ក្រុមសិទ្ធិមនុស្សអន្តរជាតិ ហៅការចាប់បញ្ចូនជនភៀសខ្លួនខ្មែរចំនួន ៦នាក់ពីប្រទេសថៃ បញ្ជូនទៅកាត់ទោសនៅកម្ពុជាថ្មីៗនេះ មានចរឹតនយោបាយ រំលោភសិទ្ធិមនុស្សធ្ងន់ធ្ងរ មិនអាចទទួលយកបាន ដែលត្រូវតែ ដោះលែងពួកគេឱ្យមានសេរីភាពវិញ ដោយគ្មានលក្ខខណ្ឌ។
កាលពីថ្ងៃទី២៥ ខែវិច្ឆិកា អាជ្ញាធរថៃបានចាប់បញ្ជូនជនភៀសខ្លួនខ្មែរចំនួន ៦នាក់ បញ្ជូនទៅប្រទេសកម្ពុជាវិញ តបតាមការស្នើ សុំពីមន្រ្តីរដ្ឋាភិបាលកម្ពុជា។ ក្រោយទៅដល់កម្ពុជាភ្លាម ពួកគេទាំងនោះដែលភាគច្រើនជាស្ត្រីត្រូវបានតុលាការចោទពីបទក្បត់ជាតិ។
មូលហេតុនៃការចាប់បញ្ជូននេះ ត្រូវបានគេអះអាងថា ដោយសាតែពួកគេនិយាយលើបណ្តេញសង្គម ជំរុញឱ្យមេដឹកនាំខ្មែរប្តឹងករណីកោះគុត ដែលថៃកំពុងគ្រប់គ្រង ទៅតុលាការអន្តរជាតិ ដើម្បីការពារបូរណភាពទឹកដី។
អង្គការឃ្លាំមើលសិទ្ធិមនុស្សអន្តរជាតិ Human Rights Watch កាលពីថ្ងៃទី២៩ ខែវិច្ឆិកា ចេញសេចក្តីថ្លែងការណ៍ ដោយនិយាយថា ការចាប់បញ្ជូនជនភៀសខ្លួនចំនួន ៦នាក់ និងកុមារម្នាក់មកកម្ពុជាវិញដោយបង្ខំនេះ ធ្វើឱ្យពួកគេប្រឈមនឹងហានិភ័យ នៃការកាត់ក្តីពីតុលាការកម្ពុជា និងការធ្វើបាបនៅកម្ពុជា។
ប្រភពបន្តថា ការចាប់បញ្ជូនជនភៀសខ្លួនខ្មែរ ៦នាក់ ពីប្រទេសថៃ មកដាក់ឃុំក្នុងពន្ធនាគារនៅកម្ពុជាទាំងបង្ខំនេះ ជាការរំលោភច្បាប់អន្តរជាតិ និងជាការរំលោភសិទ្ធិមនុស្សធ្ងន់ធ្ងរ មិនអាចទទួលយកបាន។
ករណីនេះ Human Rights Watch បានអំពាវនាវ ឱ្យអាជ្ញាធរកម្ពុជាត្រូវទម្លាក់ចោលការចោទប្រកាន់ ក្រោមហេតុផលនយោបាយ ប្រឆាំងនឹងជនភៀសខ្លួនទាំងអស់នេះជាបន្ទាន់ និងដោះលែងពួកគេដោយគ្មានលក្ខខណ្ឌ។
នៅថ្ងៃជាមួយគ្នានោះ ក្រុមសមាជិកអាស៊ានដើម្បីសិទ្ធិមនុស្ស ហៅកាត់ APHR ក៏បានចេញសេចក្តីថ្លែងការណ៍ផងដែរ ដោយលើកឡើងថា ការនិរទេសជនភៀសខ្លួននយោបាយទាំងនេះ គឺជាការគាបសង្កត់ឆ្លងដែនដ៏ធំមួយនៅតំបន់អាស៊ីអាគ្នេយ៍ ដែលរបបផ្តាច់ការបានសហការគ្នាកាន់តែខ្លាំងឡើងៗ ដើម្បីកំណត់គោលដៅ និងបំបិទមាត់អ្នករិះគន់ឆ្លងដែន។
ប្រភពបន្តថា ការនិរទេសនេះបង្ហាញថា អាជ្ញាធរថៃកំពុងរំលោភលើច្បាប់អន្តរជាតិក្នុងការចាប់ជនភៀសខ្លួនបញ្ជូនឱ្យទៅប្រឈមនឹងការបៀតបៀន ចំណែករដ្ឋាភិបាលកម្ពុជាកំពុងបង្ហាញអំពីការពង្រឹងយុទ្ធសាស្ត្របន្ថែមទៀតនៅក្នុងការបំបិទសំឡេងរិះគន់ ដោយមានសហការប្រតិបត្តិការជាមួយរដ្ឋជិតខាង។
