ក្រុមយុវជនសំរាមបន្តសកម្មភាពសម្អាតសំរាមឡើងវិញក្នុងទ្រង់ទ្រាយធំនៅទូទាំងប្រទេស

លោក សាន ដារ៉ាវីត តំណាងក្រុមយុវជនសំរាម។ (ហ្វេសប៊ុក៖ យុវជនសំរាម)

ក្រុមយុវជនសំរាម បន្តបេសកកម្មរើសសំរាមតាមបណ្តាខេត្ត-ក្រុង និងសាលារៀនទូទាំងប្រទេស ខណៈពួកគេមើលឃើញការប្រើប្រាស់សំរាមប្លាស្ទិកមានការកើនឡើង។

តំណាងក្រុមយុវជនសំរាម គឺលោក សាន ដារ៉ាវីត បានឱ្យដឹងថា ដោយមើលឃើញអំពីបញ្ហាបរិស្ថាន និងការគ្រប់គ្រងសំរាមមិនទាន់បានល្អ ដែលអាចបណ្ដាលឱ្យប៉ះពាល់ដល់សោភ័ណភាពខេត្តក្រុងឬប្រទេសជាតិ ព្រមទាំងសុខភាពរបស់ពលរដ្ឋទូទៅផង ទើបក្រុមយុវជនសំរាមដែលមានគ្នាចាប់ពី ១០ទៅ ២០នាក់ឡើង ចាប់ផ្តើមបន្តបេសកកម្មប្រមូលគ្នារើសសំរាមឡើងវិញនៅឆ្នាំ២​​០​២​​​៣​នេះ។

លោកបន្តថា យុទ្ធនាការនេះធ្វើឡើងតាមបណ្តាខេត្ត-ក្រុងធំៗ រួមមាន ខេត្តសៀមរាប កំពង់ធំ បាត់ដំ​បង តាកែវ ក្រុងព្រះសីហនុ កំពត កោះកុង និងសាលាជាច្រើនទៀត មានវិទ្យាល័យកោះស្ដេច ស្ថិតនៅស្រុកគិរីសាគរ ជាដើម។

ប្រភពដដែលបន្តថា សកម្មភាពរបស់ក្រុមយុវជន ក្រៅពីជំរុញឱ្យមានបរិស្ថានស្អាតហើយ ក៏ចង់ឃើញពលរដ្ឋមានទំនួលខុសត្រូវដោយខ្លួនឯងក្នុងការទុកដាក់សំរាម ព្រោះការទុកដាក់ និងបោះចោលសំរាមមិនបានត្រឹមត្រូវ វាមិនត្រឹមតែធ្វើឱ្យប៉ះពាល់សោភ័ណភាពបរិស្ថានប៉ុណ្ណោះទេ ប៉ុន្តែវាបានធ្វើឱ្យប៉ះពាល់ដល់សុខភាពផងដែរ។ ដូច្នេះ គួររួមគ្នាធ្វើពលកម្មសម្អាតបរិស្ថាន និងទុកដាក់សំរាមឱ្យមានរបៀបរៀបរយ ដើម្បីទុកជាគំរូ និងជាទង្វើល្អមួយសម្រាប់ពលរដ្ឋ និងយុវជនជំនាន់ក្រោយ។

លោកបន្តថា៖ «បើនិយាយពីរឿងបរិស្ថាន យើងទាំងអស់គ្នានៅជាមួយបរិស្ថានរួមតែមួយ អ៊ីចឹងពួកយើងត្រូវតែមានទឹកចិត្តក្នុងការទទួលខុសត្រូវជាមួយសំរាមប្រើប្រាស់របស់យើងជាមុនសិន។

លោកបន្ថែមថា៖ «យើងទទួលខុសត្រូវនូវអ្វីដែលយើងប្រើប្រាស់ អ្វីដែលយើងហូបចុកហើយហ្នឹង យើងទទួលខុសត្រូវ យកវាទៅដាក់ក្នុងធុងសំរាម ឬក៏វេចខ្ចប់ឱ្យបានស្រួលបួល កុំបោះចោលពាសវាលពាលកាល។ ហ្នឹងវាជាទំនួលខុសត្រូវដែលសំខាន់សម្រាប់យុវជនជំនាន់ក្រោយយើងផងដែរ»។

