លោក ស៊ាន បូរ៉ាត់ មន្រ្តីស្និទ្ធលោក ហ៊ុន ម៉ាណែត ត្រូវជនរងគ្រោះបន្តទម្លាយពីសកម្មភាពបញ្ជុះបញ្ជូលយុវជននៅតាមសាលាឱ្យចូលរួមក្នុងក្រុមហ៊ុនឆបោករបស់អតីតឧកញ៉ា ឡេង ចាន់ណា ដែលការទម្លាយនេះ ដើម្បីបង្ហាញថា មន្រ្តីរូបនេះជាមេគំនិតនៅពីក្រោយអំពើឆបោកនេះមិនមែនត្រឹមតែជាសាក្សីដូចតុលាការកោះហៅទេ។
តាមរយៈភស្តុតាងជាវីឌីអូ ដែលជនរងគ្រោះប្រគល់ឱ្យ VOD បង្ហាញថា លោក ស៊ាន បូរ៉ាត់ ប្រើអំណាចជារដ្ឋលេខាធិការក្រសួងអប់រំ យុវជន និងកីឡា និយាយឃោសនាអូសទាញសិស្សឱ្យចូលរួមរកស៊ីក្នុងក្រុមហ៊ុនឆបោករបស់អតីតឧកញ៉ា ឡេង ចាន់ណា។
ក្នុងវិឌីអូនោះ គេឃើញ អ្នកស្រីឡេង ចាន់ណា គ្រូបង្រៀន និងកងកម្លាំងផង អង្តុយនៅក្រោយលោក ស៊ាន បូរ៉ាត់ រីឯសិស្សសាលារាប់សិបនាក់ត្រូវបានគេរៀបចំឱ្យអង្គុយស្តាប់ការឃោសនារបស់រដ្ឋលេខាធិការក្រសួងអប់រំ យុវជន និងកីឡារូបនេះ តាមរយៈប្រព័ន្ធបំពងសំឡេងក្នុងបរិវេណសាលារៀននោះ។
លោកថា៖ «ទីផ្សារប្រ៊ីលាន ដែលទីផ្សារនេះបើកទូលំទូលាយទូទាំងប្រទេស និងពិភពលោក។ ចឹងគឺខ្ញុំសុំបញ្ជាក់ប៉ុណ្ណឹង ដើម្បីឱ្យប្អូនៗទាំងអស់ថ្ងៃក្រោយមានការចាប់អារម្មណ៍ ចូលជាសមាជិកសមាគម ប៉ុន្តែទាល់អាយុ ១៨ឆ្នាំឡើង បានឱ្យចូល ហើយមុនហ្នឹងចូលទាល់តែ អ្នកដែលមានចំណេះដឹង ខាងប្រើប្រាស់ប្រព័ន្ធទូរស័ព្ទ ដើម្បីឱ្យដឹងថាទីផ្សារសម្រាប់រកស៊ីវាយ៉ាងម៉េច»។
សកម្មភាពអូសទាញយុវជនក្នុងវិស័យអប់រំនេះ អ្នកស្រីឡេង ចាន់ណា ក៏ធ្លាប់បញ្ជាក់ថា តាមរយៈវីឌីអូដែលជនរងគ្រោះធ្លាប់ថតបាន ដោយអ្នកស្រីនិយាយថា លោក ស៊ាន បូរ៉ាត់ បានដើរឃោសនានៅតាមសាកលវិទ្យាល័យនានា ដែរដើម្បីកៀរគរយុវជនឱ្យដាក់លុយវិនិយោគជាមួយក្រុមហ៊ុនឆបោករបស់ខ្លួន។
លោកថា៖ «សិស្ស CUS ទាំងអស់ សិស្សអាស៊ីអឺរ៉ុបទាំងអស់ គឺនៅក្រោមរបស់គាត់ទាំងអស់ អ្នកណាកុំម្មង់ទំនិញ គឺបងបូរ៉ាត់បានអូតូម៉ាទិច ក្នុងហ្នឹងមានពិន្ទុចាប់គូ មានអីៗច្រើនទៀត។ ចឹងសាកលវិទ្យាល័យណាក៏ដោយ ឱ្យតែបងបូរ៉ាត់គាត់រៀប MOU អាហ្នឹងបង្កើតអតិថិជន»។
