មន្រ្តីក្រសួងសេដ្ឋកិច្ច និងហិរញ្ញវត្ថុ បានជួបពិភាក្សាគ្នាជាមួយសមាគមគ្រូបង្រៀនកម្ពុជាឯករាជ្យ ពាក់ព័ន្ធនឹងការស្នើអោយលុបចោលការផាកពិន័យជិត ១៩លានរៀល ដែលសមាគមចាត់ទុកថា ជាការដាក់ទោសទណ្ឌដោយខុសគោលការណ៍នៃច្បាប់។
នៅព្រឹកថ្ងៃទី០៣ ខែធ្នូ ឆ្នាំ២០២៤ នេះ តំណាងសមាគមកម្ពុជាឯករាជ្យចំនួន ៣រូប បានជួបប្រជុំតទល់នឹងមន្រ្តីនិយ័តករគណនេយ្យ និងសវនកម្មចំនួន ៦រូប នៅទីស្ដីការក្រសួងសេដ្ឋកិច្ច អំពីសំណើរសុំនិរាកណ៍ការសម្រេចពិន័យអន្តរការណ៍ ជាទឹកប្រាក់ ១៨,៨ លានរៀល។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី អះអាងថា មុននឹងដាក់ពិន័យលើសមាគម ក្រសួងសេដ្ឋកិច្ចពុំដែលកោះហៅសមាគមអោយចូលរួមប្រជុំអោយបានដឹង បានឮ ពាក់ព័ន្ធនឹងព័ត៌មាន និងការផាកពិន័យឡើយ ដោយផ្ទុយពីគោលការណ៍សម្រាប់អង្គការសង្គមស៊ីវិលផ្សេងៗទៀត។
អ្នកស្រី បានអះអាងបន្តថា សមាគមរបស់អ្នកស្រី ពុំមានថវិកាគ្រប់គ្រាន់សម្រាប់បង់ការពិន័យរាប់លានបែបនេះនោះទេ ហើយអ្នកស្រី ចាត់ទុកថា នេះគឺជាទង្វើគំរាមកំហែង និងជំរិតទារប្រាក់ពីសមាគមអោយស្របតាមច្បាប់ប៉ុណ្ណោះ។
អ្នកស្រី និយាយថា៖ «គឺជាការចាប់ជំរិតស្របច្បាប់ ហើយដែលសមាគមមិនបានរកប្រាក់ចំណេញផងនោះ មិនបានរកប្រាក់ចំណេញ។ យើងឃើញថា អ្វីដែលក្រសួងគួរតែធ្វើអ្វីទៅលើសមាគម អង្គការនានាហ្នឹង គឺអោយទូលាយទាំងអស់គ្នា គឺហៅទៅ កុំគិតពីនិន្នាការ កុំគិតពីអី។ បើយើងផ្សព្វផ្សាយពីអ្វីដែលជាគោលការណ៍ ហើយសមាគមមិនអនុវត្ត ទើបសមាគមខុស ប៉ុន្តែនេះ សមាគមមិនបានដឹងឮ ហើយក៏មិនបានផ្សព្វផ្សាយដល់សមាគម អោយទៅរៀនសូត្រ ឬទៅទទួលព័ត៌មានថ្មីៗ។ ហើយមកផាកពិន័យបែបនេះ គឺជា ការចាប់ជំរិតក៏ដូចជា ការដែលគំរាមកំហែង ដែលដឹងថាសមាគមមិនរកប្រាក់ចំណេញនោះ»។
បន្ថែមពីលើនេះ អ្នកស្រី បានបញ្ជាក់ថា ការងាររបស់សមាគមពុំមានប្រាក់ឧបត្ថមដល់បុគ្គលិកនោះទេ គឺពួកគេបានបម្រើការងារដោយស្មគ្រចិត្ត ដោយចង់ឃើញលក្ខខណ្ឌការងារគ្រូបង្រៀន មានភាពល្អប្រសើរ មានប្រាក់បៀវត្សសមរម្យ និងលុបបំបាត់អំពើពុករលួយ។
ផ្អែកតាមការរៀបរាប់ខាងលើ អ្នកស្រី ឆាយ៉ាវី សង្ឃឹមថា ក្រសួងសេដ្ឋកិច្ច និងហិរញ្ញវត្ថុ នឹងពិចារណាលើការលើកលែងការផាកពិន័យ នូវចំនួនទឹកប្រាក់ដ៏ច្រើនលើសលប់នេះ។
កាលពីដើមខែវិច្ឆិកានេះ សមាគមគ្រូបង្រៀនកម្ពុជាឯករាជ្យ បានដាក់លិខិតមួយទៅកាន់រដ្ឋមន្រ្តីក្រសួងសេដ្ឋ កិច្ចនិងហិរញ្ញវត្ថុ លោក អូន ព័ន្ធមនុរ័ត្ន ដោយស្នើសុំលុបចោលការពិន័យជាទឹកប្រាក់ជិត១៩លានរៀល ក្រោមហេតុផលថា សមាគមមិនស្ថិតក្នុងលក្ខណៈវិនិច្ឆ័យ និងមិនជាប់កាតព្វកិច្ចដាក់របាយការណ៍ហិរញ្ញវត្ថុអោយរងសវនកម្មឯករាជ្យឡើយ។
មន្រ្តីជាន់ខ្ពស់នៃសមាគមគ្រូបង្រៀនកម្ពុជាឯករាជ្យ លោក ឡេង សេងហុង ដែលបានចូលរួមកិច្ចប្រជុំនៅព្រឹកនេះ ថ្លែងថា ក្រោយការពិភាក្សា និយ័តករគណនេយ្យ និងសវនកម្ម យល់ព្រមទទួលយកសំណើររបស់សមាគម ដោយដាក់ជូនរដ្ឋមន្រ្តីក្រសួងសេដ្ឋកិច្ច ដើម្បីពិនិត្យ និងបន្ធូរបន្ថយ ឬលើកលែងការពិន័យ។
វីអូឌី នៅពុំទាន់អាចសូមការអត្ថាធិប្បាយពីលោក មាស សុខសេនសាន អ្នកនាំពាក្យក្រសួងសេដ្ឋកិច្ចបាននៅឡើយទេ គិតត្រឹមម៉ោងផ្សាយនេះ។ កាលពីពេលថ្មីៗនេះ សភាសហភាពអឺរ៉ុប បានអនុម័តសេចក្តីសម្រេចមួយដោយជំរុញឱ្យកម្ពុជា បញ្ចប់ការបង្រ្កាបលើអង្គការសង្គមស៊ីវិល ដោះលែងអ្នកទោសនយោបាយ និងបញ្ឈប់ការយាយីសកម្មជន។ សេចក្ដីសម្រេចនេះ ក៏បានស្នើសហភាពអឺរ៉ុប ពិនិត្យមើលឡើងវិញ ចំពោះការផ្ដល់ប្រព័ន្ធអនុគ្រោះពន្ធ EBA ដែលនៅមាន ៨០% ដើម្បីដាក់ទណ្ឌកម្មលើរដ្ឋាភិបាលកម្ពុជាបន្ថែមទៀត រហូតដល់អ្នកទោសនយោបាយទាំងអស់ត្រូវបានដោះលែង។
ដោយ៖ លោក ប៉ុល សម្បត្តិ
