនអាចកែលម្អសេវារបស់ខ្លួនឱ្យមានភាពល្អប្រសើរបាន។
លោក ហ៊ុន សែន មានប្រសាសន៍ពេលនោះថា លោកដឹងថាមណ្ឌលមួយនេះរងនូវការតិះដៀលជាច្រើនពីមហាជន ដោយសារតែមណ្ឌលមួយនេះបានធ្វើឱ្យប៉ះពាល់ដល់មុខមាត់រដ្ឋាភិបាល។ លោកក៏បានស្នើឱ្យបិទមណ្ឌលព្រៃស្ពឺនេះចោលតែម្តង បើសិនជាមិនមានការកែប្រែសេវាឱ្យល្អប្រសើរនោះទេ៕