បើតាមជនរងគ្រោះ ល្បិចបោកប្រាស់អូសទាញយុវជនជ្រកក្រោមវិស័យអប់រំនេះ ព្រោះតែលោក ស៊ាន បូរ៉ាត់ ជារដ្ឋលេខាធិការក្រសួងអប់រំ យុវជន និងកីឡា ដែលអាចមានឥទ្ធិពលលើការសម្រេចផែនការប្រមូលលុយបានលឿនតាមការគ្រោងទុក។
ការលាតត្រដាងពីអំពើទុច្ចរិតរបស់លោក ស៊ាន បូរ៉ាត់ នេះ ចំពេលតុលាការខេត្តសៀមរាប ចាត់ទុកលោក ស៊ាន បូរ៉ាត់ ជាសាក្សី ដែលត្រូវចូលបំភ្លឺពាក់ព័ន្ធអំពើឆបោកជាមួយអ្នកស្រី ឡេង ចាន់ណា។
តុលាការបានបង្គាប់ឱ្យលោក ស៊ាន បូរ៉ាត់ ចូលឆ្លើយបំភ្លឺក្នុងនាមជាសាក្សីនៅទី១៨ ខែធ្នូ ឆ្នាំ២០២៤ ពីដំណើររឿងឆបោកមានស្ថានទម្ងន់ទោសជាក្រុមមានការចាត់តាំង បទសម្អាតប្រាក់ និងបទចោទមិនបំពេញកាតព្វកិច្ច ចំពោះឧបករណ៍ដែលអាចជួញដូរបាន។ មន្រ្តីម្នាក់ទៀតគឹ លោក ស ថាវី អនុរដ្ឋលេខាធិការ ក្រសួងការពារជាតិ ក៏ត្រូវចូលខ្លួនមកឆ្លើយបំភ្លឺដូចគ្នាដែរ។
ចំពេលជាមួយគ្នានេះ អ្នកស្រី ហ៊ុន ស៊ីណាត ប្អូនស្រីលោក ហ៊ុន សែន បានបញ្ជេញមតិលើហ្វេសបុកដែលខ្លួនថា គាត់ធ្លាប់រងការគំរាមប្តឹងពីលោក ស៊ាន បូរ៉ាត់ នៅពេលនិយាយពីអំពើឆបោករបស់អ្នកស្រី ឡេង ចាន់ណា និងលោក ស៊ាន បូរ៉ាត់ កាលពីផ្ទុះរឿងឆបោកដំបូង។
អ្នកស្រីសរសេរថា៖ «ពេលនោះលោក ស៊ាន បូរ៉ាត់ ឲ្យឡេង ចាន់ណា ប្ដឹងពួកយើងដែលចេញនិយាយក្នុងរឿងរាស្ត្រខេត្តសៀមរាបនោះ។ ខ្ញុំមកដល់ពេលនេះចាំមិនភ្លេចទេមានអ្នកធំឆាតមកមីង ថាកុំប៉ះ ស៊ាន បូរ៉ាត់ មនុស្សគាត់មិនពាក់ព័ន្ធទេ»។
ការលើកឡើងរបស់ប្អូនស្រី លោក ហ៊ុន សែន រូបនេះ ហាក់ស៊ីគ្នាទៅនឹងសំឡេងឆ្លើយឆ្លងគ្នាតាមប្រព័ន្ធទូរសព្ទ ដែលជនរងគ្រោះផ្តល់ឱ្យ VOD ដែលលោក ស៊ាន បូរ៉ាត់ បញ្ជាឱ្យអតីតឧកញ៉ា ឡេង ចាន់ណា ប្តឹងអ្នកដែលហ៊ានលាតត្រដាងពីអំពើឆបោកតាមផ្លូវច្បាប់នេះ។
លោកថា៖ « ប្រាកដជាជាប់ទោសហើយ សាកទៅ! កុំឆ្លើយថា អត់ដឹង បើគ្មានការបញ្ជាពីពួកអ្នកឯងទេ មិនអាចមកបង្ហោះបានទេ ព្រោះគ្មានអាណាគេចង់ជួលគុកជំនួសអ្នកឯងទេ។ ប៉ុន្តែបើអ្នកចង់បន្តទៀតអត់អីទេ យើងលេងតាមសម្រួលតើ មានអី មិនបាច់និយាយអីបង្ខំទេ! អូនឯងធ្វើចឹង រៀបចំតាមផ្លូវច្បាប់ដាក់ម៉ងទៅ»។