ការណ៍នេះ ក្រុមសមាជិកសភាអាស៊ានដើម្បីសិទ្ធិមនុស្ស ជំរុញឱ្យមេដឹកនាំអាស៊ានធ្វើសកម្មភាពឱ្យបានម៉ឺងម៉ាត់ ដើម្បីបញ្ជាក់ឡើងវិញនូវការប្តេជ្ញាចិត្ត នៅក្នុងតំបន់ចំពោះយុត្តិធម៌ លទ្ធិប្រជាធិបតេយ្យ និងសេរីភាពជាមូលដ្ឋាន។
ពួកគេទាំង៦នាក់ នោះដែលត្រូវចាប់ខ្លួន រួមមានអ្នកស្រី សឺន គន្ធា អ្នកស្រី ហុង អាន លោក ប៉ែន ចាន់សង្គ្រាម អ្នកស្រី យិន ចាន់ធូ និងលោក មៀន ចាន់ថន។
ជុំវិញបញ្ហានេះ តំណាងរាស្រ្តបក្សសង្រ្គោះជាតិ លោក សួន សូរីដា ប្រាប់វីអូឌីនៅថ្ងៃទី៣ ខែធ្នូនេះថា ការចោទប្រកាន់ពលរដ្ឋដែលបារម្ភបាត់ទឹកដី ពីទោសក្បត់ជាតិ ជាទង្វើអសីលធម៌ ឃោឃៅ។
លោកថា វិធាននេះ ជាចេតនា បំបាក់ស្មារតី មិនឱ្យពលរដ្ឋខ្វាយខ្វល់ ពីទឹកដីរបស់ខ្លួន ប្រៀបបាននឹងការបើកដៃឱ្យប្រទេសជិតខាង សម្រេចមហិច្ឆតាលេបត្របាក់ទឹកដីខ្មែរ។
លោកថា៖«រដ្ឋាភិបាលកម្ពុជាចោទពលរដ្ឋពីរឿងក្បត់ជាតិ ដែលទាក់ទងនឹងរឿងនិយាយអំពីការបាត់បង់ទឹកដី ដល់និយាយពីការបាត់បង់ទឹកដីថាយើងក្បត់ជាតិ ហើយចុះអ្នកដែលចុះហត្ថលេខាធ្វើឱ្យបាត់បង់ទឹកដី វាទៅជាអ្នកស្នេហាជាតិដូចវាអត់ត្រូវ វាខុសនឹងនិយមន័យហៅថាស្នេហាជាតិ ព្រោះក្បត់ជាតិ គឺអ្នកដែលបានបំផ្លាញជាតិ អ្នកដែលបានកាត់ទឹកដីឱ្យជនបរទេស តែអ្នកស្នេហាជាតិគឺអ្នកដែលខ្វាយខ្វល់ពីទឹកដី និងរឿងជាតិ»។
ចំណែក ប្រធានក្រុមអ្នកតស៊ូមតិកម្ពុជា CAT លោក ហុង លីម ដែលមានមូលដ្ឋាននៅប្រទេសអូស្ត្រាលី ចាត់ទុកការចោទប្រកាន់នេះថា ជាទង្វើមិនចេះអៀនខ្មាស។
បន្ថែមពីនេះ លោកយល់ថា ទង្វើនេះ ក៏ស្តែងចេញផងដែរពីឥរិយាបទមេដឹកនាំ ធ្វើអ្វីតាមចិត្តចង់ មិនគោរពច្បាប់ មិនស្រឡាញ់ទឹកដី ព្រោះតែចង់សម្រេចមហិច្ឆតាក្តោបអំណាចតត្រកូល។
លោក ហុង លីម បង្ហាញការព្រួយបារម្ភថា ទង្វើមេដឹកនាំបែបនេះ នឹងបង្កគ្រោះថ្នាក់ ដល់ប្រជាពលរដ្ឋខ្មែរទូទាំងប្រទេស និងបូរណភាពទឹកដី បើកម្ពុជាគ្មានការប្រកួតអំណាច តាមរយៈបោះឆ្នោតដោយសេរី ត្រឹមត្រូវ និងយុត្តិធម៌ទេនោះ ។
លោកថា៖«មេដឹកនាំគិតតែពីគាបសង្កត់ វៃចោលអានេះ វៃចោលអានោះ កម្ទាត់អានេះ កម្ទាត់អានោះ មួយថ្ងៃៗភ្ងាក់ឡើងមកហ្នឹងគិតតែរឿងចាប់អានេះដាក់គុក ហេតុអ្វីអានេះនៅតែឡូឡា។ ហើយធ្វើនាយករដ្ឋមន្រ្តីហ្វេសប៊ុកដើរតែសម្លឹងមើលហ្វេសប៊ុករបស់គេ ហើយទៅលបស្តាប់របស់គេ ឃើញថាវាអស់សាច់ ជាងចោរព្រៃ ជាងយូកូម ឃើញថាមិនមែនជានាយករដ្ឋមន្រ្តីទេ ហើយឥឡូវនៅក្រាញធ្វើនាយករដ្ឋមន្រ្តីបំបែកបំបាក់ស្មារតី។ អាកូននឹងមិនមែនជានាយករដ្ឋមន្រ្តីទេ គឺថាទៅជាស្វាព្រៃ»។