បន្ថែមពីលើនេះ លោក សាន ដារ៉ាវីដ ដែលមានវ័យ៣៣ឆ្នាំ និងជាអ្នករស់នៅរាជធានីភ្នំពេញ បញ្ជាក់ថា សំរាមគឺជាកាកសំណល់អស់តម្លៃ គ្មានប្រយោជន៍ និងជាវត្ថុធាតុស្អុយរលួយ បង្កឱ្យអាប់អួដល់បរិយាកាសជុំវិញ និងងាយបង្កទៅជាជំងឺផ្សេងៗ ឬអាចបង្កឱ្យមានគ្រោះថ្នាក់ចំពោះសុខភាព តាមរយៈការប៉ះពាល់ដោយផ្ទាល់ ឬតាមភាយក្លិនស្អុយនៃសំរាមដែលរលួយ។ ប្រភពបន្ថែមថា សំរាម​ថង់ប្លាស្ទិក ឬសំណល់​រឹង​ នៅតាម​ទីប្រជុំជន​ខេត្ត-​ក្រុង ​ក្នុង​ប្រទេស​កម្ពុជា​ បាន​ក្លាយជា​កង្វល់​ចម្បង​មួយ​ក្នុង​ចំណោម​បញ្ហា​​ផ្សេង​ទៀត​ ហើយ​បញ្ហា​សំរាម​នេះ​ទៀត​សោត​បាន​បង្ក​ជា​បញ្ហា​ប្រឈម​មួយ​ទៅ​ដល់​សង្គម​កម្ពុជា​ ព្រោះថា ​សំរាម​បាន​ធ្វើ​ឱ្យ​ប៉ះពាល់​ទៅ​ដល់​បរិស្ថាន ​និង​សុខុមា​ល​ភាព​ប្រជាពលរដ្ឋ​ ជាដើម។

លោកបន្តថា៖ «សំរាមនៅពេលដែលវារប៉ាត់រប៉ាយនៅតាមផ្លូវ ធម្មតាវាប៉ះពាល់ហើយ វាអាចប៉ះពាល់ដល់ទេសចរដែលគាត់មកលេង វាប៉ះពាល់ទៅដល់បរិស្ថាននៅជុំវិញ ពាក់ព័ន្ធទៅនឹងសោភ័ណភាព សោភ័ណភាពស្អុយរលួយ។ ប្រសិនបើសំរាម វានៅរប៉ាត់រប៉ាយ វាជះឥទ្ធិពលដល់ទាំងអស់គ្នាអ៊ីចឹង»។

កាលពីដើម​ឆ្នាំ២០២១ រដ្ឋាភិបាលកម្ពុជាបានធ្វើកំណែទម្រង់គោលនយោបាយ «ភូមិ-ឃុំ-ស​​​ង្កា​ត់​-មានសុវត្តិភាព» ដោយដាក់បញ្ចូលកិច្ចការថែរក្សាបរិស្ថាន ដើម្បីគ្រប់គ្រងសំរាម ថែរក្សាអនាម័យ បរិស្ថាន និងសុខុមាលភាពប្រជាពលរដ្ឋ។ តាមរយៈគោលនយោបាយថ្មីនេះ រដ្ឋាភិបាលកម្ពុជារំពឹងថា នឹងជំរុញឱ្យមានការដោះស្រាយបញ្ហាកាកសំណល់គ្រប់ប្រភេទ នៅទូទាំងប្រទេស។

ស្រដៀងគ្នានេះដែរ យុវជនម្នាក់ទៀត គឺលោក ហេម សុភេម បានឱ្យដឹងថា ហេតុផលដែលនាំឱ្យក្រុមលោកបន្តដើររើសសំរាមតាមបណ្ដាខេត្តក្រុងទូទាំងប្រទេស ដោយសារចង់​ឃើញ​ទីក្រុង បណ្តាខេត្ត និងសាលារៀន​​ មានសោភ័ណភាព ​បរិស្ថាន​ស្អាត ដោយ​មានការ​រៀបចំទុក​ដាក់​សំរាមប្រភេទ​ផ្សេង​ៗ​ឱ្យដាច់​ពី​គ្នា និង​មាន​របៀប​រៀប​រយ​។ យ៉ាងណា លោកថារឿងនេះ ក្រុមលោកមិនអាចធ្វើបានទាំងអស់នោះទេ ទាល់តែមានការចូលរួមចំណែកពីពលរដ្ឋ និង​អាជ្ញាធរ ​ទើប​​​អា​ច​​ទប់​​ស្កាត់បញ្ហានៃការទុកដាក់សំរាមដែលគ្មានសណ្តាប់ធ្នាប់នេះបាន។