លោក ស៊ាន បូរ៉ាត់ ជាអនុប្រធានយុវជនគណបក្សប្រជាជនកម្ពុជាថ្នាក់កណ្ដាលមានលោក ហ៊ុន ម៉ាណែត ជាប្រធាន។ ក្នុងជួរដ្ឋាភិបាលវិញ លោកជា រដ្ឋលេខាធិការក្រសួងអប់រំ យុវជន និងកីឡា និងជាអនុប្រធានអង្គភាពប្រឆាំងអំពើពុករលួយផងដែរ។
VOD បានព្យាយាមសុំការឆ្លើយតបពី លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយតែគ្មានអ្នកលើកទូរសព្ទ នៅពេលហៅចូលជាច្រើនលើក។
ប៉ុន្តែអ្នកនាំពាក្យរូបនេះធ្លាប់ប្រាប់ VOD ថា ករណីក្រុមហ៊ុនប្រីលានស៊ីធីនេះជនសង្ស័យមិនជាប់ពាក់ព័ន្ធបទល្មើស ពាក់ព័ន្ធអំពើពុករលួយឡើយ ហើយការចោទលោក ស៊ាន បូរ៉ាត ថាជាប់ពាក់ព័ន្ធក្រុមហ៊ុនប្រ៊ីលានស៊ីធីគឺគ្មានមូលដ្ឋានច្បាស់លាស់ទេ។
យ៉ាងណា ជនរងគ្រោះម្នាក់ លោក សោម សៅ វ័យ៧០ឆ្នាំ ប្រាប់ថា ដោយសារវត្តមាន លោក ស៊ាន ប៊ូរ៉ាត់ ក្នុងក្រុមហ៊ុនប្រ៊ីលានស៊ីធីរបស់អតីតឧកញ៉ាឡេង ចាន់ណានេះ ទើបលោកហ៊ានខ្ចីលុយធនាគារ ១ម៉ឺន ៤ពាន់ទៅវិនិយោគធ្វើឱ្យផុងខ្លួនក្នុងវិបត្តិបំណុលវន្តករដល់សព្វថ្ងៃ។
លោកថា៖ «ឡេង ចាន់ណា គាត់និយាយមិនដាច់ពីមាត់ទេ បងបូរ៉ាត់ បងបូរ៉ាត់ ទន្ទេញមិនដាច់ពីមាត់ បងបូរ៉ាត់នេះជាអ្នកបង្កើតក្រុមហ៊ុន។ ឡេង ចាន់ណាហ្នឹងគាត់និយាយ ពួកខ្ញុំនឹងឃើញថា អ្នកធំគេនៅ យ៉ាងណាគេមិនធ្វើបាបប្រជាជន ក្រីក្រដែរ។ ខ្ញុំនឹកស្មានមិនដល់ថា មាន ឧកញ៉ាធំៗ មកធ្វើបាបរាស្រ្ត ខ្ញុំនឹងស្មានមិនដល់ណាស់ ជឿជាក់លើពួកគាត់ហ្នឹងឯងបានដាក់លុយដាក់កាក់»។
ដោយឡែក អ្នកចាញ់បោកម្នាក់ទៀតអស់ប្រមាណ ៣ម៉ឺនដុល្លាអាមេរិក បានប្រាប់ VOD ក្នុងលក្ខខណ្ឌមិនបញ្ជេញឈ្មោះថា លោក ស៊ាន បូរ៉ាត់ នៅពេលនិយាយអូសទាញមនុស្សឱ្យចូលរួមយកលុយវិនិយោគក្នុងក្រុមហ៊ុនប្រ៊ីលានស៊ីធីម្តងៗ តែងតែហាមមិនឱ្យថតសំឡេងនោះឡើយ។