យ៉ាងណា ប្រធានក្រុមអ្នកតស៊ូមតិកម្ពុជារូបនេះ ស្នើឱ្យមេដឹកនាំគ្រួសារហ៊ុនត្រូវដោះលែងពលរដ្ឋខ្មែរស្នេហាជាតិទាំងនោះ និងត្រូវសើរើប្តឹងករណីកោះគុត ទៅតុលាការអន្តរជាតិ ដើម្បីការពារដែនសមុទ្រខ្មែរមិនឱ្យបាត់បង់។
ឆ្លើយតបនឹងរឿងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន ធ្លាប់ប្រាប់វីអូឌីថា ករណីចាប់ខ្លួនអ្នកទាំង ៦នាក់នោះ គឺមានជាប់ពាក់ព័ន្ធនឹងចលនាជ្រុលនិយមប្រឆាំងរដ្ឋាភិបាលដឹកនាំដោយលោក សម រង្ស៊ី។
មន្រ្តីនាំពាក្យរូបនេះ បន្ថែមទៀតថា អ្នកដែលប្រឆាំងរដ្ឋាភិបាលស្របច្បាប់ គឺមានទោសក្បត់ជាតិ។
របាយការណ៍នានាបង្ហាញថា មេដឹកនាំគណបក្សកាន់អំណាចបានប្រើប្រព័ន្ធតុលាការដើម្បីការពារអំណាចជាចំហ ចាប់ពីចុងឆ្នាំ២០១៧ ក្រោយដឹងថា ពលរដ្ឋជាងពាក់កណ្តាលប្រទេស ឈប់គាំទ្រ ហើយងាកទៅបោះឆ្នោតគាំទ្រគណបក្សសង្គ្រោះជាតិ ដែលជាគណបក្សប្រឆាំង។
បរិបទនេះ ធ្វើឱ្យកម្ពជាមានអំពើពុករលួយ បែបប្រទាក់ក្រឡាគ្នា កម្ពុជាក្លាយជាជម្រកសុវត្ថិភាពរបស់ក្រុមឧក្រិដ្ឋជន បង្កឱ្យពលរដ្ឋច្រើនលាននាក់ រងគ្រោះពីអំពើឆបោក ។
ដោយឡែក ក្រុមអ្នកជំនាញសិទ្ធិមនុស្សនៃអង្គការសហប្រជាជាតិ រកឃើញថា តុលាការនៅកម្ពុជា ត្រូវបានបក្សកាន់អំណាចប្រើប្រាស់ ដើម្បីបំបិទមាត់អ្នករិះគន់ មានការរៀបចំច្បាស់លាស់លក្ខណៈជាប្រព័ន្ធ។
ការរកឃើញនេះ បង្ហាញថា មេដឹកនាំគ្រួសារហ៊ុន កំពុងរំលោភសិទ្ធិមនុស្សជាប្រព័ន្ធ និងរំលោភរដ្ឋធម្មនុញ្ញ ដែលចងកាតព្វកិច្ចពីប្រព័ន្ធពហុបក្ស និងស្មារតីបង្រួបបង្រួមជាតិ។
មាត្រា៣៥ នៃរដ្ឋធម្មនុញ្ញកម្ពុជាចែងថា ប្រជាពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្មក្នុងជីវភាពនយោបាយសេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ។
មាត្រា៥១ នៃរដ្ឋធម្មនុញ្ញចែងថា ព្រះរាជណាចក្រកម្ពុជា អនុវត្តនយោបាយប្រជាធិបតេយ្យ សេរីពហុបក្ស។ ពលរដ្ឋខ្មែរជាម្ចាស់វាសនានៃប្រទេសជាតិរបស់ខ្លួន។ អំណាចបែងចែកដាច់ពីគ្នា រវាងអំណាចនីតិប្បញ្ញត្តិ អំណាចនីតិប្រតិបត្តិ និងអំណាចតុលាការ។ ចំណែកមាត្រា៥២ ចែងថា រាជរដ្ឋាភិបាលកម្ពុជាប្តេជ្ញារក្សាការពារឯករាជ្យ អធិបតេយ្យ បូរណភាពទឹកដី អនុវត្តនយោបាយបង្រួបបង្រួមជាតិ ដើម្បីការឯកភាពជាតិ៕
ដោយ៖ លោក ប៉ុល សម្បត្តិ
