តុលាការកម្ពុជា កាត់ទោសស្ត្រីហ្វីលីពីនចំនួន ១៣នាក់ ដែលពពោះជំនួសឱ្យជាប់ទោសម្នាក់៤ឆ្នាំ តែអនុវត្តទោសក្នុងពន្ធនាគារ រយៈពីរឆ្នាំ និង២ឆ្នាំ ត្រូវព្យួរទោសឬទទួលទោសនៅក្រៅឃុំជុំវិញបទ «ប៉ុនប៉ងក្នុងអំពើលក់ដូរមនុស្ស សម្រាប់នាំឆ្លងដែន»។
ចំណែកស្ត្រីខ្មែរម្នាក់ ជាអ្នកសំអាតផ្ទុះ តុលាការកាត់ឱ្យជាប់ទោស ៦ខែ អនុវត្តទោស ២ខែ ទោស ៤ខែទៀតត្រូវអនុវត្តទោស នៅក្រៅពន្ធនាគារ ឬទោសព្យួរដូចគ្នា។ នេះបើតាមសេចក្តីប្រកាសព័ត៌មាន សាលាដំបូងខេត្តកណ្តាល ចុះថ្ងៃទី២ ខែធ្នូនេះ។
បើតាមតុលាការខេត្តកណ្តាល ស្ត្រីជនជាតិហ្វីលីពីនទាំង ១៣នាក់ នោះ រងការចោទថាបានប្រព្រឹត្តបទល្មើសស៊ីឈ្នួលពពោះជំនួស នៅក្នុងបុរីវិមានភ្នំពេញ ក្នុងឃុំព្រែកអញ្ចាញ ស្រុកមុខកំពូល ខេត្តកណ្តាល កាលពីខែមីនា ដល់ខែកញ្ញា ឆ្នាំ២០២៤។
តុលាការ កម្ពុជាចាត់ទុកថា ទង្វើរបស់ជនជាប់ចោទ ប៉ះពាល់ធ្ងន់ធ្ងរដល់សិទ្ធិជាមនុស្សរបស់ទារក និងកុមារ ដែលត្រូវគាំពារដោយច្បាប់ជាតិ និងច្បាប់អន្តរជាតិ រួមទាំងប៉ះពាល់ដល់សន្តិសុខ សណ្តាប់ធ្នាប់សាធារណៈ។
តុលាការបានអះអាងថា ខ្លួនមានភស្តុតាង ដែលបញ្ជាក់ថាស្ត្រីហ្វីលីពីនទាំង ១៣នាក់នេះ មានចេតនាពពោះជំនួស ដើម្បីបង្កើតទារក ក្នុងគោលបំណងលក់ដូរទៅឲ្យអ្នកទី៣ ជាថ្នូរនឹងប្រាក់ ហើយអំពើនេះត្រូវបានកំណត់ថា ជាបទល្មើសលក់ដូរមនុស្ស។
ស្ត្រីហ្វីលីពីនទាំង ១៣នាក់ ដែលត្រូវកាត់ទោសនេះ គឺស្ថិតក្នុងចំណោមស្ត្រីជនជាតិហ្វីលីពីនចំនួន ២០នាក់ ដែលសមត្ថកិច្ចចុះបង្ក្រាប កាលពីថ្ងៃទី២៣ ខែកញ្ញា ឆ្នាំ២០២៤ ក្នុងខេត្តកណ្តាល។ ក្នុងនោះ ស្រ្តីហ្វីលីពីន ៧នាក់ ដែលមិនទាន់មានផ្ទៃពោះ ត្រូវបានបញ្ជូនទៅប្រទេសហ្វីលីពីនវិញ។
ប្រហាក់ប្រហែលនេះដែរ កាលពីឆ្នាំ២០១៨ ស្រ្តីខ្មែរមានផ្ទៃពោះជាង ៣០នាក់ ត្រូវបានឃាត់ខ្លួន ដោយសារផ្តល់សេវាពពោះជំនួសនេះ និងត្រូវបានដាក់ឱ្យស្ថិតក្រោមការពិនិត្យពីបទ «អំពើលក់-ជួញដូរមនុស្សសម្រាប់នាំឆ្លងដែន»។ បន្ថែមពីនេះ អំឡុងឆ្នាំ២០១៧ តុលាការកម្ពុជា ក៏ធ្លាប់បានផ្តន្ទាទោសស្រ្តីជនជាតិអូស្រ្តាលីម្នាក់ ដាក់ពន្ធនាគារ១៨ ខែ ពាក់ព័ន្ធនឹងសំណុំរឿងជួលស្រ្តីខ្មែរឱ្យពពោះជំនួសនេះដែរ៕
ដោយ៖ លោក ប៉ុល សម្បត្តិ