លោកថា៖ «បើគាត់(លោក ស៊ាន បូរ៉ាត់) និយាយវិញសំលេងរបស់គាត់ច្រើនណាស់ ប៉ុន្តែយើងអត់បានថតសំឡេង គាត់។ សំឡេងដែលបែកធ្លាយហ្នឹង សំឡេងតិចៗទេ ប៉ុន្តែសំឡេង ដែលមិនបែកធ្លាយវាច្រើន សូម្បីតែឯកឧត្តម ស៊ាន បូរ៉ាត់ គាត់និយាយថា លុយហ្នឹង ក្រុមហ៊ុនហ្នឹងយ៉ាងម៉េចក៏ដោយក៏ មិនឱ្យបាត់លុយយើងម៉ាកាក់ ម៉ាសេនដែរ សូម្បីតែឯកឧត្តម ស៊ាន បូរ៉ាត់ គាត់និយាយចឹងដែរ បើប្រជុំម្តងៗគាត់មិនឱ្យថត (សំឡេង) »។
ក្រុមហ៊ុនប្រ៊ីលានស៊ីធី របស់អតីតឧកញ៉ា ឡេង ចាន់ណា បានបង្កើតល្បិចបោកពលរដ្ឋ តាមរយៈការអូសទាញមនុស្សជាប្រព័ន្ធ តាមយុទ្ធសាស្រ្តប្រមូលលុយដោយសន្យាឱ្យការប្រាក់ ៤ភាគរយ ក្នុងមួយខែនៃប្រាក់ដើម រួមទាំងមានគម្រោងលក់ផលិតផលសុខភាព ដីឡូរ និងការបញ្ជូនពលករទៅប្រទេសកូរ៉េ។
អតីតឧកញ៉ារូបនេះ ធ្លាប់បានបង្ហាញភាពស្និទ្ធស្នាលញឹកញាប់ ជាមួយនាយករដ្ឋមន្ត្រី លោក ហ៊ុន ម៉ាណែត តាមវេទិការឃោសនាបក្ស និងធ្លាប់ប្រកាសដោយចំហរថា មេដឹកនាំរូបនេះជាខ្នងបង្អែកនៃការរកស៊ីរបស់ខ្លួន។
អ្នកស្រីថា៖ «ថ្ងៃទី៣១ ខែធ្នូ ឆ្នាំ២០២២នេះ គឺជាព្រឹត្តិការណ៍ប្រវត្តិសាស្រ្តដ៏ឧត្តុងឧត្តម និងថ្លៃថ្លាសម្រាប់ក្រុមហ៊ុន ប្រ៊ីលានស៊ីធីវើលដ៍ ដែលទទួលបាននូវការយកចិត្តទុកដាក់យ៉ាងជ្រាវជ្រៅបំផុតពីសំណាក់ឯកឧត្តមបណ្ឌិតប្រធាន ហ៊ុន ម៉ាណែត បានចាត់តាំងឯកឧត្តម បណ្តិត ស៊ាន បូរ៉ាត់ ជាតំណាងដ៏ខ្ពង់ខ្ពស់ មកចូលរួមជាអធិបតី សម្ពោធផលិតផលស្គីនឃែជាផ្លូវការ នៃក្រុមហ៊ុនប្រ៊ីលានស៊ីធីវើលដ៍»។
ប៉ុន្តែកាលពីថ្ងៃទី២១ ខែកុម្ភៈ ក្រោយផ្ទុះការតវ៉ាពីពលរដ្ឋ ខុទ្ធការល័យ លោក ហ៊ុន ម៉ាណែត បានចេញលិខិតមួយថាច្រានចោលថា លោក ហ៊ុន ម៉ាណែត មិនពាក់ព័ន្ធជាមួយក្រុមហ៊ុននេះទេ។
លុះជាង ២ខែក្រោយមក ពោលគឺនៅថ្ងៃទីថ្ងៃទី១៥ ឧសភា លោក ហ៊ុន ម៉ាណែត បានប្រគល់ភារកិច្ចឱ្យលោក គី តិច មេធាវីរដ្ឋាភិបាលការពារក្តីឱ្យជនរងគ្រោះ តែចាប់ពីមេធាវីរូបនោះជួយការពារក្តីជិតមួយឆ្នាំទៅនេះ ជនរងគ្រោះនៅតែមិនទទួលបានសំណងមកវិញ ខណៈពួកគេកំពុងជួបវិបត្តិបំណុលវ័ន្តករ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត កត់សម្គាល់ថា