លោកបន្តថា៖ «គោលបំណងទី១ គឺចង់សម្អាតប្លាស្ទិកដែលត្រូវចោលទាំងអស់នៅតាមទីក្រុង ហើយនិងបញ្ឈប់ការចោលប្លាស្ទិកថ្មីៗ ដោយសកម្មភាពរបស់យើងក្នុងការធ្វើវីដេអូនៅក្នុងបណ្ដាញសង្គម។ ហើយមួយទៀតហ្នឹង គឺដើម្បីធ្វើជាគំរូដល់ក្មេងជំនាន់ក្រោយ ក៏ដូចជាយុវជនដទៃ»។

បើតាមលោក ហេម សុភេម សព្វថ្ងៃ ការប្រើប្រាស់សំរាម ឬប្លាស្ទិក មានការកើនឡើងជាគំហុក គិតចា​ប់តំាងពីការនាំចូលប្លាស្ទិកមក។ ស្ថិតក្នុងវ័យ២១ឆ្នាំ មកពីខេត្តកំពង់ឆ្នាំង លោក ហេម សុភេម ប​​ន្ត​​​ថា បច្ចុប្បន្ននេះ សំរាម និងថង់ប្លាស្ទិក ត្រូវបានគេប្រើប្រាស់ជារៀងរាល់ថ្ងៃ នៅតាមណ្តាខេត្ត-ក្រុ​​ង​​​ធំៗ ស្របពេលមានការសិក្សាជាច្រើនពីស្ថាប័ននានា បង្ហាញថា ឥរិយាថនៃទុកដាក់​​មិនបាន​​ល្អ​​នូវកាក​​សំណល់របស់ពលរដ្ឋកម្ពុជា នៅតែជាបញ្ហាចោទនៅឡើយ។

លោកបន្តថា៖ «បើប្រើ ក៏ប្រើចុះ ប៉ុន្តែប្រើហើយ សូមដាក់នៅក្នុងធុងសំរាមឱ្យស្រួលសិន។ បើសិនជាគាត់អត់ទាន់ចេះបោះសំរាមចូលទៅក្នុងធុងសំរាមផង យើងទៅប្រាប់គាត់ឱ្យគាត់កាត់បន្ថយប្រើប្រាស់បា្លស្ទិកឡើងវិញ ស្មានតែគាត់ស្ដាប់យើង»។

លោកបន្ថែមថា៖ «គ្រាន់តែចោលសំរាម គាត់! យើងបានធ្វើឱ្យគាត់មើលហើយ គាត់នៅតែបោះចោលដដែលហ្នឹង អ៊ីចឹងវាមិនពិបាក? ដំបូង យើងត្រូវផ្ដើមពីការបោះសំរាមឱ្យត្រូវធុងសំរាមសិន អ្វីដែលយើងធ្វើឥលូវហ្នឹង គឺនៅកម្រិតមួយគ្រាន់តែចង់ឱ្យប្រជាពលរដ្ឋ យុវជនទាំងអស់ហ្នឹង គាត់ចេះទុកដាក់សំរាមឱ្យបានត្រឹមត្រូវតែប៉ុណ្ណឹងទេ»។

ពាក់ព័ន្ធនឹងរឿងនេះ វីអូឌី មិនអាចសុំការឆ្លើយតបពីអ្នកនាំពាក្យក្រសួងបរិស្ថាន លោក នេត្រ ភក្ត្រា បានទេ ដោយទូរសព្ទចូលច្រើនដង តែគ្មានអ្នកទទួល។

ចំណែកមន្ត្រីជាន់ខ្ពស់ផ្នែកតស៊ូមតិ នៃបណ្តាញយុវជនកម្ពុជា (CYN) លោក សាន់ ម៉ាឡា យល់ឃើ​​ញថា សកម្មភាពរើសសំរាមរបស់ក្រុមយុវជន ជាគំរូល្អសម្រាប់ពលរដ្ឋទូទៅ ដែល​គួរអនុវត្តតាម។ លោ​​​កបន្តថា ប្រសិនបើពលរដ្ឋ ឬមន្ត្រីរាជការបានចូលរួមអនុវត្តការរៀបចំទុកដាក់សំរាមបានល្អ នោះ​​​សង្គមនិងប្រទេសជាតិពិតជាមានសោភ័ណភាពស្រស់ស្អាត ជាពិសេសបានការសរសើរនិង​​​គាំ​ទ្រច្រើនពីភ្ញៀវទេ​​​​សចរ​​ជាតិ និងអន្តរជាតិដែលមកកម្សាន្តនៅកម្ពុជា។

