រដ្ឋាភិបាល បានបញ្ចេញព័ត៌មានពីការតាំងចិត្ត បង្ក្រាបបទល្មើសល្បែងអនឡាញខុសច្បាប់ ដែលថាជាផ្នែកមួយនៃការអនុវត្តគោលនយោបាយ ភូមិ-ឃុំ-សង្កាត់មានសុវត្ថិភាព ដោយចាត់ទុកថា បញ្ហានេះ កំពុងបង្កផលប៉ះពាល់យ៉ាងធ្ងន់ធ្ងរដល់សន្តិសុខ និងសុវត្ថិភាពសង្គម។
ការបញ្ចេញព័ត៌មាននេះ ក៏ចំពេលដែល អ្នកប្រើប្រាស់បណ្តាញសង្គម និងក្រុមអ្នកនយោបាយជំទាស់នៅក្រៅប្រទេស កំពុងធ្វើយុទ្ធនាការជំរុញឱ្យមេដឹកនាំប្រើប្រាស់យន្តការអន្តរជាតិ ប្តឹងបញ្ហាកោះគុត ដែលថៃកំពុងគ្រប់គ្រង ទៅតុលាការអន្តរជាតិ ដើម្បីការពារបូរណភាពទឹកដី។
ក្រៅពីនេះ ក៏មានអ្នកប្រើប្រាស់បណ្តាញសង្គមខ្លះ កំពុងជំរុញឱ្យរដ្ឋាភិបាលស្តារប្រជាធិបតេយ្យ ដើម្បីរក្សាអំណោយផលប្រព័ន្ធអនុគ្រោះ EBA ៨០ភាគរយ របស់សហភាពអឺរ៉ុបកុំឱ្យរបូតទាំងស្រុង ក្រោយ សភាអឺរ៉ុប ជំរុញឱ្យសើររើ និងដាក់ទណ្ឌកម្ម ដែលជាការឆ្លើយតបទៅនឹងការដែលរដ្ឋាភិបាលគ្រួសារហ៊ុន មិនអើពើស្តារប្រជាធិបតេយ្យច្រើនឆ្នាំមកនេះ។
រដ្ឋមន្ត្រីក្រសួងមហាផ្ទៃ លោក ស សុខា និយាយក្នុងសារាចរណែនាំ ស្តីពីការបញ្ឈប់សកម្មភាពផ្សព្វផ្សាយល្បែងស៊ីសងខុសច្បាប់ ចុះថ្ងៃទី៤ ខែធ្នូនេះថា ល្បែងស៊ីសងខុសច្បាប់តាមប្រព័ន្ធអនឡាញ (Online) ត្រូវបានគេផ្សព្វផ្សាយជាចំហ លើបណ្តាញសង្គមក្នុងនោះមានទាំងបុគ្គលមានប្រជាប្រិយភាព និងអ្នកផលិតមាតិកាសង្គមមួយចំនួនផងដែរ។
លោក ស សុខា គូសញ្ជាក់ថា បញ្ហានេះ ធ្វើឱ្យប៉ះពាល់យ៉ាងធ្ងន់ធ្ងរដល់សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ដែលលោកបញ្ជាទៅមន្ត្រីក្រោមឱវាទ ចាត់វិធានការតាមផ្លូវច្បាប់ ចំពោះបុគ្គលណាដែលនៅតែបន្តប្រព្រឹត្តសកម្មភាពខុសច្បាប់នេះ ដែលជាផ្នែកមួយនៃការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព» របស់រាជរដ្ឋាភិបាល។
យ៉ាងណា ល្បែងអនឡាញខុសច្បាប់ រួមទាំងបទឧក្រិដ្ឋ ចាប់ជំរិត បង្ខាំងមនុស្ស ត្រូវបានគេមើលឃើញថាវាបានកើនឡើងយ៉ាងគំហុក នាប៉ុន្មានឆ្នាំចុងក្រោយនេះ ទោះរដ្ឋាភិបាលបានប្រកាសបិទល្បែងអនឡាញនេះច្រើនឆ្នាំទៅហើយក្តី។
បញ្ហានេះ សារព័ត៌មានល្បីៗខ្លះបានទាញភ្ជាប់ទៅនឹងខ្សែស្រឡាយអ្នកមានអំណាច និងអំពើពុករលួយបែបប្រទាក់ក្រឡាគ្នា នៃរបបដឹកនាំបែបគ្រួសារនិយមរបស់គ្រួសារហ៊ុន។
កាស៊ីណូដែលមានបណ្តាញនឹង លោក ហ៊ុន តូ ក្មួយប្រុលលោក ហ៊ុន សែន ត្រូវបានគេរកឃើញក្នុងខែឧសភា ឆ្នាំ២០២៤នេះថា បានដំណើរការល្បែងអនឡាញបំពានបម្រាមរដ្ឋាភិបាល ទាំងគ្មានការរំខានពីស្ថាប័នពាក់ព័ន្ធរបស់រដ្ឋាភិបាល។ ព័ត៌មានស៊ើបអង្កេតនោះបានអះអាងថា កាស៊ីណូ WM ក្នុងក្រុងព្រះសីហនុ បានបន្តល្បែងអនឡាញ បំពានបម្រាមរដ្ឋាភិបាលកម្ពុជា ដោយប្រើប្រាស់អគារលួចលាក់មួយ។ នៅខាងក្នុងអគារនេះ មានការរៀបចំយ៉ាងស្អាត ដើម្បីថតស្រ្តីខ្មែររាប់សិបនាក់ សម្រាប់កាស៊ីណូផ្សាយផ្ទាល់។ ក្រៅពីកាស៊ីណូ WM គេក៏បានរកឃើញកាស៊ីណូជាង ១០ទៀត ក្នុងប្រទេសនៅបន្តប្រតិបត្តិការល្បែងអនឡាញខុសច្បាប់នេះ ក្នុងនោះមានកាស៊ីណូ Crown ក្នុងក្រុងបាវិត របស់លោកឧកញ៉ា កុក អាន សមាជិកព្រឹទ្ធសភារបស់គណបក្សប្រជាជនកម្ពុជាផងដែរ។
ដោយ៖ លោក ញឹម សុខន