បើក្នុងសង្គមប្រជាធិបតេយ្យ ដែលមានប្រព័ន្ធច្បាប់រឹងមាំ រឿងក្តីបោកប្រាស់ទំហំរាប់រយលានដុល្លានេះ លោក ហ៊ុន ម៉ាណែត ក៏មិនរួចខ្លួនពីការស៊ើបអង្កេតពីតុលាការដែរ រីឯលោក ស៊ាន បូរ៉ាត់ វិញគឺមិនមែនជាសាក្សីដូចតុលាការកោះហៅនោះទេ ពោលគឺជាមេខ្លោងបោកប្រាស់តែម្តងព្រោះមានភស្តុតាងជាច្រើនដែលអាចដាក់បន្ទុកមន្រ្តីរូបនេះបាន។
លោកថា៖ «ពួកជនឆបោកអស់ហ្នឹង រកលុយឱ្យមេដឹកនាំ។ ឡេង ចាន់ណាហ្នឹងរកលុយឱ្យ ហ៊ុន ម៉ានី ហ៊ុន ម៉ាណែត ធ្វើអង្គរសង្រ្កាន ធ្វើបោះឆ្នោត កន្លងទៅហ្នឹង។ ដល់ពេលឡុងចុងទៅ ធ្លាក់ខ្លួនបែកសាច់រឿងទៅបានចាប់ខ្លួនមនុស្សពីរ បីនាក់ ដាក់គុកចឹងទៅ ហើយអារឿងសំណងទូទាត់អី គ្មានជូនប្រជាពលរដ្ឋអី រហូតដល់មានប្រជាពលរដ្ឋធ្វើអន្តឃាតស្លាប់ខ្លួនអីហូរហែរដោយសារ អារឿងបំណុលវ័ន្តក ហើយការដោះស្រាយបែបចឹង វាមិនអាចផ្តល់យុត្តិធម៌ ឱ្យប្រជាពលរដ្ឋបានស្ងប់ចិត្តទេ ម្លោះហើយ ហ៊ុន ម៉ាណែត ក៏គួរត្រូវបានស៊ើបអង្កេត ដោយយុត្តិធម៌ដែរ ពីការពាក់ព័ន្ធអំពើឆបោកហ្នឹង»។
អតីតឧកញ៉ា ឡេង ចាន់ណា ត្រូវបានចាប់ខ្លួននៅថ្ងៃទី១៣ ខែមីនា ឆ្នាំ២០២៤ ក្រោយពីជនរងគ្រោះផ្ទុះការតវ៉ាជាបន្តបន្ទាប់រយៈពេល ប្រមាណ ១ខែ ដែលមានអ្នកចាញ់បោកប្រមាណ ៧០០០គ្រួសារ គិតទឹកប្រាក់ជាង ៣០០លានដុល្លារអាមេរិក។
បើតាមតុលាការខេត្តសៀមរាប អ្នកស្រី ឡេង ចាន់ណា ត្រូវជាប់ចោទច្រើនបទល្មើស រួមមាន បទ ឆបោកមានស្ថានទម្ងន់ទោស ជាក្រុមមានការចាត់តាំង បទសម្អាតប្រាក់ និងបទមិនបំពេញកាតព្វកិច្ចចំពោះឧបករណ៍អាចជួញដូរបាន។ អ្នកឃ្លំាមើលសង្គម វិភាគថា រឿងក្តីអ្នកស្រី ឡេង ចាន់ណា ដែលជំពាក់ជំពិនជាមួយនាយករដ្ឋមន្រ្តី រួមទាំងមន្រ្តីគ្រាក់ៗដូច លោក ស៊ាន បូរ៉ាត់នេះ អាចនឹងត្រូវបានរដ្ឋាភិបាលកប់ចោល បើជនរងគ្រោះរក្សាភាពស្ងៀមស្ងាត់ មិនចេញតវ៉ារកកិច្ចអន្តរាគមន៍ដោយខ្លួនឯង ខណៈ ប្រព័ន្ធតុលាការកម្ពុជាត្រូវគេមើលឃើញថាគ្រាន់តែជាកូនអ៊ុករបស់អ្នកមានអំណាចតែប៉ុណ្ណោះ។
ដោយ៖ លោក សែន សច្ចៈ