លោកបន្តថា៖ «សកម្មភាពរើសសំរាមនេះបានធ្វើឱ្យអាជ្ញាធរតាមមូលដ្ឋានបានយកចិត្តទុកដាក់ខ្ពស់ រហូតយើងឃើញថា នៅតាមប្រឡាយលូបឹងត្របែក មានលក្ខណៈស្អាតនិងបញ្ហាអនាម័យនេះ បានល្អប្រសើរជាងកាលពីមុន។ អ៊ីចឹងបានន័យថាយុវជនសំរាម បានបំផុសដល់ក្រុមយុវជនដទៃទៀតឱ្យមានគំនិត មានស្មារតី ក្នុងការជំរុញឱ្យប្រទេសកម្ពុជា និងទីក្រុងភ្នំពេញយើង ក្លាយជាទីកន្លែងស្អាត គ្មានសំរាម»។

លោកបន្ថែមថា៖ «ខ្ញុំអំពាវនាវ និងស្នើឱ្យរដ្ឋាភិបាលហ្នឹងត្រូវតែយកចិត្តទុកដាក់ធ្វើម៉េចត្រូវធានាថា ទីក្រុងធំៗនៅក្នុងប្រទេសកម្ពុជារបស់យើងស្អាត មានអនាម័យ មានសោភ័ណភាព មិនមែនតែរឿងសំរាមទេ បញ្ហាផ្លូវថ្នល់ហ្នឹងក៏ត្រូវមានការបោសជូត លាងសម្អាត ធ្វើម៉េចឱ្យមើលទៅស្អាត ដើម្បីបង្កើនទំនុកចិត្ត សុវត្ថិភាព និងបង្កលក្ខណៈសប្បាយរីករាយដល់ភ្ញៀវជាតិ និងអត្តរជាតិមកកម្សាន្ត»។

របាយការណ៍របស់រដ្ឋបាលរាជធានីភ្នំពេញ បង្ហាញថា ចាប់តាំងពីថ្ងៃទី១ ខែឧសភា ឆ្នាំ២០​​២​១ មា​​ន​​​​​ក្រុមហ៊ុនចំនួន៣ រួមមាន ក្រុមហ៊ុន ស៊ីនទ្រ (CINTRI Cambodia)​ ក្រុម​​​ហ៊ុន 8​​​0​0 SU​P​​E​R​/​​G​​A​​EA និងក្រុមហ៊ុន Mizuda Group CO,ltd ជាអ្នកទទួលបន្ទុកក្នុងការប្រ​មូលនិង​​​ដឹ​​ក​​ជ​​ញ្ជូ​​​ន​​សំ​រា​ម​​ចេញ។

ជាមួយគ្នានេះដែរ របាយការណ៍ដែលចេញដោយក្រសួងបរិស្ថាន ដែលដាក់ចំណងជើង​​ថា «រួម​​គ្នា​​កាត់​បន្ថយប្លាស្ទិក» កាលពីខែធ្នូ ឆ្នាំ២០១៩ ឱ្យដឹងថា ការចោលសំណល់រឹងនៅទីលានចាក់​សំ​រា​ម មានការកើនឡើង៥ដង ចាប់ពី៣១៨ ០០០តោន កាលពីឆ្នាំ២០០៤ ដល់ ១,៧លានតោនក្នុ​ង​​​​​មួយឆ្នាំ នៅឆ្នាំ២០១៨។

របាយការណ៍ដដែលបញ្ជាក់ទៀតថា បច្ចុប្បន្ននេះ ថង់ប្លាស្ទិកប្រមាណ១០លានថង់កំពុងប្រើ​​ប្រា​ស់​​នៅក្នុងរាជធានីភ្នំពេញ។ ដោយឡែក ប្រជាពលរដ្ឋកម្ពុជាម្នាក់ដែល​​រស់​​នៅក្នុងទីក្រុងនានារប​​ស់​​ប្រទេសកម្ពុជា ត្រូវបានគេរកឃើញថាបានប្រើប្រាស់ថង់ប្លាស្ទិក ២ ០០០ថង់ ក្នុងមួយឆ្នាំ​​។ ជាង​​នេះ​​ទៀ​ត បរិមាណប្លាស្ទិកនេះនឹងកើនឡើងរង្វង់ ៨,៣ពាន់លានតោន កា​ល​ពីឆ្នាំ២០១៥ នឹងបន្តកើន​​ឡើង​ដល់ ១២ពាន់លានតោន នៅឆ្នាំ២០៥០ ប្រសិនបើនិន្នា​​កា​រនៃ​​កា​​​រ​ប្រើ​​ប្រាស់ និងទម្លាប់គ្រប់​​គ្រង​​សំណល់ប្លាស្ទិកដូចបច្ចុប្បន្ននៅតែបន្តបែបនេះទៀត៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