ក្រុមអ្នកស៊ើបអង្កេតអន្តរជាតិ បាននិយាយថា មានការចង្អុលបង្ហាញយ៉ាងច្បាស់ថា លោក វ្ល៉ាឌីមៀ ពូទីន បានអនុម័តផ្គត់ផ្គង់មីស៊ីលដែលបានបាញ់ទម្លាក់យន្តហោះដឹកអ្នកដំណើរម៉ាឡេស៊ី MH17 លើប្រទេសអ៊ុយក្រែន កាលពីឆ្នាំ២០១៤ ដែលបានសម្លាប់មនុស្សជិត៣០០នាក់។ នេះបើតាមការចេញផ្សាយរបស់ទីភ្នាក់ងារសារព័ត៌មាន CNA នៅថ្ងៃទី៩ ខែកុម្ភៈ ឆ្នាំ២០២៣ នេះ។
ទោះយ៉ាងណា ក្រុមអ្នកស៊ើបអង្កេតបាននិយាយថា ពួកគេបានផ្អាកការស៊ើបអង្កេត ដោយសារតែមិនមានភស្តុតាងគ្រប់គ្រាន់ដើម្បីផ្ដន្ទាទោសជនសង្ស័យ ហើយលោក ពូទីន មានអភ័យឯកសិទ្ធិជាប្រមុខរដ្ឋ។
រដ្ឋអាជ្ញាហូឡង់ លោកស្រី Digna van Boetzelaer បាននិយាយថា៖ «មានការចង្អុលបង្ហាញយ៉ាងច្បាស់ថា លោក ពូទីន អនុម័តឱ្យមានការផ្គត់ផ្គង់ប្រព័ន្ធមីស៊ីល Buk TELAR ក្នុងករណីបាញ់ទម្លាក់យន្តហោះនេះ»។
លោកស្រីបានប្រាប់សន្និសីទសារព័ត៌មាននៅទីក្រុងឡាអេថា៖ «ទោះបីជាយើងមានការចង្អុលបង្ហាញយ៉ាងច្បាស់ក៏ដោយ យើងមិនទាន់មានភស្តុតាងពេញលេញនៅឡើយ»។
ការប្រកាសនេះធ្វើឡើងបន្ទាប់ពីតុលាការហូឡង់បានផ្តន្ទាទោសជនជាតិរុស្ស៊ីពីរនាក់ និងអ៊ុយក្រែនម្នាក់ ដោយកំបាំងមុខ ជុំវិញការបាញ់ទម្លាក់យន្តហោះ MH17។
នាយករដ្ឋមន្ត្រីហូឡង់ លោក ម៉ាក រូតេ (Mark Rutte) បាននិយាយថា៖ «យើងនឹងបន្តឱ្យសហព័ន្ធរុស្ស៊ីទទួលខុសត្រូវ»។
ពាក់ព័ន្ធនឹងករណីនេះ រុស្ស៊ីបានបដិសេធជាប់ពាក់ព័ន្ធនឹងការបាញ់ទម្លាក់យន្តហោះ MH17 នេះ និងបានថ្កោលទោសសាលក្រមរបស់តុលាការហូឡង់កាលពីឆ្នាំមុន ដែលផ្ដន្ទាទោសមនុស្សទាំងបីនាក់ខាងលើថាជារឿងអាស្រូវ និងមានហេតុផលនយោបាយ។
គួរបញ្ជាក់ថា យន្តហោះដឹកអ្នកដំណើរម៉ាឡេស៊ី MH17 ត្រូវបានបាញ់ទម្លាក់ដោយមីស៊ីលផលិតនៅរុស្ស៊ី កាលពីថ្ងៃទី១៧ ខែកក្កដា ឆ្នាំ២០១៤ នៅភាគខាងកើតប្រទេសអ៊ុយក្រែនដែលគ្រប់គ្រងដោយក្រុមផ្តាច់ខ្លួន ខណៈយន្តហោះនេះហោះហើរពីទីក្រុងអាមស្ទឺដាម (Amsterdam) ទៅកាន់ទីក្រុងគួឡាឡាំពួ (Kuala Lumpur) និងបានសម្លាប់មនុស្សចំនួន២៩៨នាក់ ហើយអ្នកដំណើរនៅលើយន្តហោះនោះ រួមមាន ជនជាតិហូឡង់ ម៉ាឡេស៊ី និងអូស្ត្រាលី៕